နာဂစ်နှစ်ပတ်လည်နေ့ သေဆုံးသူများအတွက် ဧရာဝတီတိုင်း၊ ပြင်ခရိုင်တွင် အလှူဒါနပြုလုပ်

ဗထူး

ယနေ့ကျရောက်ခဲ့သည့် နာဂစ်နှစ်ပတ်လည်နေ့တွင် မုန်တိုင်းကာလအတွင်း သေဆုံးသွားသူများအတွက် ရည်စူးကာ ဧရာဝတီတိုင်း၊ ပြင်ခရိုင်ရှိ ကျေးရွာနှစ်ရွာတွင် အလှူဒါနပြုဆုတောင်းပွဲတရပ် ပြုလုပ်ခဲ့သည်။

ယနေ့ မေလ (၂) ရက်နေ့တွင် ပြင်ခရိုင်၊ မြောက်ကျောင်းဆရာတော်ဦးစီးကာ ဟိုင်းကြီးကျွန်းမြို့နယ်ခွဲများဖြစ်သည့် စက်ဆိပ်ကျေးရွာနှင့် သမက်ဖြူကျေးရွာများတွင် အလှူဒါနပြု မေတ္တာပို့ အမျှတမ်းဝေသည့် ဆုတောင်းပွဲများ ပြုလုပ်ခဲ့ခြင်းဖြစ်သည်။


နာဂစ်တနှစ်ပြည့် ဓါတ်ပုံ

တနှစ်ပြည့် နာဂစ်ဒုက္ခသည်များ၏ နေထိုင်မှုမြင်ကွင်း (Photo: AP)
အဆိုပါအလှူဒါနပြုခြင်းအား ရေယာဉ်ပိုင်ရှင်သုံးဦးမှ တဦးလျှင် ကျပ်ငွေငါးသိန်းစီ ကမကထပြု ထည့်ဝင်ကာ သေဆုံးသွားသူများ၏ မိသားစုဝင်များက တတ်နိုင်သမျှ ထည့်ဝင်လှူဒါန်းမှုပြုခဲ့ကြသည်။

“ဦးလှိုင်ဟုတ်၊ တက်နေမင်းထွန်း၊ တက်နေ၀င်းထွန်း ရေယာဉ်ပိုင်ရှင်တွေက ငါးသိန်းစီလှူတယ်၊ အဲဒီနှစ်နေရာလေးကိုပေါ့နော်၊ ရပ်ကွက်ကိုလှူလိုက်တဲ့အခါ ရပ်ကွက်လူကြီးတွေက တာဝန်ယူပြီး ဘုန်းကြီးတွေကိုပင့်ပြီး လှူတဲ့ အစီအစဉ်လေးလုပ်ပါတယ်၊ သေဆုံးသွားတဲ့သူတွေရဲ့ ဆွေမျိုးသားချင်းတွေရော အားလုံးစုပေါင်းပြီး လုပ်ကြတာပါ၊ အလှူရှင်တွေကတော့ မတည်ငွေပေါ့နော်၊ ကျန်တဲ့ ဆွေမျိုးညီကိုမောင်နှမတွေကလည်း စွမ်းနိုင်သလောက် ၀ိုင်းဝန်းပြီးတော့ သံဃာတွေ ကိုလှူဒါန်းပါတယ်” ဟု သမက်ဖြူကျေးရွာဆုတောင်းပွဲသို့ ရောက်ရှိနေသည့် ပြင်ခရိုင်မြောက်ကျောင်းဆရာတော်က မိန့်ဆိုသည်။

ပြီးခဲ့သည့်နှစ် မေလ (၂) ရက်နေ့က တိုက်ခတ်ခဲ့သည့် နာဂစ်ဆိုင်ကလုန်းမုန်တိုင်းဒဏ်ကြောင့် စက်ဆိပ်ကျေးရွာတွင် လူဦးရေ ၈၀ ကျော်ခန့်သေဆုံးခဲ့ပြီး သမက်ဖြူကျေးရွာတွင် ၉၀ ကျော်ခန့်သေဆုံးခဲ့သည်ဟု ဆရာတော်က ဆက်လက်မိန့်ဆိုသည်။

ပြီးခဲ့သည့်နှစ်က တိုက်ခတ်သွားခဲ့သည့် နာဂစ်မုန်တိုင်းကြောင့် ဆွေမျိုးသားချင်း ၁၇ ဦးသေဆုံးခဲ့ရသည့် သမက်ဖြူကျေးရွာသားတဦးက ယနေ့ပြုလုပ်သည့် အလှူဒါနနှင့်ပတ်သက်၍ “စိတ်ခံစားမှုပုံစံကတော့ဗျာ ဘယ်လိုခံစားနေရလဲဆိုတော့ အိမ်မက်လိုလို ခံစားပြီး လုပ်နေရပါတယ်၊ ကိုယ်တိုင် ကြုံတွေ့ခံစားခဲ့ရတာဆိုတော့ အဖြစ်အပျက်က ဇဝေဇ၀ါလိုလို အိမ်မက်လိုလိုကို ဖြစ်နေတာပဲ၊ ကျနော်ကိုယ်နှိုက်က ကျနော်အိမ် မီးဖိုချောင်လေး ကျန်ခဲ့လို့ ကျနော်ကျန်ခဲ့ရတာပါ၊ ကျနော့်မိသားစုက မပါသွားခဲ့ဘူး၊ ကျနော့်မိန်းမဆို ကုက္ကိုပင်မှာ ကျန်ခဲ့တာ၊ ကလေးက ပုသိမ်မှာမို့ ကျန်ခဲ့တာ၊ ဒီနေ့ကောင်းမှုကုသိုလ် လုပ်လိုက်ရတဲ့အခါကျတော့ တော်တော်လေး ၀မ်းပမ်းတသာဖြစ်ရတယ်၊ ကြည်လည်းကြည်နူးမိတယ်” ဟု ပြောသည်။

အဆိုပါကျေးရွာများသည် လပွတ္တာခရိုင် ဟိုင်းကြီးကျွန်းမြို့နယ်ခွဲတွင် ပါဝင်ကာ ဆားလုပ်ငန်းအား အဓိကထားလုပ်ကိုင်သည့် ကျေးရွာများဖြစ်ပြီး စစ်အစိုးရ၏ သထ္ထုတွင်းဝန်ကြီးဌာနအောက်ရှိ ဆားလုပ်ငန်းလုပ်ကွက်နေရာဖြစ်ရာ ယခုအခါ လုပ်ငန်း ၇၀ ရာနှုန်းခန့် ပြန်လည် လည်ပတ်လုပ်ကိုင်နေပြီဖြစ်သည်။

နာဂစ်မုန်တိုင်းကြောင့် ပျက်စီးသွားသည်များကို ပြန်လည်တည်ဆောက်ရေးလုပ်ငန်းများ လုပ်ကိုင်လျှက်ရှိရာ အဆိုပါဒေသနှင့်ပတ်သက်၍ ပြင်ခရိုင် မြောက်ကျောင်းဆရာတော်က “ဆောက်လုပ်ရေးကတော့ ရွှေသံလွင်ကုမ္ပဏီက တာဝန်ယူထားပါတယ်၊ လူမှုရေး၊ စီးပွားရေး၊ ပညာရေးကိစ္စတွေကတော့ (Safe the Children) အဖွဲ့က ပြင်ခရိုင်မှာ တာဝန်ယူပံ့ပိုးနေတဲ့အတွက်ကြောင့် အနည်းငယ်တော့ အဆင်ပြေနေပါတယ်၊ သမက်ဖြူဆိုတဲ့နေရာကတော့ သထ္ထုတွင်းဝန်ကြီးဌာနလက်အောက်က ဆားလုပ်ငန်းကပိုင်ဆိုင်တဲ့ နေရာဖြစ်နေတော့ ၀န်ကြီးဌာနပံ့ပိုးမှု ရတယ်၊ ဆားလုပ်ငန်းရှင်တွေကိုလည်း ပံ့ပိုးမှုပေးတဲ့အခါကျတော့ လုပ်ငန်းလေးတွေတော့ အပြည်အ၀မဟုတ်ပေမဲ့ (၇၀) ရာနှုန်းလောက် ပြန်လုပ်နိုင်နေပါတယ်” ဟု မိန့်သည်။

နိုင်ငံတကာအဖွဲ့အစည်းများမှ လှူဒါန်ထားသည့် တာပေါ်လင်ရွက်ဖျင်တဲအမိုးများ လွတ်သည့်နေရာ မရှိသလောက်ဖြစ်နေသဖြင့် ဆောက်လုပ်ရေးလုပ်ငန်းများ အတိုင်းအတာတခုအထိ ပြီးဆုံးနေပြီဟု ယူဆ၍မရကြောင်း၊ ကျောင်းသားဦးရေ ၆,၀၀၀ ခန့်ရှိသည့် ပြင်ခရိုင်အထက်တန်းကျောင်းမှာလည်း ရှိသည့်ကျောင်းသားဦးရေနှင့် အဆောက်အဦးအရေအတွက် မျှတမှုမရှိဖြစ်နေသေးပြီး ပြန်လည်တည်ဆောက်ရေးလုပ်ငန်းများ ဘာကိုမျှမလုပ်ရသေးသဖြင့် ပြင်ခရိုင်အတွက် အတိုင်းအတာတခုအထိ လိုအပ်ချက်ရှိနေကြောင်း ဆရာတော်က ဆက်လက်မိန့်ဆိုသည်။

ပြီးခဲ့သည့်နှစ် မေလ (၂) ရက်နေ့က မြန်မာနိုင်ငံတွင်း ၀င်ရောက်တိုက်ခတ်ခဲ့သော အင်အားပြင်းထန်သည့် နာဂစ်ဆိုက်ကလုန်းမုန်တိုင်းဒဏ်ကြောင့် ဧရာဝတီတိုင်းနှင့် ရန်ကုန်တိုင်းတို့တွင် လူအသေအပျောက် ၁၄၀,၀၀၀ ကျော်ရှိခဲ့ပြီး တနှစ်ပြည့်သည့်အချိန်အထိ ပြန်လည်တည်ဆောက်ရေးလုပ်ငန်းများ ထိရောက်စွာ ဆောင်ရွက်နိုင်ခြင်းမရှိသေးပေ။

နာဂစ်တနှစ်ပြည့် ဆုတောင်းမေတ္တာပို့သမည့် အစီအစဉ်နှင့်ပတ်သက်၍ ပြင်ခရိုင်မြောက်ကျောင်းဆရာတော်က “ ပြင်ခရိုင်မြောက်ကျောင်းမှာရှိတဲ့ ဥာဏ်တော် ၅၄ ပေရှိတဲ့ ဘုရားမှာ မနေ့ကရော ဒီနေ့မနက်ရော အားလုံးစုပေါင်းပြီးတော့ ဆုတောင်းပွဲလုပ်တယ်၊ ဘုရားမှာ ဆီမီးပူဇော်တယ်၊ အမျှတမ်းဝေတယ်၊ မေတ္တာပို့တယ်၊ ဒီနေ့ညနေ ဘုန်းကြီးပြန်ရောက်တာနဲ့ ဆက်လုပ်ဖို့လည်း အစီအစဉ်ရှိတယ်၊ ပြီးခဲ့တဲ့ တန်ခူးလဆုတ် (၁၂) ရက်နေ့ကလည်း တခါ ဆုတောင်းပွဲလုပ်ခဲ့ပါတယ်” ဟု မိန့်ဆိုသွားခဲ့သည်။

ကုသရေးညံ့ဖျင်းမှုနှင့် အခမဲ့ဆေးကုသခွင့် မရရှိခြင်းကြောင့် လူနာများ မသေသင့်ဘဲ သေနေရ

ဖြိုးကြီး

ဇီးကုန်းမြို့နယ် ပြည်သူ့ဆေးရုံကြီးတွင် အခမဲ့ဆေးကုသခွင့် အစီအစဉ်များရှိသော်လည်း တကယ်တမ်းလက်တွေ့တွင် ကုသခွင့်မရသည့်အပြင် ဆေးရုံအုပ်ဆရာဝန်ကြီး၏ ကုသရေးညံ့ဖျင်းမှုနှင့် လူနာများအပေါ် ဆက်ဆံရေးမကောင်းခြင်းတို့ကြောင့် မသေသင့်ဘဲ သေဆုံးနေရမှုများရှိနေသည်။

ဇီးကုန်းမြို့နယ်ဆရာဝန်မကြီး ဒေါ်သန်းသန်းဦးသည် မြို့နယ်ရှိ ဆင်းရဲချို့တဲ့သူများအတွက် အခမဲ့ဆေးကုသခွင့်ပြုနိုင်ရန် ငွေပဒေသာပင် စိုက်ထူထားပေးသော်လည်း လူနာများကို ကုသပေးခြင်းမရှိသည့်အတွက်ကြောင့် ငွေကြေးမတတ်နိုင်သူ များမှာ အသက်ဆုံးရှုံးနေရကြောင်း မြို့ခံများက ပြောသည်။

“ဆင်းရဲချို့တဲ့သူ ကလေးသူငယ်တွေကို ပဒေသာပင်ထဲက ငွေနဲ့ ကုသရမဲ့အစား သူတို့က ဟိန်းဟောက်တာလဲ ခံရတယ်၊ ငွေလဲ ကုန်ကျခံရတယ်၊ အသက်လဲ ဆုံးရှုံးခဲ့ရတယ်၊ စေတနာနဲ့လဲ ဘယ်တုန်းကမှ ပြုစုကုသမပေးဘူး” ဟု မြို့ခံတဦးက ပြောသည်။

လွန်ခဲ့သည့်လပိုင်းအတွင်းကလဲ ကိုယ်ဝန်ဆောင်မိခင်တဦး ကျန်းမာရေးမကောင်းသည့်အတွက် ဆေးရုံသို့ တတ်ရောက် ကုသရာ ဆက်ဆံရေးနှင့် ကုသရေးညံ့ဖျင်းမှုတို့ကြောင့် မသေသင့်ဘဲ သေဆုံးခဲ့ရသည်ဟု ပြောသည်။

“စက်ဘီးဆိုင်က ကောင်လေးရဲ့ မိန်းမက ကိုယ်ဝန်အရင့်အမာကြီးနဲ့ ဝမ်းသွားတော့ ဆေးရုံတတ်တာ ဗိုက်ထဲက ကလေးကလဲ မလှုပ်တော့ ဆရာဝန်မကြီးကိုပြောတော့ ဝမ်းသွားတာကို ပြတာလား၊ ကိုယ်ဝန်ကိစ္စကိုပြတာလား ဆိုပြီး လုပ်တာ၊ အဲဒီမှာတင် မိခင်ရော ကလေးပါ အဖက်မတင်ဖြစ်သွားတာ” ဟု ပြောသည်။

ဇီးကုန်းမြို့နယ်ဆေးရုံတွင် လွန်ခဲ့သည့် လေးငါးနှစ်ခန့်ကတည်းက ငွေကြေးမတတ်နိုင်သူများကို အခမဲ့ ဆေးကုသခွင့်ရရန် အတွက် ငွေသိန်း ၂၀ ခန့်ကို မြို့နယ်က ငွေပဒေသာပင် စိုက်ထူထားပေးခဲ့သော်လည်း ငွေကြေးမတတ်နိုင်ပါက ဆေးကုသခွင့်မရရှိသည့် အခြေအနေကို ရောက်နေသည်ဟုဆိုသည်။

“မနေ့ကတောင် ရေစည်လှည်းတွန်းတဲ့သူ မွေးဖို့ ဆေးရုံကိုသွားပြတော့ သုံးသောင်းခွဲတောင်းတယ်၊ အဲဒါပေးစရာလဲ မရှိတော့ ရဲစခန်းကို ဖုန်းဆက်အကူညီတောင်း ပြောပြတော့ စခန်းက သူတုိ့တင်ပေးမယ်ဆိုပြီး လုပ်ပေးလိုက်လို့ အဆင် ပြေသွားတာ၊ ဒီနေ့ပဲ ဆေးရုံက ဆင်းရမယ့် လူနာတယောက်လဲ ဆေးရုံးက ဂရုစိုက်မှုညံ့ဖျင်းလို့ ဆုံးသွားရတယ်၊ ဇီးကုန်း ဆေးရုံက တော်တော်ကို ဆိုးဆိုးရွားရွားဖြစ်နေပြီ” ဟု မြို့ခံက ပြောသည်။

အဆိုပါ အခြေအနေများနှင့်ပတ်သက်၍ ဇီးကုန်းမြို့နယ် ပြည်သူ့ဆေးရုံကြီးသို့ ဖုန်းဆက်မေးမြန်းခဲ့သော်လည်း တစုံတရာ ပြန်လည်ဖြေကြားခြင်းမရှိဘဲ ဖုန်းချသွားခဲ့သည်။

(မယက)ဥက္ကဋ္ဌက လယ်သမားများကို ရိုင်းပြစွာ ပြုမှုသဖြင့် မကျေမနပ်ဖြစ်နေ

ဉာဏ်မောင်

မြို့နယ်(မယက)ဥက္ကဋ္ဌ ဦးညွန့်စိုးက လယ်သမားများတောင်းဆိုမှုအပေါ် ရိုင်းရိုင်းစိုင်းစိုင်း ပြုမှုခဲ့သည့်အတွက် ဒေသခံများက မကျေမနပ်ဖြစ်နေကြသည်။

ပြီးခဲ့သည့် (၂၃) ရက်နေ့တွင် ပဲခူးတိုင်းအနောက်ခြမ်း၊ ဇီးကုန်းမြို့နယ်၊ တပင်တောင်အုပ်စု၊ တောင်ရေကန်ကျေးရွာ လယ်သမားများထံမှ လယ်မြေငှားရမ်းခ တောင်းယူရာတွင် လယ်သမားများက တရားဝင်စာဖြင့် ပေးဆောင်ပြီးကြောင်း အသိအမှတ်ပြုပေးရန် တောင်းဆိုခြင်းအပေါ် ယခုကဲ့သို့ ဆက်ဆံလိုက်ကြောင်း ဒေသခံလယ်သမားတဦးက ပြောသည်။

“တောင်ရေကန်ကျေးရွာ ဦးခင်စိန်နေအိမ်ကိုရောက်ပြီး မြေငှားချထားတဲ့ လယ်သမားတွေကိုခေါ်ပြီး ငွေတောင်းတာ၊ အဲဒါကို လယ်သမားတွေက ပေးမယ် ဒါပေမဲ့ တရားဝင်ပေးပြီးကြောင်းကို စာထုတ်ပေးဖို့ပြောတာ၊ အဲဒါကို (မယက)ဥက္ကဋ္ဌက သူ့ကို ပြန်ပြောရမလားဆိုပြီး ဧည့်ခံကျွေးမွေးထားတဲ့ ပန်းကန်တွေကို ထရိုက်ခွဲပစ်တာ” ဟု ပြောသည်။

လယ်သမားများအနေဖြင့် မြေငှားခပေးဆောင်းကြောင်း တရားဝင်စာထုတ်ပေးရန် တောင်းဆိုခြင်းမှာ (မယက)ဥက္ကဋ္ဌအသစ်ပြောင်းပါက ထပ်မံတောင်းယူမည်ကို စိုးရိမ်သည့်အတွက်ကြောင့်ဖြစ်သည်ဟု ပြောသည်။

“တဧကကို ပဲတခွဲနှုန်း တောင်းယူတယ်၊ အရင်တုန်းက အလီလီအခါခါတောင်းလို့ အခုဟာက တရားဝင် စာထုတ်ပြီး တောင်းယူစေချင်တာ၊ နောက်ထပ် အသစ်ပြောင်းသွားတယ်ဆိုရင်လဲ ထပ်တောင်းမှာ လယ်သမားတွေက စိုးရိမ်တယ်၊ အခုလိုဖြစ်သွားတော့ လယ်သမားတွေက ပေးရမဲ့ငွေကို ကျေးရွာလူကြီး ဦးခင်စိန်အိမ်ကို သွားပို့ထားကြတယ်” ဟု ဆက်လက်ပြောသည်။

အဆိုပါလယ်မြေများသည် ၁၉၉၀-၉၁ ခုနှစ်က မြေလွတ်မြေရိုင်း ဖော်ထုတ်ရေးစီမံကိန်းပြီးနောက် (မယက)ပိုင်လယ်မြေအဖြစ် သိမ်းယူထားသည့် မြေများဖြစ်ပြီး တစုံတရာ စိုက်ပျိုးခြင်းမရှိသည့်အတွက် ဒေသခံများက စိုက်ပျိုးခဲ့ကြပြီး မြေငှားခကို ပေးဆောင်နေရခြင်းဖြစ်သည်။

ယခင်ကလည်း ၎င်းလယ်မြေများတွင် မြို့နယ်အာဏာပိုင်များက ရဲတပ်ဖွဲ့အလံများ လာရောက်စိုက်ထူပြီး မြေစာရင်းဌာန၊ (လဝက)ဦးစီးဌာနတို့က ဝါးလုံးများယူဆောင်ကာ ရဲစခန်းဆောက်လုပ်မည့် မြေဖြစ်သည့်အတွက်ကြောင့် ခြံခတ်ခြင်းများပြုလုပ်ခဲ့သဖြင့် ဒေသခံလယ်သမားများနှင့် ပဋိပက္ခဖြစ်ခဲ့ဖူးကြောင်း ဒေသခံက ဆက်လက်ပြောသည်။

ကျေးရွာဥက္ကဋ္ဌနှင့် အာဏာပိုင်များက ရွာသားကို အမှုဆင်ပြီး ပစ္စည်းများသိမ်းယူ

ရိုးမ ၃

ကျေးရွာဥက္ကဋ္ဌနှင့် ရဲစခန်းအာဏာပိုင်တို့ ပူးပေါင်း၍ ရွာသားဖြစ်သူ ကိုဇော်မင်းသိန်းကို ဖမ်းဆီးကာ ခိုးမှုဖြင့် တရားစွဲဆိုပြီး ၎င်းပိုင်ဆိုင်သည့် ပဲများကို သိမ်းယူသွားခဲ့သည့်အတွက် ကာယကံရှင်မိသားစုမှာ ဒုက္ခရောက်နေရသည်။

ပဲခူးတိုင်း၊ ဖြူးမြို့နယ်၊ မြပဲခူးရွာမှ ကျေးရွာဥက္ကဋ္ဌ ဦးနီကွေးနှင့် ကညွှတ်ကွင်းရဲစခန်း တာဝန်ရှိသူများက ရွာသား ကိုဇော်မင်းသိန်းအား ပြီးခဲ့သည့် ဖေဖော်ဝါရီလ (၂) ရက်နေ့က ၎င်းရိတ်သိမ်းထားသည့် ပဲများကို သက်သေခံအဖြစ်သိမ်းကာ လူကိုပါ ဖမ်းဆီးခေါ်ဆောင်သွားခြင်းဖြစ်ကြောင်း ဆွေးမျိုးနီးစပ်သူတဦးက ပြောသည်။

“ဇော်မင်းထွန်းက သူစိုက်ထားတဲ့ ပဲကို သူရိတ်သိမ်းတာကို တခြားရွာက အမျိုးသမီးတယောက်က တရားလိုလုပ်ပြီး တိုင်လို့ သူ့ကို ခိုးမှုနဲ့ဖမ်းတယ်၊ နှုတ်ထားတဲ့ ပဲတွေကိုလဲ လှည်းနဲ့တိုက်ပြီး သိမ်းသွားတယ်၊ အဲဒါကို သက်သေခိုင်ခိုင်လုံလုံနဲ့ (မယက)ဥက္ကဋ္ဌကိုပြောတော့ (မယက)က အာမခံထားလို့ သူ့ကို အချုပ်ထဲကတော့ လွှတ်လိုက်ပြီ ဒါပေမဲ့ ဖြူးမြို့နယ်တရားရုံးမှာတော့ ရုံးတင်ထားတယ်” ဟု အဆိုပါဆွေမျိုးက ပြောသည်။

မြပဲခူးကျေးရွာဥက္ကဋ္ဌက ကိုဇော်မင်းသိန်းအား (၁) လပိုင်း (၁၇) ရက်နေ့တွင် (ရယက) ရုံးသို့ ခေါ်ယူကာ ရဲစခန်းမှ တားမြစ်စာ ပေးပို့လာသည့်အတွက်ကြောင့် ပဲများကို မရိတ်သိမ်းရန် လက်မှတ်ထိုးခိုင်းခဲ့သည်ဟု ကာယကံရှင်ကို ဇော်မင်းသိန်းက ပြောသည်။

“ကျနော် ပဲနှုတ်တော့ ကညွှတ်ကွင်းရဲစခန်းက ရဲလေးယောက်နဲ့ ဥက္ကဋ္ဌက ကျနော့်ကို လာဖမ်းသွားတယ်၊ ဟိုရောက်တော့ စခန်းမှူးက မင်း သူများပဲကို ခိုးတယ်ပြောတော့ ကျနော်က မခိုးဘူး၊ ကျနော်ပဲကျနော်နှုတ်တာလို့ ပြောတာ လိမ်တယ်ဆိုပြီး အချုပ်ထဲကို ပို့ထားလိုက်တယ်၊ အချုပ်ထဲမှာ (၄၈) ရက် နေလိုက်ရတယ်၊ အဲဒီ စိုက်ထားတဲ့အထဲက ငါးဧက နှုတ်ထားတာကို အကုန်လုံး လှည်းနဲ့တိုက်ယူသွားတာ” ဟု ဆိုသည်။

ယင်းကဲ့သို့ တရားလိုလုပ် တိုင်တန်းသူမှာ ပဲနွယ်ကုန်းကျေးရွာမှ ဖြစ်ပြီး တခါမှ သိကျွမ်းခြင်းမရှိသည့်အပြင် ယခုစိုက်ပျိုးထားသည့် လယ်မြေမှာလည်း ကိုဇော်မင်းနာမည်ဖြင့် ၂၀၀၂ ခုနှစ်ကတည်းက ဂရမ်ပေါက်ထား၍ ပုံမှန် အခွန်ဆောင်ထားသည့် မြေဖြစ်သည်ဟု သူက ဆက်ပြောသည်။

“ကျနော့်နာမည်နဲ့ ဂရမ်ပေါက်ထားတာ ၂၀၀၂ ခုနှစ်ကတည်းက ပေါက်ထားတာ၊ စုစုပေါင်း (၁၂) ဧကရှိတာ၊ အခုဖြစ်တာက ရွာလူကြီးက အဲဒီအမျိုးသမီးနဲ့ပေါင်းပြီး ပိုက်ဆံယူပြီး ကျနော့်ကို ဒီလိုလုပ်လိုက်တာလို့ ထင်တယ်၊ ဘာကြောင့်လဲဆိုတော့ တရားလို ဒေါ်သန်းမြင့်ဆိုတဲ့ အမျိုးသမီးကိုလဲ မသိဘူး၊ သူက ပဲနွယ်ကုန်း၊ ကျနော်က ဖြူးမြို့နယ် မြပဲခူးရွာမှာနေတာ” ဟု ကာယကံရှင် ကိုဇော်မင်းသိန်းက ဆက်လက်ပြောသည်။

ထိုကဲ့သို့ အမှုဖြစ်ပွားသည့်အတွက် ကုန်ကျစရိတ် (၁၀) သိန်း ဝန်းကျင်ခဲ့ရှိခဲ့ပြီး နွားနှင့်လှည်းကို ရောင်းလိုက်ရသည့်အပြင် သက်သေခံအဖြစ် သိမ်းသွားသည့် ပဲများကိုလည်း ပြန်မရသေးကြောင်း ပြောသည်။

“အဲဒီ စိုက်ထားတဲ့အထဲက ငါးဧက နှုတ်ထားတဲ့ ပဲကို အကုန်လုံး လှည်းနဲ့တိုက်ယူသွားတာ၊ ပြီးတာ့ တခြားရွာက တလင်းထဲပြောင်းနယ်ပြီး အဲဒီမိန်းမကို ပေးလိုက်တယ်၊ အခု (ရယက)ဥက္ကဋ္ဌက ဇော်မင်းသိန်းမိန်းမကို ပဲ ၃၅ တင်းပေးမယ်၊ ဘယ်ကိုမှ မတိုင်ပါနဲ့ဆိုပြီး ပြောတယ်” ဟု ဆွေးမျိုးနီးစပ်သူတဦးက ပြောသည်။

အဆိုပါအမှုနှင့်ပတ်သက်၍ ကိုဇော်မင်းသိန်းက ကျေးရွာဥက္ကဋ္ဌ ဦးနီကွေးအား အရေးယူဆောင်ရွက်ပေးရန် ရဲတပ်ဖွဲ့မှူးထံ ယခုလ (၂၂) ရက်နေ့ကတည်းက တိုင်တန်းထားသော်လည်း ယနေ့အထိ တစုံတရာ အကြောင်းပြန်ကြားခြင်းမရှိသေးကြောင်း ကိုဇော်မင်းသိန်းက ပြောဆိုသည်။