ငွေကြေးကောက်ခံနေခြင်းကြောင့် စာမေးပွဲဖြေဆိုမည့် ကျောင်းသားမိဘများ စိတ်ညစ်နေရ

ဖြိုးကြီး။ မတ် ၆၊ ၂၀၀၉

နာဂစ်မုန်းတိုင်းဒဏ်သင့် ဒေသမှ တက္ကသိုလ်ဝင်တန်းဖြေဆိုမည့် ကျောင်းသားကျောင်းသူများထံမှ ပညာရေးဌာနနှင့် အာဏာပိုင်အဆင့်ဆင့်က အကြောင်းအမျိုးမျိုးပြပြီး ငွေကြေးကောက်ခံနေမှုများ ရှိနေသည့်အတွက် ကျောင်းသားမိဘများ စိတ်ညစ်နေရသည်။

ဧရာဝတီတိုင်း၊ ဘိုကလေးမြို့နယ်အတွင်း ကျောင်းသားကျောင်းသူများ စာမေးပွဲဖြေဆိုရန်အတွက် ဖောင်ထုတ်ယူရာတွင် သက်ဆိုင်ရာ ပညာရေးဌာနက ငွေးကြေးတောင်းခံမှုများရှိနေပြီး မှတ်ပုံတင်မရှိသူများမှာ ရဲစခန်းထောက်ခံစာအတွက် ငွေကြေးပေးဆောင်နေရသည်။

“အခုဟာက စာမေးပွဲဖြေဖို့ ဖောင်ထုတ်တော့ ၁၂၀၀ ပေးရတယ်၊ မှတ်ပုံတင်မရှိရင် ရဲစခန်းမှာ ထောက်ခံစာသွားလုပ်တော့ ရဲစခန်းကို ၁၀၀၀၊ ရပ်ကွက် ရယကကို ၅၀၀၊ အဲလိုတွေပေးနေရတယ်၊ နောက်ထပ် စာမေးပွဲဖြေဖို့ ကဒ်ပြားထုတ်တော့ ၁၂၀၀ ထပ်ပေးနေရတယ်” ဟု ကျောင်းသာမိဘတဦးက ပြောသည်။

ထိုကဲ့သို့ ငွေးကြေးကောက်ခံနေမှုများကြောင့် နယ်မှ စာမေးပွဲဖြေဆိုမည့် ကျောင်းသားများအနေဖြင့် အကြပ်အတည်းများ ကြုံတွေ့နေရပြီး ကျောင်းသားအများစုသည် မှတ်ပုံတင်မရှိသူများဖြစ်သည်ဟု အဆိုပါကျောင်းသားမိဘက ဆက်ပြောသည်။

“နယ်က ကျောင်းသားတွေက မှတ်ပုံတင်မရှိတာများတယ်၊ အဲဒီတော့ အကုန်လုံးကို ပိုက်ဆံပေးနေရတာ၊ သူတို့မိတွေကလဲ စားဝတ်နေရေးက မပြေလည်ဘူး၊ မုန်တိုင်းဖြစ်ပြီးတဲ့နောက်ပိုင်း အလုပ်အကိုင်တွေကလဲ အကုန်ရှားပါနေတာ၊ စာမေးပွဲဖြေဖို့ လိုအပ်တဲ့ အခြားအသုံးအဆောင်တွေလဲ ဝယ်ရဆိုတော့ တော်တော်ကို ဒုက္ခရောက်နေကြတယ်” ဟု ပြောသည်။

ဘိုကလေးမြို့နယ်တွင် တက္ကသိုလ်ဝင်တန်းဖြေဆိုမည့် ကျောင်းသားကျောင်းသူပေါင်း ၂၀၀၀ ကျော်ရှိပြီး ယခုလ (၁၁) ရက်နေ့မှစတင်ကာ ဖြေဆိုရမည်ဖြစ်သည်။

နာဂစ်မုန်တိုင်း တိုက်ခတ်ပြီးနောက်ပိုင်း ပညာရေးနှင့်ပတ်သက်သည့် အဆောက်အဦများကို ယနေ့ထိ ပြန်လည် ပြုပြင်ခြင်းမရှိသည့်အတွက်လည်း စာမေးပွဲဖြေဆိုမည့် ကျောင်းသားကျောင်းသူများအနေဖြင့် နေရာထိုင်ခင်းအခက်ခဲတွေလဲ ရှိနေကြောင်း ကျောင်းသားမိဘများက ဆက်လက်ပြောသည်။

ကြက်အသေနှုန်း များပြားသည့်သတင်းကို အာဏာပိုင်များက ပိတ်ပင်ထား

ရိုးမ ၃

မိထ္တီလာမြို့တွင် ကြက်အသေနှုန်း များပြားနေလျှက်ရှိပြီး ဒေသအာဏာပိုင်များက အဆိုပါသတင်းကို မပြောဆိုရန် တားမြစ်ပိတ်ပင်ထားကြောင်း မြို့ခံများက ပြောသည်။

တိရစ္ဆာန်မွေးမြူရေးနှင့်ကုသရေး ဆရာဝန်အား ကြက်လည်လိမ်ရောဂါကြောင့် သေဆုံးခြင်းဖြစ်ကြောင်း ပြောဆိုရန် အာဏာပိုင်များက ညွှန်ကြားထားကြောင်း တိမွေးကုဆရာဝန်နှင့် နီးစပ်သူတဦးက ပြောသည်။

“တိရစ္ဆာန်ဆေးကုဆရာဝန် ပြောပုံအရဆိုရင် ဒါဟာ ဗိုင်းရပ်စ်ပိုးကြောင့်သေတာ၊ ကြက်လည်လိမ်ရောဂါဆိုတာ ဒီလိုမျိုးမဟုတ်ဘူးလို့ ပြောတယ်၊ အခုဟာက ကြက်တွေက တော်တော်ကို သေနေတာ” ဟု ပြောသည်။

မြို့နယ်အာဏာပိုင်အသိုင်းအဝိုင်းနှင့် နီးစပ်သူတဦးအဆိုအရ မြို့နယ်အတွင်း မွေးမြူထားသည့် ကြက်များကို မကြာခင်ရက်ပိုင်းအတွင်း အမိန့်ထုတ်၍ သတ်ပစ်ရန် သက်ဆိုင်ရာက စီစဉ်နေကြောင်း ပြောသည်။

“မိထ္တီလာမြို့ပေါ်မှာရော စက်မှုဇုံအတွင်းမှာရော မွေးထားတဲ့ ကြက်တွေကို သတ်ဖို့ အာဏာပိုင်တွေက အမိန့်ထုတ်တော့မယ်လို့တော့ ကြားတယ်၊ ဒါပေမဲ့လည်း တိတိကျကျလုပ်တာ မတွေ့ရသေးဘူး၊ အခုဖြစ်နေပုံက ကြက်ငှက်တုတ်ကွေးပုံစံမျိုး ဖြစ်နေတာ” ဟု ၎င်းက ပြောသည်။

စစ်အစိုးရ ကျန်းမာရေးဝန်ကြီးဌာနအနေဖြင့် ယခုကဲ့သို့ တိရစ္ဆာန်များနှင့်ပတ်သက်၍ ဖြစ်ပွားသည့် ရောဂါများကို ထိထိရောက်ရောက် ကာကွယ်တားဆီးခြင်း၊ ပြည်သူများကို အသိပေးခြင်းများမရှိကြောင်း မြို့ခံများက ပြောဆိုနေလျှက်ရှိသည်။