မလေးရှားသို့ တရားမဝင်သွားရောက်မည့် လူ ၃၀ ကို ထိုင်းစစ်တပ်က ဖမ်းဆီး

ဉာဏ်မောင်

မလေးရှားနိုင်ငံသို့ တရားမဝင်သွားရောက်မည့် လူမှောင်ခို စက်လှေတစီးကို ယခုလ ၂၂ ရက်နေ့ ညပိုင်းတွင် ထိုင်းအာဏာပိုင်များက ဖမ်းဆီးခဲ့သည်။

တနင်္လာရီတိုင်း၊ ကော့သောင်းမြို့မှ ထွက်ခွာလာသည့် အဆိုပါစက်လှေပေါ်တွင် လူ ၃၀ ပါလာပြီး ရနောင်းစစ်တပ်က မီးပြကျွန်းတွင် ဖမ်းဆီးလိုက်ခြင်းဖြစ်ကြောင်း ဒေသခံတဦးက ပြောသည်။

“လှေသမားက ၂ ယောက်မှာ တယောက်က ရေထဲခုန်ချပြီး ထွက်ပြေးလွတ်သွားတယ်၊ သားငယ်လေး(ခ) အလစ်ဆိုတဲ့ ကောင်လေးတယောက်ဘဲ မိတယ်၊ ကောသောင်း ရွှေမင်းဝံအပိုင်က အသက် ၁၅ နှစ်ဘဲရှိတယ်၊ လောလောဆယ် သူ့ကို ရုံးတင်စစ်ထားတယ်” ဟု ပြောသည်။

စက်လှေပေါ်တွင်လိုက်ပါလာသူများမှာ ထားဝယ်၊ မြိတ်၊ မော်လမြိုင်၊ ရန်ကုန်အပြင် အခြားမြန်မာပြည်အတွင်းပိုင်းမှ လူများပါဝင်ပြီး အသက်မပြည့်သေးသည့် ကလေးငယ် (၄) ဦး၊ အမျိုးသမီး (၇) ဦးနှင့် ယောင်္ကျား (၂၀) ဦး ပါဝင်ကြောင်း အဆိုပါဒေသခံက ဆက်ပြောသည်။

“သူတို့ထွက်လာတာက ကော့သောင်း တောင်နောက်လှေဆိပ်ကနေ ထွက်လာတာ၊ ပွဲစားတွေအဆက်သွယ်နဲ့ပေါ၊ မလေးမှာရောက်နေတဲ့ အမျိုးတွေက ချိတ်ဆက်ပေးပြီး အဲလိုတွေထွက်လာကြတာ၊ ကော့သောင်းရောက်ရင် ဘယ်သူ ဘယ်သူဆက်သွယ်ပါ၊ ကော့သောင်းမှာ လာကြိုကြတယ်လေ၊ ပွဲစားတွေက ကြိုတာပေါ့၊ ညီကိုမောင်နှမတွေက ဆက်သွယ်ကြတယ် အမျိုးမျိုးပေါ့၊ ပိုက်ဆံရှိလို့ လာကြတာလည်း ရှိတယ်၊ ပုံစံအမျိုးမျိုးနဲ့ လာကြတာ” ဟု ပြောသည်။

အဆိုပါ စက်လှေကို ကော့သောင်းမြို့မှ မနွယ်ဆိုသည့်အမျိုးသမီးက ပိုင်ဆိုင်ပြီး စက်လှေမောင်းလာသည့် သားငယ်လေး(ခ) အလစ်ဆိုသူကို တရားမဝင်လူသယ်ဆောင်မှု၊ ထိုင်းနိုင်ငံအတွင်းသို့ တရားမဝင်ခိုးဝင်မှုတို့ဖြင့် တရားစွဲဆိုထားပြီး ကလေးထောင်သို့ ပို့ဆောင်မည်ဖြစ်ကြောင်း ၎င်းဒေသခံက ဆက်ပြောသည်။

ယခု ဖမ်းဆီးထားသူများကို သက်သေအနေဖြင့်ထားရှိပြီး ပါနန်အချုပ်ခန်းတွင် ထိမ်းသိမ်းထားကာ ဒဏ်ငွေ (သို့မဟုတ်) ထောင်ဒဏ်အပြစ်ပေးနိုင်ကြောင်း ၎င်းက ဆက်ပြောသည်။

“သူတို့က ရိုးရိုး တောမောင်းမရှိတဲ့အတွက် ထောင် ၁၀ ရက်လောက်တော့ကျမယ်၊ ဒဏ်ငွေဆိုရင် (၂၀၀၀)၊ (၂၅၀၀) လောက်ဆောင်ရနိုင်တယ်” ဟု ပြောသည်။

ယခုကဲ့သို့ ဖမ်းဆီးရမိခြင်းသည် ၂၀၀၉ ခုနှစ်အတွင်း လူအများဆုံးကို ပထမဆုံးအကြိမ် ဖမ်းဆီးမိခြင်းဖြစ်ပြီး ပွင့်လင်းရာသီရောက်ရှိလာသည့်အတွက် တရားမဝင် ဝင်ရောက်လာသူများကို ဖမ်းဆီးရန် ထိုင်းအာဏာပိုင်များက ကြိုတင်စီမံထားရှိကြောင်း ၎င်းက ဆက်ပြောသည်။

ကရင်အမျိုးသားအစည်းအရုံးဥက္ကဌ ဗိုလ်ချုပ်ကြီး စောတာမလာဘော၏ (၉၀) နှစ်ပြည့် မွေးနေ့မင်္ဂလာဧည့်ခံပွဲ

ကျန်စစ်သား … ငါ့ကို ခိုးပြီ

ရဲရင့်သက်ဇွဲ

၁။
နေ့တွေ ညတွေ
နေတွေ လတွေ
တရွေ့ရွေ့တိုက်စား
လှိုက်စားလာတဲ့ ဝေဒနာမှာ
ဘာကို ယုံလို့ 
ဘာတွေ ပုံအပ်ရမှာတဲ့လဲ ။


၂။
ဘယ်လိုခေတ်ဆိုးကြီးပါလိမ့်
ဟောဒီ အမှောင်ထုထဲမှာပဲ
အကြောက်တရားနဲ့ ချောက်ချားနေကြတော့မှာလား
အကြောက်တရားနဲ့  ဖောက်ပြားသွားတော့မှာလား။
ဇာတ်တူသားစားတဲ့ လူတန်းစားတရပ်
အမြစ်ဖြတ်ဖို့ လိုပြီ ။

မာယာများတဲ့ ကစားပွဲထဲ
ကံစမ်းမဲများ ပါလေမလား
အရောင်ပြောင်းလွယ်တဲ့
ဦးဆွေးဆံမြေ့ အမှုထမ်းလိုသူများရဲ့
အလိုရမ္မက်ဟာ
ပြိုကွဲပျက်စီးခြင်းနဲ့  အဆုံးသတ်ရလိမ့်မယ်။

၃။
ကံကိုယုံပြီး ဆူးပုံမနင်းနဲ့ 
ဆူးစူးတာပဲ ခံရမယ်။
အသက်ကို ဉာဏ်စောင့်တယ်
အောင်ပွဲနဲ့ အနာဂတ်ကို အမှန်တရားစောင့်တယ်
အဲဒီကြားက မင်းစောလူးရဲ့
ကျန်စစ်သား ... ငါ့ကို ခိုးပြီ ဆိုစကား
မင်းတို့နှုတ်ဖျားက ထွက်ကျလာရင်
မင်းတို့ထိုက်နဲ့  မင်းတို့ကံ
ခွေးသေဝက်သေ ကျန်ခဲ့ပေတော့
အဖန်ဖန်အခါခါ ကျွန်ပြုခံကြပေတော့။

၎။
အယုတ် အလတ် အမြတ် မရွေး
သမိုင်းပေးတာဝန်အရေးကို
ကိုယ့်အရေးလိုတွေး
နှစ်ထောင့်ရှစ် ဖွဲ့စည်းပုံအခြေခံဥပဒေကို
ဖျက်သိမ်းပေး
နှစ်ထောင့်တဆယ် ရွေးကောက်ပွဲကို
ဖျက်သိမ်းပေး
ဖျက်သိမ်းပေး ဖျက်သိမ်းပေး အရာများစွာ
ရွှေဂုံတိုင် ကြေညာစာတမ်းသာ
တတိုင်းပြည်လုံးရဲ့ အသက်ဖြစ်တယ်။ ။

ရဲရင့်သက်ဇွဲ
၂၀၀၉ ဒီဇင်ဘာ ၁၄

ရဲများရိုက်နှက်မှုကြောင့် လူငယ်တဦး အတွင်းလူနာအဖြစ် တိုင်းဆေးရုံတွင် ကုသနေရ

ရိုးမ ၃

လုံခြုံရေး ရဲများရိုက်နှက်မှုကြောင့် လူငယ်တဦး အတွင်းလူနာအဖြစ် ပုသိမ်ဆေးရုံတွင်တင်ထားရသည့်အပြင် အာဏာပိုင်များဘက်မှ တရားစွဲဆိုမှုများပြုလုပ်ထားသည်။

ယခုလ ၁၉ ရက်နေ့ည ၁၁ နာရီခန့်က ဧရာဝတီတိုင်း၊ ချောင်းသာမြို့နယ် ရဲတပ်ဖွဲ့မှ ရဲအုပ် သန်းထွန်းဦးဆောင်သည့် ရဲတပ်ဖွဲ့ဝင်များက မောင်ထွန်းလင်းနှင့် မောင်ရာဇာဟန်တို့ကို ပွဲခင်းအတွင်းရိုက်နှက်သဖြင့် မောင်ထွန်းလင်းမှာ ပုသိမ်ဆေးရုံသို့ ပို့ထားရပြီး ၎င်းတို့နှစ်ဦးစလုံးအား တာဝန်ဝတ္တရားနှောက်ယှက်မှုဖြင့် တရားစွဲဆိုထားကြောင်း ဒေသခံတဦးက ပြောသည်။

“အေးသစ္စာ ဇာတ်အဖွဲ့ စတိတ်ရှိုးထွက်နေတုန်းမှာ ကနေကြရင်း လုံခြုံရေးနဲ့ ဖြစ်တာ၊ အဲဒီမှာတင် သူတို့နှစ်ဦးကို ဖမ်းပြီး လူမြင်ကွင်းမှာတင် ပုဆိုးကို ချွတ်ပြီး ရိုက်တယ်၊ ပြီးတော့ ရဲစခန်းကိုခေါ်သွားပြီး လက်ထိပ်နောက်ပြန် ခတ်ပြီးရိုက်တယ်” ဟု ပြောသည်။

၎င်းတို့နှစ်ဦးအား အချုပ်ထဲတွင် နှစ်ရက်ထားပြီး အာမခံဖြင့် ပြန်လွှတ်ပေးသည့်အချိန်တွင် မောင်ထွန်းလင်းမှာ လဲကျသွားပြီး ငွေဆောင်ဆေးရုံသို့ အတွင်းလူနားအဖြစ် တင်လိုက်ရပြီးနောက် ပုသိမ် တိုင်းဆေးရုံးသို့ ဆက်လက်ပို့ဆောင်ထားကြောင်း ၎င်းဒေသခံက ဆက်ပြောသည်။

“လောလောဆယ် မောင်ထွန်းလင်းကို ဆေးရုံ အဆောင် ၆ မှာ တင်ထားတယ်၊ သူ့အသက်က ၂၄ နှစ်လောက်ဘဲရှိသေးတယ်၊ ကလေးက မိဘမဲ့ဖြစ်နေတော့ ရွာကလူတွေ ပေးတဲ့အလှူငွေနဲ့ ဆေးကုနေရတယ်၊ ကလေးဇာတိက သာပေါင်းဘက်က ချောင်းသာမှာလာပြီး အလုပ်လုပ်နေတာ၊ အချုပ်ထဲမှာ အဲလိုရိုက်တဲ့အတွက် ငွေဆောင်တရွာလုံးကလဲ မကျေနပ်ဘူး” ဟု ဒေသခံက ဆက်ပြောသည်။

အဆိုပါ ရဲတပ်ဖွဲ့ဝင်များ ရိုက်နှက်မှုနှင့်ပတ်သက်၍ သက်ဆိုင်ရာ ချောင်းသာ ရဲစခန်းက ယင်းဖြစ်ရပ် မှန်ကန်ကြောင်း တာဝန်ကျ ရဲဝန်ထမ်းတဦးက အတည်ပြုပြောဆိုသည်။

“ကျနော်တို့သွားထိန်းတာကိုပြန်ထိုးတော့ ကျနော်တို့ အမှုဖွင့်ထားတာပေ့ါ၊ ကျနော်တို့နှစ်ယောက်စလုံးကို အမှုဖွင့်ထားပါတယ်၊ အာမခံပေးထားတယ်၊ ဆေးရုံသွားပြမယ်ဆိုပြီး ပုသိမ်မှာရောက်နေပါတယ်၊ ပုဒ်မ (၃၃၂)နဲ့ ဖွင့်ထားတယ်” ဟု ပြောသည်။

မောင်ထွန်းလင်းမှ အဖဦး စန်းရွှေ၏ သားဖြစ်ကာ ၎င်းနှင့်အတူ ရိုက်ခံရသည့် မောင်ရာဇာဟန်မှာ ဦးသန့်ရွှေ၏ သားဖြစ်ပြီး ယခုကဲသို့ အာဏာပိုင်များက ဥပဒေမဲ့ ရိုက်နှက်ညှင်းပမ်းမှုကို သက်ဆိုင်ရာ အထက်အာဏာပိုင်များထံ တင်ပြသွားမည်ဖြစ်ကြောင်း လိုက်လံကူညီပေးနေသူတဦးက ပြောသည်။

(၁၀) ကြိမ်မြောက် နိုင်ငံတကာ ရွှေ့ပြောင်းအလုပ်သမားနေ့ ကျင်းပ

ရိုးမ ၃

(၁၀) ကြိမ်မြောက် နိုင်ငံတကာ ရွှေ့ပြောင်းအလုပ်သမားနေ့ အခမ်းအနားကို ယနေ့နံနက်ပိုင်းက ထိုင်း-မြန်မာ နယ်စပ်တွင် ကျင်းပပြုလုပ်ခဲ့ကြသည်။

အဆိုပါအခမ်းနားကို ရောင်ခြည်ဦးအလုပ်သမားများအဖွဲ့ (YCOWA)၊ လူ့ဘောင်သစ်ဒီမိုကရက်တစ်ပါတီ(DPNS)၊ မြန်မာ့အမျိုးသမီးသမဂ္ဂ ( BWU)၊ (MAP) ဖောင်ဒေးရှင်းနှင့် အဝေးရောက်ဧရာဝတီအသင်း (OIA) တို့က ပူးပေါင်းကျင်းပခဲ့ခြင်းဖြစ်သည်။

အခမ်းအနားကျင်းပရခြင်းပတ်သက်၍ “ကျနော်တို့ ရွှေ့ပြောင်းအလုပ်သမားတွေဟာ အများအားဖြင့် တယောက်တနေရာစီမှာ အလုပ်လုပ်နေရတာ ဖြစ်တယ်။ ဆုံတွေ့ဖို့ ခဲတယ်။ အဲဒါကြောင့် ဒီအခမ်းအနားလုပ်ခြင်းအားဖြင့် မဲဆောက်မှာရှိတဲ့ အလုပ်သမားတွေ အားလုံးလာပြီး တစုတစည်းထဲ တွေ့ခွင့်ရပြီး တယောက်နဲ့တယောက် ရင်ထဲမှာရှိတာတွေ ဖွင့်ပြောပြီး အတွေ့အကြုံတွေ ဖလှယ်လို့ရအောင်၊ နောက် အလုပ်သမားတွေအနေနဲ့ သိသင့်တာတွေ သိလို့ရအောင် ဆိုပြီး ဒီအခမ်းအနားကို လုပ်တယ်။ နောက်ပြီး အလုပ်သမားတွေ ညီညွတ်ပြီး တစုတည်းဖြစ်အောင်လို့ ရည်ရွယ်ပါတယ်” ဟု (MAP) ဖောင်ဒေးရှင်းမှ မဲဆောက်တာဝန်ခံ ကိုအေးက ပြောသည်။

အခမ်းအနားကို တက်ရောက်လာသည့် မြန်မာရွှေ့ပြောင်းအလုပ်သမားများအနေဖြင့် မိမိတို့၏ အလုပ်သမားအခွင့်အရေးကို အပြည့်အဝ ရရှိပြီး တိုက်ပွဲဝင်ရဲကြရန်နှင့် မိမိတို့သည် တိုင်းပြည်နှစ်ခု၏ အကျိုးစီးပွားကို ရှာပေးနေသူများဖြစ်သည့်အတွက် ဂုဏ်ယူတတ်ဖို့လိုကြောင်း လူ့ဘောင်သစ်ဒီမိုကရက်တစ်ပါတီ တွဲဘက် အထွေထွေအတွင်းရေးမှူး ဦးငွေလင်းက တိုက်တွန်းပြောကြားခဲ့သည်။

နိုင်ငံတကာ ရွှေ့ပြောင်းအလုပ်သမားနေ့သည် ဒီဇင်ဘာ (၁၈) ရက်နေ့ ဖြစ်သော်လည်း အကြောင်းအမျိုးမျိုးကြောင့် ယနေ့မှ ပြုလုပ်ရခြင်းဖြစ်ကြောင်း ရောင်းခြည်းဦးအလုပ်သမားများအဖွဲ့ ရုံးတာဝန်ခံ မအိက ပြောသည်။

“တကယ်တမ်းက (၁၈) ရက်နေ့မှာ လုပ်ရမှာ ဖြစ်ပေမယ့် စက်ရုံတွေက ပိတ်ရက်မရှိတာကြောင့် ဒီလိုနေ့ကို ရွေးလုပ်ရတာပါ။ တချို့ကျတော့ စက်ရုံမှာ ခွင့်ယူပြီး လာကြတာဖြစ်တယ်။ တချို့က လာလို့မရဘူး။ အဲဒါကြောင့်မို့ အလုပ်သမားတွေအနေနဲ့ လာလို့ရမယ့်နေ့ကို ရွေးပြီးလုပ်တာ” ဟု သူက ပြောသည်။

နိုင်ငံတကာ ရွှေ့ပြောင်းအလုပ်သမားနေ့ကို ၂၀၀၀ ခုနှစ်မှ စတင်ကာ ကမ္ဘာ့ကုလသမဂ္ဂက အတည်ပြု သတ်မှတ်ပေးခဲ့ခြင်းဖြစ်သည်။

ဈေးပြောင်းရွှေ့ခိုင်းသည်ကို မကျေနပ်၍ ဈေးသည်များ ချီတက်တောင်းဆို

ရိုးမ ၃

ဘိုကလေးမြို့ပေါ်ရှိ အခွန်လွတ်ဈေးကို ပြောင်းရွှေ့ခိုင်းသည့်အတွက် ဈေးသည် ၁၅၀ ခန့်က မြို့နယ် အာဏာပိုင်ရုံးများဆီသို့ ယမန်နေ့က ချီတက်တောင်းဆိုခဲ့ကြသည်။

အာဏာပိုင်များဘက်က ယခုလ (၁၅) ရက်နေ့ နောက်ဆုံးထား၍ အခွန်လွတ်ဈေးများကို ပြောင်းရွှေ့ရန် အမိန့်ထုတ်ပြန်ထားခဲ့ပြီး မလိုက်နာပါက တည်ဆဲဥပဒေအရ အရေးယူမည်ဟု ကြေညာထားသည့်အတွက် ယင်းကဲ့သို့ ချီတက်တောင်းဆိုခဲ့ခြင်းဖြစ်ကြောင်း မြို့ခံတဦးက ပြောသည်။


“အရင်တုန်းက စည်ပင်သာယာက ချပေးထားတဲ့ ခွန်လွတ်ဈေးရယ်၊ နောက် ဒီဘက် ဘုန်းကြီးကျောင်းရှေ့မှာ ချပေးထားတဲ့ နေရာတွေမှာရှိတဲ့ ဈေးကို သူတို့က ဖယ်ခိုင်းတယ်။ ဒီလ (၁၁) ရက်နေ့ မှာ သူတို့က အသံချက်စက်နဲ့ လိုက်ပြီးတော့ အဲဒီနေရာကနေ ဖယ်ပေးပါ၊ မဖယ်ပေးဘူးဆိုရင် တည်ဆဲဥပဒေအရ အရေးယူမယ်ဆိုပြီးတော့ အသံချက်စက်နဲ့ လိုက်အော်ထားတာကို မကျေနပ်လို့ အခုလို ချီတက်တောင်းဆိုတာ” ဟု ပြောသည်။

ယင်းသို့ ချီတက်လာစဉ် မြို့နယ်ရဲတပ်ဖွဲ့မှူးက တည်ဆဲဥပဒေအရ အရေးယူမှာမဟုတ်ကြောင်း ပြောကာ လူစုခွဲစေခဲ့ကြောင်း ၎င်းဒေသခံက ဆက်ပြောသည်။

“အမျိုးသမီးတွေက စုပြီးတော့ ကွတ်ကဲရေးရုံးကို သွားကြတယ်၊ ကွတ်ကဲရေးရုံးကို သွားတဲ့အခါ လူကြီးက မရောက်သေးတော့ (မယက)ရုံးဘက်ကို ဆက်သွားတဲ့အချိန် လမ်းထိပ်မှာ ရဲတပ်ဖွဲ့တွေက တားထားတယ်၊ မြို့နယ်မှူးနဲ့ စခန်းမှူးတို့က မေးတာ၊ မင်းတို့ ဘာလုပ်မလဲပေါ့၊ ဈေးသည်တွေက ကျမတို့ ဈေးသည်နေရာ တည်မြဲရေး၊ ဈေးရောင်းရရေးအတွက် လူကြီးတွေကို အသနားခံဖို့၊ တင်ပြဖို့ ကျမတို့ လာတာပါလို့ ပြောတယ်။ ပြောရင်းနဲ့ သူတို့ကနေပြီးတော့ နောက် (၁၅) ရက်အတွင်းမှာ သူတို့ ထုတ်ပြန်ထားတဲ့ တည်ဆဲဥပဒေအရ သူတို့က အရေးယူမပေးပါဘူးလို့ ပြောပြီး ပြန်လွှတ်လိုက်တာ” ဟု ပြောသည်။

ထို့ကဲ့သို့ ဈေးသည်များ ချီတက်တောင်းဆိုမှုနှင့်ပတ်သက်၍ ဒေသအာဏာပိုင်များက စုံစမ်းစစ်ဆေးမှုများ ပြုလုပ်နေလျက်ရှိကြောင်း ၎င်းက ပြောသည်။

ဘိုကလေးမြို့ပေါ်တွင် ပျံကျဈေး ၄ ခုရှိပြီး ပြီးခဲ့သည့် လဆန်းပိုင်းကတည်းက ဈေးပြန်လည်နေရာချထားရေး အဖွဲ့က လူသွားလူလာနည်းပါးသည့် မြို့သောက်သုံးရေးကန်တော်ကြီးဘေးတွင် နေရာချပေးခဲ့သည့်အတွက် ဈေးသည်များ ထောင်နှင့်ချီကာ အခက်အခဲ ကြုံတွေ့နေရလျက်ရှိသည်။

ရွှေဂုံတိုင်ကို အားမဖြည့်ဘဲ မျှော်မြဲမျှော်နေရင် မျှော်သူမောမယ်

တူမောင်ညို

အကြောင်းမပြန်ဘူး၊ အကြောင်းမပြန်ဘူးနဲ့ (နအဖ) ဥက္ကဋ္ဌထံ နိုဝင်ဘာ (၁၁) ရက် နေ့စွဲဖြင့် ဒေါ်အောင်ဆန်းစုကြည် ပေးစာကို ဒီဇင်ဘာ(၉) ရက်နေ့ မြန်မာ့အလင်းသတင်းစာမှာ ဖော်ပြတဲ့ “ချမ်းမြအေး” ရဲ့ “စိတ်ရင်းစေတနာ မှန်ပြီး ရိုးသားမယ်ဆိုရင်” ဆောင်းပါးကနေတဆင့် ကြောင်းပြန်လိုက်ပါပြီ။

ပထမဆုံးပြောချင်တာက ဆောင်းပါးရှင် “ချမ်းမြအေး” ဟာ “နေမျိုးဝေ” လေနဲ့ အတော်ကြီးတူနေတာပါပဲ။ ဒီ့မတိုင်ခင်က ဒေါ်အောင်ဆန်းစုကြည်ရဲ့ “နိုဝင်ဘာ (၁၁) ပေးစာ” နဲ့ပတ်သက်ပြီး အင်တာနက်ကနေတဆင့် နေမျိုးဝေ ရေးတာကို ဖတ်လိုက်ရလို့ပါ။ လေကတော့ သိတဲ့အတိုင်းပဲ အထက်စီးကနေ ပြောတဲ့ “အချိုးပြင်” ဆိုတဲ့ လေပေါ့။


“အကြွင်းမဲ့ ကျွန်ဇာတ်သွင်းရေး ကျောင်းတော်သားအဖွဲ့” ကလည်း ဒေါ်အောင်ဆန်းစုကြည်ရဲ့ တွေ့ဆုံဆွေးနွေးရေး တောင်းဆိုမှုဟာ အမေရိကန်အလိုကျ သဘောဆောင်ပြီး မဟာဗျူဟာမပြောင်း၊ နည်းဗျူဟာပြောင်းကစားခြင်းသာ ဖြစ်တယ်လို့ ခံယူပါတယ်တဲ့။

မြန်မာနိုင်ငံရဲ့ ပကတိအရှိတရား (Reality) “လမ်းစဉ် (၇) ရပ် အောင်မြင်ရေး” ကို အခြေမခံဘဲ အနောက်ဒီမိုကရေစီပုံစံကို ဇွတ်အတင်း ပုံဖော်လျှင် မမျှော်လင့်သော နောက်ဆက်တွဲ ဒုက္ခဆိုးကျိုးများ ပေါ်ပေါက်လာမည့် အနေအထား၊ အမေရိကန်အစိုးရနှင့် ဒေါ်အောင်ဆန်းစုကြည်တို့၏ ရည်ရွယ်ချက်၊ သဘောထားအဖုံဖုံကို ပြည်သူများ သိရှိအောင် ကျွန်ုပ်တို့မှ ရှင်းလင်းဆွေးနွေးသွားမယ်တဲ့။

ဒုတိယပြောချင်တာကတော့ (နအဖ) စစ်အစိုးရဟာ “တွေ့ဆုံဆွေးနွေးရေး” နဲ့ ပတ်သက်လာရင် ဒေါ်အောင်ဆန်းစုကြည်က ဖိတ်ခေါ်တာပဲဖြစ်ဖြစ်၊ (NLD) က ကမ်းလှမ်းတာပဲဖြစ်ဖြစ်၊ ဝါရင့်နိုင်ငံရေးလုပ်ဖေါ်ကိုင်ဖက်များ ပန်ကြားတာပဲဖြစ်ဖြစ်၊ ပြည်တွင်းပြည်ပ အဆိုပြုတာပဲဖြစ်ဖြစ် အကြောင်းအမျိုးမျိုးပြပြီး ပယ်ချလိုက်တာပဲဖြစ်ပါတယ်။

ဒီလို ပယ်ချတဲ့အခါတိုင်းမှာလည်း တိုက်ရိုက်ပြန်ကြားတာမလုပ်ဘဲ သူတို့မွေးထားတဲ့ မျောက်တွေကတဆင့် ပြန်ကြားလေ့ရှိတာပါပဲ။

ဘယ်လိုပဲပြန်ကြားသည်ဖြစ်ပါစေ အနှစ်သာရကတော့ ကမ်းလှမ်းအဆိုပြုသူတွေကို တစ်ဖက်သတ် အပြစ်ပုံချတာတွေ လုပ်ပြီး၊ ဆင်ခြေလိမ်တွေ တောင်စဉ်ရေမရပြပြီး “တွေ့ဆုံဆွေးနွေးရေး” ကို ပယ်ချတာပါပဲ။

ပြောရရင် (NLD)က ပြောခဲ့ဖူးတဲ့ (နအဖ) စစ်အစိုးရမှာ Political Will မရှိဘူးဆိုတဲ့ စကားနဲ့ ဒက်ထိကွက်တိပါပဲ။

ဒါပေမယ့် ခက်နေပြန်တာက အဲဒီလိုအကဲဖြတ်ခဲ့တဲ့ (NLD) ကိုယ်တိုင်ကပဲ “ရွှေဂုံတိုင်ကြေညာစာတမ်း” ကို အသက်ဝင်လှုပ်ရှား အားပါလာအောင် လက်တွေ့ကျတဲ့ အလုပ်တွေလုပ်တာ ဒီကနေ့အထိ မတွေ့ရသေးဘဲ “လာနိုးငယ်မျှော်နေ”တာဖြစ်ပါတယ်။

အခုလည်း ကပ်ပြောမယ်ဆိုရင် “ဗိုလ်ချုပ်မှူးကြီးက တရားဝင် မပြန်ကြားသေးဘူး” လို့ ပြောလို့ရတာပဲမဟုတ်ပါလား။

ဗိုလ်ချုပ်မှူးကြီးကတော့ တရားဝင်ပြန်ကြားလိမ့်မယ်လို့ ကျနော်တို့မထင်ပါ။ အကြောင်းပြန်မှာလည်း မဟုတ်ပါဘူး။

ဆက်ဆံရေးဝန်ကြီး ဦးအောင်ကြည်ကို တပြိုင်နက် ပွဲထွက်ခိုင်းထားတာကလည်း ပြည်တွင်းပြည်ပက “မောင်မောင်မခေါ်ခင် ဗျာထူးချင်သူတွေ” ကို ယုန်ထင်ကြောင်ထင်ဖြစ်အောင်နဲ့ လှည်းစားဖို့၊ အချိန်ဆွဲဖို့သက်သက်သာ ဖြစ်ပါတယ်။

ဒီလိုနဲ့ ရက်ကိုလစားပြီး နှစ်တို့ရှည်လျားခဲ့ပါပြီ။ ၂၀၁၀ ကို ရောက်ဖို့ ရက်ပိုင်းပဲလိုပါတော့တယ်။

(နအဖ) စစ်အစိုးရလိုချင်တာက စီးပွားရေးပိတ်ဆို့မှု ဖယ်ရှားရေးကိစ္စသက်သက်သာ ဖြစ်ပါတယ်။ တည်ရှိနေတဲ့ နိုင်ငံရေးပြဿနာတွေကို နိုင်ငံရေးအရ တန်းတူရည်တူ တွေ့ဆုံဆွေးနွေးဖို့ မဟုတ်ပါဘူး။

တကယ်ဆွေးနွေးရမယ့် ပြဿနာတွေက နိုင်ငံရေးအကျဉ်းသားများအားလုံး ခြွင်းချက်မရှိ အမြန်ဆုံး ပြန်လွှတ်ပေးရေးနဲ့ ဖွဲ့စည်းပုံ အခြေခံဥပဒေ ၂၀၀၈ ပြန်လည်သုံးသပ် ပြင်ဆင်ရေးကိစ္စတွေသာ ဖြစ်ပါတယ်။ ဒီကိစ္စတွေကို (နအဖ) စစ်အစိုးရ မတို့ဝံ့၊ မထိဝံ့တာကလည်း ထင်ရှားတဲ့ သာဓကတစ်ခုပဲ မဟုတ်ပါလား။

အခုတော့ (နအဖ)စစ်အစိုးရက ဒေါ်အောင်ဆန်းစုကြည်စာပါ အကြောင်းအရာနဲ့ အနှစ်သာရကိစ္စတွေကို မပြောဘဲ စာပေးပုံပေးနည်းကို ရမယ်ရှာပြီး ယိုးမယ်ဖွဲ့နေပါတယ်။ မလာချင်လို့သာလျှင် ခရီးဝေးနေတာဖြစ်ပါတယ်။

ဒါ့အပြင် (နအဖ)စစ်အစိုးရနဲ့ ပြည်သူဟာ မိဘနဲ့သားသမီးမဟုတ်ပါဘူး။

(နအဖ) စစ်အစိုးရဟာ ရက်စက်ကြမ်းကြုတ်တဲ့ ဖိနှိပ်အုပ်စိုးသူ ဖြစ်ပါတယ်။ စစ်အာဏာရှင်စနစ်ကို ပီပီပြင်ပြင် ကျင့်သုံးနေတဲ့ စစ်အာဏာရှင်အစိုးရဖြစ်ပါတယ်။

(နအဖ) စစ်အစိုးရဟာ ရေ၊ မီး၊ မင်း၊ ခိုးသူ၊ မချစ်မနှစ်သက်သောသူ ဆိုတဲ့ ရန်သူမျိုးငါးပါးထဲက အသင်းဝင်စာရင်းဝင်သာ ဖြစ်ပါကြောင်း။ စစ်အုပ်စု၊ စစ်ဗျူရိုကရေစီယန္တယား၊ စစ်အာဏာရှင်စနစ်ကို အကုန်အစင် တိုက်ဖျက်ပစ်ရမည်သာဖြစ်ပါတယ်။
× × × × ×

တူမောင်ညို
(၂၀၀၉ ခုနှစ်၊ ဒီဇင်ဘာ ၉ ရက်)

လူ့အခွင့်အရေးအခမ်းအနားကို အာဏာပိုင်များခွင့်မပြု၍ လူစုခွဲလိုက်ရ

ဖြိုးကြီး

၆၁ နှစ်မြောက် အပြည်ပြည်ဆိုင်ရာလူ့အခွင့်အရေးနေ့ အခမ်းအနားကို အာဏာပိုင်များ ခွင့်မပြုသည့်အတွက် လူစုခွဲလိုက်ရကြောင်း လူ့အခွင့်အရေးလှုပ်ရှားနေသူတဦးက ပြောသည်။

ယနေ့နံနက်ပိုင်းက ပြည်မြို့တွင် ပြုလုပ်ရန်စီစဉ်ထားသည့် လူ့အခွင့်အရေးနေ့ အခမ်းအနားကို နယ်မြေခံ အာဏာပိုင်များက ခွင့်မပြုဘဲ အိမ်ရှင်ဖြစ်သူ ကိုမင်းမင်း (ခ) ကိုလှမင်းထွန်းကို ခေါ်ဆောင်သွားသည့်အတွက် မလုပ်ဖြစ်ကြောင်း လူ့အခွင့်အရေးကာကွယ်မြှင့်တင်သူများကွန်ယက်မှ ကိုမောင်မောင်လေးက ပြောသည်။

“ပြည်မြို့ မယက ဥက္ကဌ ဦးစိုးမြင့်ကခေါ်လို့ အိမ်ရှင် ကိုမင်းမင်းသွားတာ မနက် ၆ နာရီကတည်းက အခုချိန်ထိ ပြန်မပို့သေးပါဘူး၊ အခု ဆယ်နာရီ တိတိထိုးသွားပြီ၊ ကျနော်တို့ကလည်း ကိုမင်းမင်းမသွားခင်ကတည်းက သူပြန်လာမှ ဒီအခမ်းအနားကိစ္စကို စီစဉ်မယ်၊ အာဏာပိုင်က လုံးဝခွင့်မပြုဘူးဆိုရင်လည်း၊ ကျနော်တို့ ဇွတ်မလုပ်ဘူးလို့ ပြောပြထားတယ်၊ အဲဒီတော့ လောလောဆယ် ကြားနေတာ အထက်က ဒီကိစ္စကို ကြိုတင်အကြောင်း မကြားတဲ့အတွက် ခွင့်မပြုနိုင်ပါဘူးတဲ့ အဲဒီတော့ ဒီက ပြန်စရာရှိတဲ့ လူတွေကို ပြန်ကြဖို့ ပြောတယ်” ဟု ကိုမောင် မောင်လေးက ပြောသည်။

အဆိုပါ လူ့အခွင့်အရေးအခမ်းအနားသို့ ကိုစောဗန်ကူးအပါအဝင် ဘိုကလေး၊ ပုသိမ်မြို့များမှ လူ့အခွင့်အရေး လှုပ်ရှားတက်ကြွသူများ လာရောက်ခဲ့ကြကြောင်း ၎င်းက ဆက်ပြောသည်။

“ကျနော်နဲ့ ကိုဗန်ကူးအပါအဝင် နောက်တစ်ယောက်ရယ် ဘိုကလေးက သုံးယောက် ပြည်မြို့ကို မနေ့ညနေ ငါးနာရီခွဲမှာ ရောက်တယ်၊ ခုနစ်နာရီခွဲမှာ တည်းခိုတဲ့ အခမ်းအနားလုပ်မဲ့ အိမ်ကို ကျနော်တို့ ရောက်တဲ့ချိန်မှာ ဒေသခံက အက်စ်ပီ ဒုရဲအုပ်နှစ်ယောက်လာတယ်၊ ကျနော်တို့ နှစ်ယောက်ရဲ့ ဘိုင်အိုဂရက်ဖီကို တောင်းတော့ ပေးလိုက်ရသေးတယ်” ဟု ပြောသည်။

မြို့နယ် မယက ဥက္ကဌက ကိုမင်းမင်းအား လူ့အခွင့်အရေးနေ့ အခမ်းအနားကျင်းပခြင်းနှင့် ပတ်သက်၍ မေးမြန်းလိုသည့်အတွက် မပျက်မကွက်လာရောက်ရန် ယမန်နေ့ ည ၁ နာရီကျော်တွင် စာထုတ်အကြောင်းကြားသဖြင့် ယနေ့ နံနက်သွားရောက်တွေ့ဆုံစဉ် ယခုကဲ့သို့ ခေါ်ယူထားခြင်းဖြစ်ကြောင်း ၎င်းက ဆက်လက်ပြောသည်။

“ပုသိမ်က လာတဲ့လူ တချို့ကတော့ ကိုမင်းမင်းကို ခဏစောင့်နေပါသေးတယ်၊ သူနဲ့ အတူ လူငယ်တစ်ယောက် ပါသွားတယ်၊ ကိုငွေလင်းလို့ခေါ်တယ်၊ အဲဒီကောင်လေးကို ဖုန်းဆက်ကြည့်တဲ့ အခါ ကျနော်တို့ ဒီကပြန်မှ ကိုလှမင်းထွန်းနဲ့ သူ့ကို ပြန်ပို့ပေးမယ်လို့ ပြောပါတယ်၊ ဒါနောက်ဆုံး အခြေအနေပဲ” ဟု ကိုမောင်မောင်လေးက ဆက်လက်ပြောသည်။

ယနေ့ကျရောက်သည့် ၆၁ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့ အခမ်းအနားကို ပြည်၊ ပုသိမ်၊ ဘိုကလေးနှင့် သုံးဂွမြို့နယ်များတွင် ပြုလုပ်ရန် စီစဉ်ထားခဲ့သော်လည်း ဘိုကလေးနှင့် ပုသိမ်မြို့များတွင်သာ အောင်မြင်စွာ ကျင်းပနိုင်ခဲ့သည်။

ဘိုကလေးမြို့ပေါ်တွင် ကျင်းပသည့်ပွဲတွင် ကလေးစစ်သားအသုံးပြုမှု၊ အတင်းအဓမ္မ လုပ်အားပေးခိုင်းစေခြင်းနှင့် အမျိုးသမီးများအပေါ်ချိုးဖောက်နေသည့် လူအခွင့်အရေးအခြေအနေများကို ဆွေးနွေးခဲ့ကြောင်း တက်ရောက်ခဲ့သူ တဦးကပြောသည်။

ပုသိမ်မြို့တွင် ကျင်းပခဲ့သည့် အခမ်းအနားသို့ လူ့အခွင့်အရေးစိတ်ပါဝင်စားသူ ၃၀ ခန့် တက်ရောက်ခဲ့ကြပြီး အာဏာပိုင်များကို တရားဝင်အကြောင်းကြားကာ ပြုလုပ်ခဲ့ခြင်းဖြစ်သည်။

“ကျနော်တို့ ပုသိမ်မှာတော့အလွှာစုံနဲ့ အောင်မြင်စွာလုပ်နိုင်ခဲ့ပါတယ်၊ ပုသိမ်မြို့ အမှတ်(၈) ရပ်ကွက် အေးချမ်းသာယာရေးနဲ့ ဖွံ့ဖြိုးရေးကောင်စီအပိုင် ကျောက်စလစ်ကုန်းရပ်ကွက်မှာ လုပ်တာပါ”ဟု ပုသိမ်မြို့မှ အခမ်းအနား ဦးဆောင်ပြုလုပ်သူတဦးက ပြောသည်။

ယင်းအခမ်းအနားကို အာဏာပိုင်များဘက်မှ တစုံတရာ နှောက်ယှက်ခြင်း မရှိသော်လည်းလုံခြုံရေးအပြည့်ချထားပြီး စောင့်ကြည့်ခဲ့ကြောင်း ၎င်းကဆက် ပြောသည်။

အခမ်းအနားသို့ တက်ရောက်လာသူများကို လူ့အခွင့်အရေးကိစ္စရပ်များနှင့်ပတ်သက်၍ ဦးသက်တင်က ဦးဆောင်ဆွေးနွေးမှုများပြုလုပ်ကာ အောင်မြင်စွာ ကျင်းပနိုင်ခဲ့ကြောင်း ၎င်းက ဆက်ပြောသည်။

လူ့အခွင့်အရေး ကာကွယ်မြှင့်တင်သူများ ကွန်ယက်မှ ကြေညာချက်ထုတ်ပြန်

ရိုးမ ၃

ယနေ့ကျရောက်သည့် ၆၁ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့အထိမ်းအမှတ်အဖြစ် လူ့အခွင့်အရေး ကာကွယ်မြှင့်တင်သူများကွန်ယက်မှ ကြေညာချက် တစောင်ထုတ်ပြန်ခဲ့သည်။

ယင်းကြေညာချက်တွင် အချက်လေးချက်ပါဝင်ပြီး လူ့အခွင့်အရေးကာကွယ်မြှင့်တင်သူများကွန်ယက်အနေဖြင့် ကမ္ဘာ့ကုလသမဂ္ဂမှ အတည်ပြုပြဌာန်းထားသည့် လူ့အခွင့်အရေးကြေညာစာတမ်းများကို အလေးအနက်ယုံကြည် ကျင့်သုံးနေသူများဖြစ်ကြောင်းကိုလည်း ထည့်သွင်းဖော်ပြထားသည်။

လူ့အခွင့်အရေးကာကွယ်မြှင့်တင်သူများကွန်ယက်အနေဖြင့် (၁) နိုင်ငံသူ/သားများအား အာဆီယံပဋိဥာည်စာတမ်းပါ အခြေခံလူ့အခွင့်အရေးများ၊ လွတ်လပ်ခွင့်များကို အမှန်တကယ် ပိုမိုမြှင့်တင်ကာကွယ် ဆောင်ရွက်ခွင့်ပြုရန်၊ (၂) အခြေခံလူ့အခွင့်အရေးနှင့်လွတ်လပ်ခွင့်များအား ထိန်းချုပ်ကန့်သတ်ရန် ပြဌာန်းထားသည့်ဥပဒေ အမိန့်များအား ပြန်လည်ရုတ်သိမ်းပေးရန်၊ (၃) လက်ရှိအာဏာရယူထားသည့် အစိုးရနှင့် နိုင်ငံရေးပါတီများ၊ နိုင်ငံရေးအင်အားစုများ၊ တိုင်းရင်းသားအင်အားစုများ အားလုံးတို့သည် ဒီမိုကရေစီစနစ်သို့ ချဉ်းကပ်ရာတွင် ဆောင်ရွက်ခဲ့၊ ဆောင်ရွက်ဆဲ၊ ဆောင်ရွက်ရန် ကိစ္စအရပ်ရပ်တွင် အပြည်ပြည်ဆိုင်ရာ လူ့အခွင့်အရေးကြေညာစာတမ်းပါအချက်များအပေါ်တွင် အခြေခံပြီးဆောင်ရွက်ရန်၊ (၄)လူ့အခွင့်အရေးတွက် လှုပ်ရှားဆောင်ရွက်သူများနှင့် နိုင်ငံရေးယုံကြည်မှုအရ လှုပ်ရှားဆောင်ရွက်သဖြင့် အကျဉ်းကျခံထားရသူများအား ချွင်းချက်မရှိ ပြန်လည်လွှတ်ပေးရန်တို့ကို ထည့်သွင်းရေးသားဖော်ပြထားသည်။

ဒီမိုကရေစီစနစ်၏ အခြေခံအုတ်မြစ်များဖြစ်သည့် လူ့အခွင့်အရေးများနှင့် လွတ်လပ်ခွင့်များကို လိုက်နာကျင့်သုံးရန်လိုအပ်ကြောင်း ၎င်းကြေညာချက်တွင် ဆက်လက်ဖော်ပြထားသည်။

၆၁ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့ အခမ်းအနားကို ဧရာဝတီတိုင်း၊ ပုသိမ်မြို့နှင့် ဘိုကလေးမြို့တို့တွင် အောင်မြင်စွာ ကျင်းပပြုလုပ်နိုင်ခဲ့ပြီး ပဲခူးတိုင်း၊ ပြည်မြို့တွင် ပြုလုပ်ရန်စီစဉ်ထားသော်လည်း အာဏာပိုင်များက ခွင့်မပြုသည့်အပြင် အခမ်းအနားဖြစ်မြောက်ရေးအတွက် ဦးဆောင်သူ ကိုမင်းမင်းကို မယက ရုံးသို့ ခေါ်ယူကာ ဆွေးနွေးမှုများပြုလုပ်ခဲ့သည်။

ဈေးရောင်းပွဲတော်ပြုလုပ်ခြင်းကို ဒေသခံများမကျေနပ်

ဉာဏ်မောင်

စီးပွားရေးသမားများက တိုင်းအာဏာပိုင်များနှင့်ပေါင်း၍ ဈေးရောင်းပွဲတော်များ ပြုလုပ်ကိုယ်ကျိုးရှာနေခြင်းကြောင့် ရပ်ကွက်အတွင်း နေထိုင်သူများ မကျေမနပ် ဖြစ်နေကြသည်။

ပုသိမ်မြို့၊ ကမ်းနားလမ်းတလျှောက်ကို ပိတ်၍ ယခု ၃ ရက်နေ့မှ စတင်ကာ ဈေးရောင်းပွဲတော် ပြုလုပ်နေသည့်အတွက် လမ်းပိတ်ဆို့မှုများဖြစ်ပြီး သွားလာရေးအခက်ခဲများ ဖြစ်နေကြောင်း ရပ်ကွက်အတွင်း နေထိုင်သူတဦးက ပြောသည်။

“အဲဒါက လုပ်ငန်းရှင်တဦးက ကန်ထရိုက်ယူပြီးတော့ လေလံသဘောမျိုးနဲ့ ပေးလိုက်ပြီးလုပ်တာ၊ (တယက) ဥက္ကဌကို သိန်း ၅၀ ပေးလိုက်တာ၊ စီးပွားရေးသမားတွေနဲ့ အာဏာပိုင်တွေပေါင်းပြီးလုပ်စားတာ၊ လမ်းမကြီးကို တခြမ်းပိတ်ပြီး လုပ်လိုက်တာ၊ ထုံးစံမှမရှိတာ၊ ပုသိမ်မှာ ဒါမျိုးတခါမှ မလုပ်ဖူးဘူး” ပြောသည်။

အဆိုပါ ဈေးရောင်းပွဲတော်ဆိုင်ခန်းများ နေရာချထားမှုကို တိုင်းအေးချမ်းသာယာရေးနှင့်ဖွံ့ဖြိုးရေးကောင်စီရုံးမှ ဝန်ထမ်းများကိုယ်တိုင်လာရောက်၍ မြေနေရာများ တိုင်းပြီးချပေးသွားခြင်းဖြစ်ကြောင်း ၎င်းက ဆက်ပြောသည်။

“တကယ်က ဈေးရောင်းပွဲတော်ဆိုတာ အမြို့မြို့အနယ်နယ်မှာ ကွင်းထဲမှာဘဲလုပ်ကြတာ၊ ဒီနေရာမှာလုပ်တာ စဉ်းစားစရာပေ့ါ၊ ဘာကြောင့် ဒီနေရာကိုမှ ရွေးတယ်ဆိုတာ မသိဘူး၊ စတိတ်ရှိုးတွေလုပ်တော့ လူနေအိမ်တွေ ရှေ့မှာဆိုတော့ ဘယ်သူမှလဲ အိပ်မရဘူး၊ မြို့လယ်ကြီးမှာ ရွက်ဖျင်တွေထိုး အဝတ်စုတ်တွေကာနဲ့ ကွမ်းယာဆိုင်တွေဖွင့် ဆိုက်ကားတွေကလည်း ပိတ်နေတော့ ကိုယ့်အိမ်ကိုယ် ဘယ်လိုပြန်တက်ရမလဲ ဆိုတာတောင် မသိတော့ဘူး” ဟု အဆိုပါ ရပ်ကွက်သားက ဆက်ပြောသည်။

ယင်း ဈေးရောင်းပွဲတော်မှာ ၉ ရက်နေ့ညက ပြီးဆုံးသွားသော်လည်း ညဈေးတန်း ဆက်လက်ဖွင့်မည်ဟု သတင်းများ ထွက်ပေါ်နေသည့်အတွက် ရပ်ကွက်အတွင်း နေထိုင်သူများမှာ မကျေမနပ်ဖြစ်နေကြောင်း ၎င်းက ဆက်ပြောသည်။

အမေ လေးဆယ့်ခြောက်

လင်ကွန်းရဲ့အမေ
သခင်အောင်ဆန်းရဲ့အမေ
ထူးအိမ်သင်းရဲ့အမေ
နေဇာမျိုးဝင်းရဲ့အမေ
အမေတွေဆိုတာက ဘယ်လိုသားကိုမဆို
တိုင်းပြည်ဖျက်ဖို့ မွေးခဲ့တာမဟုတ်
တိုင်းပြည်ကောင်းဖို့ မွေးခဲ့ကြတာပဲဖြစ်တယ်။

အရပ်သားရဲ့အမေ
ဘုရားသားရဲ့အမေ
တိုင်းရင်းသားရဲ့အမေ
ကျောင်းသားရဲ့အမေ
ရဲသားရဲ့အမေ
သံလမ်းလုပ်သားရဲ့အမေ
လယ်သမားရဲ့အမေ
စစ်သားရဲ့အမေ
သားအားလုံးရဲ့အမေ
အမေတိုင်းက သားအတွက်ဆို
ရင်ဘတ်တခြမ်း အပုတ်ခံမယ်
ကောင်းကင်က ကြယ်တစ်လုံးကို သားနံမည်ထိုးဖို့
ခေါင်းထဲက ဦးနှောက်ကိုထုတ်ပြီး အသုံးချမယ်
သားအတွက်ဆို အမေဟာ
အရဲရင့်ဆုံးနဲ့ အကြောက်တတ်ဆုံး “သူရဲကောင်းဖြစ်တယ်”။

ဒါပေမဲ့ အမေရယ်
တစ်ခုတော့ အကြံပေးချင်တယ်
သားတွေကို “ဆရာကောင်း” ရွေးပေးစေချင်တယ်
ဆရာမကောင်းရင်
တိုင်းပြည်မှာ အမျိုး၊ ဘာသာ၊ သာသနာ၊ ပညာ၊ ဥစ္စာ ညောင်းရမယ်
အမေ့မျက်စိရှေ့မှာ မြင်နေတယ်၊ မြင်တယ်၊ မြင်ရမယ်
အမေနဲ့သား ရင်တစ်ခွင်မှာ အောင်မြင်သွားပါစေ
မေတ္တာတွေပွား လွတ်လပ်ခြင်းတရားနဲ့ ပေါင်းဆုံကြပါစေ။ ။

× × ×


ဒေါ်လှလှဝင်း (ခ) ဒေါ်ယမင်း မွေးနေ့သို့ …
စောဝေ
(ရမည်းသင်းထောင်သား)
(20-Aug-2009)

အသက်မပြည့်သည့် ကလေးကို စစ်တပ်မှပြန်ခေါ်လိုကြောင်း မိဘများက သက်ဆိုင်ရာအဖွဲ့အစည်းများထံ တင်ပြထား

ရိုးမ ၃
အသက်မပြည့်သေးသည့်ကလေးငယ်တဦးအား တပ်မှ ပြန်လည်ခေါ်ယူလိုသည့်အတွက် မိဘများက သက်ဆိုင်ရာ အစိုးရအာဏာပိုင်များနှင့် ဒေသတွင်းရှိ နိုင်ငံတကာအဖွဲ့အစည်းများထံ တင်ပြတောင်းဆိုထားသည်။

ရန်ကုန်တိုင်း၊ ရွှေပြည်သာမြို့နယ် အမှတ် (ဒ/ ၁၇) ရပ်ကွက် တပင်ရွှေထီးလမ်းနေ ဦးမြင့်ရွှေ၊ ဒေါ်မြ သန္တာတို့၏ သားဖြစ်သူ မောင်ချစ်ကိုဦးအား ပြန်လိုခေါ်ယူလိုသည့်အတွက် မိဘများက အစိုးရဌာနဆိုင်ရာရုံးများ၊ ကမ္ဘာ့ကုလသမဂ္ဂဆိုင်ရာအဖွဲ့အစည်းများနှင့် အပြည်ပြည်ဆိုင်ရာအလုပ်သမားအဖွဲ့ချုပ်( ILO) သို့ တင်ပြထားခြင်းဖြစ်သည်။

မောင်ချစ်ကိုဦးသည် ယခုနှစ် (၉)လပိုင်း ၁၁ ရက်နေ့တွင် သထုံအမှတ် (၉)အခြေခံစစ်သင်တန်းကျောင်း (ဇရစ်ချောင်)မှ သင်တန်းဆင်းပြီး ဘားအံတပ်မ (၂၂) လက်အောက် ခမရ (၂၀၃)တွင် တာဝန်ထမ်းဆောင်နေလျှက်ရှိသည်။

ယင်းကဲ့သို့ မောင်ချစ်ကိုဦးအား တပ်မှပြန်လည်ခေါ်ယူနိုင်ရန်အတွက် မိဘများက ဦးခင်မောင်ကြည်၊ ဦးမောင်မောင်လေး၊ ဦးသန့်ဇင်ဦးနှင့် မထိုက်ထိုက်စိုးတို့အား လွှဲအပ်အကူညီတောင်းခံထားလျှက်ရှိသည်။

မောင်ချစ်ကိုဦး၏ မွေးသက္ကရာဇ်မှာ ၆၊ ၁၂၊ ၁၉၉၃ ခုနှစ်ဖြစ်ပြီး ၂၀၀၈-၂၀၀၉ ပညာသင်နှစ်တွင် ရွှေပြည်သာမြို့အမှတ် (၂) အခြေခံပညာအထက်တန်းကျောင်းမှ နဝမတန်းအောင်မြင်ခဲ့သူဖြစ်သည်။

စစ်အစိုးရက ယခုလ ၇ ရက်နေ့တွင် အရွယ်မရောက်သေးသည့် ကလေးငယ်များ စစ်မှုထမ်းခြင်းမှ ကြိုတင်ကာကွယ်ရေး အသိပညာပေးသင်တန်း အမှတ်စဉ် (၃/၂၀၀၉) ကို ဖွင့်လှစ်ခဲ့သည်။

ယင်းကဲ့သို့ သင်တန်းများဖွင့်လှစ်နေသော်လည်း အရွယ်မရောက်သေးသည့် ကလေးငယ်အမြောက်အများမှာ ကလေးစစ်သားအဖြစ် စုဆောင်းခံနေရလျှက်ရှိသည်။

အထက်အာဏာပိုင်များကို ငွေပေး၍ လောင်းကစားလုပ်ငန်းများကို ဆက်လက်လုပ်ကိုင်နေ

ဖြိုးကြီး

မြို့နယ်ရဲတပ်ဖွဲ့က လောင်းကစားဒိုင်များထံမှ ငွေတောင်း၍ တိုင်းအဆင့်အာဏာပိုင်များ ပေးလိုက်သည့်အတွက် မြို့ပေါ်ရှိ လောင်းကစားဒိုင်ချုပ်များမှာ ယခင်အတိုင်း ဆက်လက်လုပ်ကိုင်နေလျှက်ရှိသည်။

ဧရာဝတီတိုင်း၊ ဘိုကလေးမြို့ပေါ်ရှိ နယ်မြေခံရဲတပ်ဖွဲ့က လောင်းကစားဒိုင်ချုပ်များထံမှ ငွေသိန်း (၅၀) တောင်းယူကာ လာရောက်စစ်ဆေးသည့်အဖွဲ့ကို ပေးလိုက်သည့်အတွက် အဖမ်းအဆီများမရှိတော့ကြောင်း ဒေသခံတဦးက ပြောသည်။

“ဆန်းမစ်လ္ဘက်ရည်ဆိုင်က ကျော်စွာ၊ စခန်းမှူးအောင်မိုး၊ အောင်သပြေ(၈) ရပ်ကွက်က အကျိန်း(မိုးပျံ)၊ ဝင်းကြည်၊ ဇော်ဝင်း၊ နယ်ထိန်းဒုရဲအုပ် ငြိမ်းဇော်မင်း၊ သံချောင်း၊ အောင်တံခွန်ပုံနှိပ်တိုက်၊ ရွှေဘရယ် နောက်တော့ အမှတ်(၃) နယ်ထိန်းအောင်ဇော်မင်းတို့က ပေါင်းပြီး အထက်ကလာစစ်တဲ့အဖွဲ့ကို ပေးလိုက်တော့ အဖမ်းအဆီးမရှိအောင် စစ်ဆေးသွားတာ” ဟု ဒေသခံက ပြောသည်။

ဘိုကလေးမြို့ပေါ်တွင် အငြိမ်းစားရဲဝန်ထမ်းများ၊ ရဲတပ်ဖွဲ့ဝင်များက နှစ်လုံး၊ သုံးလုံး (ချဲ) လောင်းကစားလုပ်ငန်းကို ကျယ်ကျယ်ပြန့်ပြန့် ဆက်လက်လုပ်ကိုင်နေကြောင်း အဆိုပါဒေသခံက ပြောသည်။

“အထက်လူကြီးဆိုတာ ပါးစပ်ပါတာဘဲ၊ အဲဒီအတွက်လာရင် ပေးလိုက်ရင်ပြီးသွားတာဘဲဆိုပြီး ရဲတပ်ဖွဲ့ဝင်တွေ ကိုယ်တိုင်က ပြောနေတာ၊ တကယ်တမ်းကြတော့ ဒိုင်ချုပ်တွေ တယောက်မှ မဖမ်းဘဲ ကော်မရှင်နဲ့ ရောင်းတဲ့ လက်ခွဲတွေတော့ အဖမ်းပြပြီး ခေါ်သွားတာ” ဟု ပြောသည်။

ယင်းကဲ့သို့ အထက်အာဏာပိုင်များလာရောက် စစ်ဆေးစဉ် တရပ်ကွက်လျှင်(၄)ဦးနှုန်းဖြင့် လက်ခွဲရောင်း သူများကို ဖမ်းဆီးသွားပြီး အမှတ်(၆)ရပ်ကွက်မှ မျောက်ခေါင်း ဆိုသူကိုလည်း လောင်းကစားလုပ်ငန်းနှင့် ပတ်သက်ခြင်းမရှိဘဲ ဖမ်းသွားကြောင်း ဒေသခံက ဆက်ပြောသည်။

ထို့အပြင် အထက(၁) တွင် နဝမတန်းတက်ရောက်နေသည့် မြို့နယ် မယက ဥက္ကဌ ဦးစိုးသိန်း၏ သားဖြစ်သူ မှာလည်း မူးယစ်ဆေးဝါးနှင့်စိတ်ကြွဆေးများသုံးစွဲပြီး ကျောင်းအတွင်း ခိုက်ရန်ဖြစ်ပွားနေခြင်းကိုလည်း သက်ဆိုင်ရာ အာဏာပိုင်များက တစုံတရာအရေးမယူကြောင်း ကျောင်းသားမိဘတဦးက ပြောသည်။

“လူကြီးသားသမီးတွေ ဒီလိုဖြစ်တာကို ကျောင်းအုပ် အုန်းကြိုင်နဲ့ အမျိုးသမီးရေးရာက အမာနီတို့က ကာကွယ်ပေးထားတယ်၊ အဲဒီကလေးက ကျောင်းဆက်တက်နေတုန်းဘဲ၊ တခြားကလေးတွေအတွက် မိဘတွေက စိတ်ပူနေရတယ်” ဟု ပြောသည်။

ဘိုကလေးမြို့ပေါ်တွင် နာဂစ်မုန်တိုင်းပြီးနောက် လောင်းကစားလုပ်ငန်းနှင့် မူးယစ်ဆေးဝါးလုပ်ငန်းများကို ဒေသခံအာဏာပိုင်များကိုယ်တိုင် ပါဝင်လုပ်ကိုင်နေပြီး ဖောက်ထွင်းမှု၊ ခိုးမှုနှင့်ဒုစရိုက်မှုများ မကြာခဏဖြစ်ပွားနေလျှက်ရှိကြောင်း အဆိုပါကျောင်းသားမိဘက ဆက်ပြောသည်။

မဲဆောက်တွင် ပြုလုပ်သည့် ကမ္ဘာ့ အေအိုင်ဒီအက်စ်နေ့ ဓါတ်ပုံများ

အောက်ခြေတပ်မှူးများ ဒီမိုကရေစီလိုလား

ဗထူး

စစ်အစိုးရ ကျင်းပပြုလုပ်မည့် ရွေးကောက်ပွဲကို အောက်ခြေတပ်မှူးများ စိတ်ဝင်စားခြင်းမရှိဘဲ စစ်အာဏာရှင်စနစ်သည် မှန်ကန်ခြင်းမရှိဟု သုံးသပ်ပြောဆိုနေကြသည်။

“စားဝတ်နေရေးကိစ္စကို တပ်ကိုပဲမှီခိုနေရလို့ စိတ်သွားတိုင်း ကိုယ်မပါကြဘူး။ အပြောင်းအလဲတရပ်ဖြစ်မှ အခြားအဆင့်အတန်းများအတွက် အဆင်ပြေမှာပါ” ဟု အမည်မဖော်လိုသည့် ဒုဗိုလ်မှူးကြီးတဦးက ပြောသည်။

ရွေးကောက်ပွဲဖြစ်ပေါ်လာပါကလည်း စစ်အစိုးရသာ ရာသက်ပန် သက်တမ်းရှည်မည်ဖြစ်ပြီး ဗိုလ်မှူးကြီးနှင့် ဒုဗိုလ်မှူးကြီးအဆင့်များမှာ ထပ်ဆင့် ရာထူးတိုးမြှင့်ခြင်းမခံရသည်က တပ်တွင်း အကြပ်အတည်းအလွန်ကြီးမားနေကြောင်း ၎င်းက ဆက်ပြောသည်။

“ရွေးကောက်ပွဲက ဘယ်သူပဲနိုင်နိုင် အာဏာရှင်စနစ်ပဲဖြစ်မယ်။ ဒီမိုကရေစီပြည့်ဝအောင် ရမယ်လို့ ကျနော်တို့ မမျှော်လင့်ဘူး။ မဲသွားပေးလည်း အလကားပဲ” ဟု အဆိုပါဒုဗိုလ်မှူးကြီးက ဆက်ပြောသည်။

လက်ရှိ စစ်အစိုးရအနေဖြင့် ပြည်သူနှင့် အောက်ခြေဝန်ထမ်းများကို စားဝတ်နေရေးကိစ္စများဖြင့် လုံးချာလိုက်အောင် ဖန်တီးထားပြီး ရွေးကောက်ပွဲကို စိတ်မဝင်စားအောင် ပြုလုပ်ထားခြင်းသာဖြစ်ကြောင်း ၎င်းက သုံးသပ်ပြောသည်။

“တပ်မှာက အသက် ၆၀ ပြည့်ရင် နားရမယ်လေ။ သူတို့က တကယ်တမ်း မနားရဲပါဘူး။ ဒါကြောင့် ကျနော်တို့အဆင့်တွေ အောက်ခြေမှာ ပိတ်ဆို့နေတာ။ ဒီကိစ္စကို အားလုံးက မကျေနပ်ကြဘူး။ ရွေးကောက်ပွဲတောင် ဖြစ်ပါ့မလားလို့ စဉ်းစားမိတယ်” ဟု အဆိုပါဒုဗိုလ်မှူးကြီးက ဆက်ပြောသည်။

လာမည့် ၂၀၁၀ ရွေးကောက်ပွဲကို မေလအတွင်း ပြုလုပ်မည်ဖြစ်ကြောင်း တပ်မတော်အတွင်း သတင်းများ ထွက်ပေါ်နေလျက်ရှိသည်။

နာဂစ်ဒေသတွင် စပါးဈေးနှုန်းများ အပြောင်းအလဲဖြစ်

ရိုးမ ၃

စပါးပေါ်ချိန်ကာတွင် ဧရာဝတီတိုင်းအတွင်း စပါးဈေးနှုန်းများ မမှန်ကန်ဖြစ်သည်ဟု လယ်သမားအချို့က ပြောဆိုကြသည်။

ပေါ်ဆန်းမွေးက လေးသိန်း၊ အချွန်အုပ်စုက နှံကားပေါ့ သူက လေးသိန်းတသောင်း၊ ဈေးတွေက ဗြောင်းပြန်ဖြစ်နေတယ်။ အရင်တုန်းက အချောက မြင့်တယ်၊ အကြမ်းက နိမ့်တယ်လေ၊ အခုတော့ ဗြောင်းပြန်ပေါ့။

နာဂစ်ဖြစ်ပြီးကတည်း သုံးပုံတပုံပဲထွက်ပြီး လယ်မလုပ်နိုင်သူမြေကွက်များစွာ လွတ်ကြောင်း လယ်ဧက တသိန်းကျော်ရှိနေသည်အထဲမှ စပါးမှာ နှစ်သိန်းဝန်းကျင်စွာသာ ထွက်ရှိကြောင်း ဒေသခံ လယ်သမားက ပြောသည်။

“ဘိုကလေးမြို့နယ် တနယ်လုံး စိုက်ဧကခန့်မှန်းချက်က တသိန်း ရှစ်သောင်းလောက်ရှိမယ်။ ဒါပေမဲ့အပျက်အစီးတွေနဲ့ မစိုက်နိုင်တဲ့ ကွက်လပ်တွေကျန်တယ်။ စိုက်နိုင်တာဆိုလို့ သုံးသိန်းလောက်ပဲရှိတာ၊ ထွက်နှုန်ုးကျတာပေါ့။”

တိုင်းပြည်၏အောက်ပိုင်းဒေသတွင် ၄၀/ ၆၀ ထိစပါးအထွက်နှုန်းတိုးသော်လည်း နာဂစ်ဒဏ်ခံခဲ့ရသည့် ကျွန်းသာယာတို့ဘက်တွင် ကြွက်များဝင်ဖျက်သဖြင့် ထွက်နှုန်းကျဆင်းနေကြောင်း ၎င်းက ဆက်ပြောသည်။

“ကျွန်းသာတို့ ရွှေညောင်ကြီးတို့ကျတော့ မထွက်ဘူး၊ သက်ဆိုင်ရာကို ငွေတသိန်းခွဲပေးပြီးကြိုရောင်းရတဲ့သဘောပါ စပါးရောင်းပြီး ပြန်ဆပ်ရတာပေါ့၊ တကယ်တမ်းကျတော့ ဒီဈေးတွေက ကုန်သည်တွေထဲမှာပဲ ရတယ်။ စက်ပိုင်ရှင်များအသင်း ဘာညာပေါ့။ နောက်တခုက ဒေသကုန်သည်ကြီးတွေပေ့ါ ပုလဲပေးတွေ၊ ရွှေပေးတွေ၊ ငွေပေးတွေ၊ စက်ပေးတွေ စတဲ့ ရိက္ခာအထောက်အပံ့ပေးတွေနဲ့ ကြိုပြီးတော့ ယူထားရတာကို။ လယ်လုပ်တော့မယ်ဆိုလို့ရှိရင် ပုလဲဓါတ်မြေ့သြဇာ၊ စက်မောင်းဆီ၊ စက်မောင်းခ၊ စတဲ့ ငွေကြေးလုပ်အပ်ချက်တွေရှိတယ်လေ ငှားခက။ အဲဒါတွေကို ငွေကြိုယူလိုက်တဲ့အခါကျတော့ စပါးနဲ့ ချေလိုက်တာက များတာကို။ အဲဒါတော ရလာတဲ့ စပါးတွေကို ထိုးအပ်ရတော့တာပါပဲ။”

ငွေကြေးတတ်နိုင်သူများသာ စပါးထွက်ကိုလက်ဝါးကြီးအုပ်ထားပြီး သာမာန်လယ်သမားက အကျွေးမဆပ်နိုင်ပဲ အခြားစက်များ လက်သိပ်ရောင်းစားပြီး စားဝတ်နေရေးကို ဖြေရှင်းကြရသည်ဟု သူကပြောသည်။

“သိပ်မကြာပါဘူး၊ မတ်လအကုန်လောက်ဆိုရင် ဆန်ပြဿနာတက်မလား မပြောတတ်ဘူး၊ မတရားမှုတွေပေါ်လာ မှာပါ။ အကြွေးမဆပ်နိုင်တဲ့ လယ်သမားတွေအမှုပေါ့။”

ယူနီဖောင်းနှင့်အိမ်ပြန်ရောက်မှ စစ်သားဖြစ်နေကြောင်း မိဘများသိရ

လွန်းဒင်

အသက်မပြည့်သေးသည့် ကလေးငယ်တဦး တပ်သားအဖြစ်နှင့် အိမ်ပြန်ရောက်လာမှ မိဘများက စစ်သားအဖြစ် စုဆောင်းခံခဲ့ရကြောင်း သိရသည်။

ရန်ကုန်တိုင်း၊ ရွှေပြည်သာမြို့နယ် ဈ/၃၄ ရပ်ကွက်နေ အဖ ဦးအုန်းသန်း၏ သားဖြစ်သူ မောင်ရဲနောင်ဟိန်းသည် အစ်မဖြစ်သူနေထိုင်ရာ အလုံမြို့နယ်သို့ အလုပ်ရှာရန်သွားစဉ် စစ်သားအဖြစ်စုဆောင်းခြင်း ခံလိုက်ခြင်းဖြစ်ကြောင်း ဖခင်ဖြစ်သူက ပြောသည်။

"ကျနော်ကသူ့ကို ပိုက်ဆံ ၁၀၀ ပေးပြီးတော့ သူ့အစ်မဆီကို အလုပ်ရှာခိုင်းလိုက်တာပါ အလုံမြို့နယ်ထဲမှာပါ၊ အဲဒါ သူ့အစ်မဆီကိုလည်း မရောက်ဘူး၊ ပျောက်သွားတာ၊ နောက်မှကျနော့်ဆီကို တပ်သားအဖြစ်နဲ့ ပြန်ရောက်လာမှ တွေ့ခွင့်ရတာပါ" ဟု ဖခင်ဖြစ်သူက ပြောသည်။

မောင်ရဲနောင်ဟိန်းသည် ၂၀၀၈ ခုနှစ်၊ တလပိုင်း (၃) ရက်နေ့က စစ်သားအဖြစ် စုဆောင်းခံရပြီး ၎င်း၏အသက်မှာ (၁၆) နှစ်သာဖြစ်ကြောင်း ဖခင်ဖြစ်သူကပြောသည်။

စစ်သားအဖြစ်စုဆောင်ခံရပုံကို မောင်ရဲနောင်ဟိန်းက "သူတို့က ခေါ်သွားတယ် အလုပ်ပေးပါမယ်ဆိုပြီးတော့၊ မင်္ဂလာဒုံမှာ ခဏခေါ်ထားတယ်။ အဲဒီမှာ တပတ်လောက်နေရသေးတယ်။ ဆောက်လုပ်ရေးအင်ဂျင်နီယာ တပ်ရင်းကိုထည့်တော့ အသက်မပြည့်သေးဘူးဆိုတော့ ၀င်လို့မရသေးဘူး မင်္ဂလာဒုံ ကားဂိတ်ဘေးနားမှာ ဆက်သွယ်ရေးက တပ်ကြပ်ကြီး တယောက်ဆီကိုလွှဲပေးလိုက်တာ" ဟု ပြောသည်။

၎င်းပျောက်ဆုံးသွားစဉ် ဖခင်ဖြစ်သူက တပ်သားစုဆောင်းရေးတပ်များတွင် လိုက်လံရှာဖွေသော် မတွေ့ရှိခဲ့ရကြောင်း ဖခင်ဖြစ်သူက ဆက်ပြောသည်။

"လေးရက်လောက်နေတော့ မင်္ဂလာဒုံစုဆောင်းရေးမှာ ကျနော်တို့ သွားရှာပါတယ်။ အဲဒီမှာ အရာရှိ၊ အရာခံတွေက ကျနော်ကို လိုက်ပြပါတယ်။ ဒါပေမယ့် ကျနော်သားကို မတွေ့ခဲ့ရပါဘူး၊ အိမ်ကိုအလည်ပြန်ရောက်မှဘဲ သိရတာ" ဟု ပြောသည်။

မောင်ရဲနောင်ဟိန်းမှာ သင်တန်းဆင်းပြီးနောက် ရခိုင်ပြည်နယ်၊ အမ်းမြို့ရှိ အမှတ်(၈)အဆင့်မြင့်ဆက်သွယ်မှု တပ်ရင်းတွင် တာဝန်ထမ်းဆောင်ရင်း မှော်ဘီအခြေစိုက် အဆရ(၁)တွင် ခဏနား၍ အိမ်သို့ အပြီးပြန်လာခြင်း ဖြစ်သည်။

စစ်အစိုးရအနေဖြင့် အရွယ်မရောက်သေးသည့်ကလေးသူငယ်များ ကာကွယ်စောင့်ရှောက်ရေး ကော်မတီကို ဖွဲ့စည်းထားသော်လည်း ယခုကဲ့သို့ အသက်မပြည့်သေးသည့် ကလေးငယ်အမြောက်အများမှာ စစ်သားအဖြစ် စုဆောင်းခြင်းခံနေရသည်။

ဘူတာရုံတွင် ကလေးတစ်ယောက် စစ်သားအဖြစ် စုဆောင်းခံရ

ရိုးမ ၃

ပဲခူးတိုင်း၊ သနပ်ပင်မြို့၊ ဘုရားကြီးပိုင်း (၁၂) လမ်းတွင် နေထိုင်သော ဦးစိုးလွင်၏ သားဖြစ်သူ အသက် (၁၆) နှစ်ရှိသော မောင်ကျော်မင်းဦးသည် မန္တလေးဘူတာတွင် ဩဂုတ်လ၊ ၂၀၀၉ တွင် စစ်သားအဖြစ်စုဆောင်းခံရသည်ဟု ဖခင်ဖြစ်သူမှ ပြောသည်။

မောင်ကျော်မင်းဦးသည် ဖခင်နှင့်အတူ မန္တလေးသို့ သွားရာမှ အပြန် ခိုးခံရသော အထုပ်ကို လိုက်ရှာနေစဉ် ကလေးပျောက်သွားသည်ကို နီးစပ်ရာထမင်းဆိုင်တွင် မေးမြန်းရာ စစ်သားငါးယောက်က ခေါ်ဆောင်သွားသည်ဟု သူ၏ ဖခင်ကပြောသည်။

“မန္တလေးမှာ ၂ ရက်နေပြီးတော့ ၃ ရက်နေ့မြောက်မှာ ပြန်မလို့ ညနေ ၆ နာရီခွဲမှာ လက်မှတ်ဝယ်ပြီးတော့ မနက် ၅ နာရီ ရထားကို စီးမယ်ပေါ့။ အဲဒီမှာပဲ ပထမညက ခိုးခံရတဲ့ အထုပ်ကို လိုက်တယ်။ အထုပ်က ပြန်ရ နောက်ပိုင်းမှာ ကျနော်သားက အိပ်ပျော်နေတာပေ့ါလေ။ ပြန်လာတဲ့အခါမှာ စောင်ပျောက်သွားတယ်။ အဲဒီမှာ လက်မှတ်ဝယ်ပြီးတော့ လိုက်ရှာရင်းနဲ့ ကျနော်သားက ပျောက်သွားတယ်” ဟုပြောသည်။

၎င်း၏ ဖခင်သည် အနီးအနားက ထမင်းဆိုင်မှာ မေးကြည့်သည့်အခါ စစ်သားငါးယောက်နှင့်အတူ လက်ဖက်ရည်နှင့် မုန့်များစားသွားပြီး အဆိုပါ စစ်သားတွေနှင့်အတူ ပါသွားတယ်ဟုပြောပြီး အခု အမှတ် (၄) စစ်အခြေခံလေ့ကျင့်ရေးတပ်၊ ပင်လောင်းမြို့၊ အနော်ရထာတပ်ခွဲမှာ ရောက်ရှိနေသည်။

“ကျနော် စာရရခြင်းလိုက်သွားတယ်။ အဲဒီတပ်ကိုရောက်တော့ တပ်အဝမှာ ကျနော်ကို ဝင်ခွင့်မပြုဘူး။ ကျနော်ကို တပ်ကစောင့်တဲ့ ၂ ရစ်နဲ့ စစ်သားတယောက်က အပြင်ထွက်ပြီးတော့ စကားပြောတယ်။ ပထမမှာ ကျော်မင်းဦးဆိုတာ မရှိဘူးလို့ ပြောတယ် အဲလိုပြောပြီးတော့ ရှေ့က ဆိုင်မှာ ထိုင်စောင့်ခိုင်းတယ်။ ၅ မိနစ်လောက်ကြာမှာ သူပြန်ရောက်လာတယ်။ ဦးသားက မရှိတာမဟုတ်ဘူး ရှိတယ်။ ဒါပေမဲ့ ကျနော် ပေးတွေ့လို့မရဘူး အရာရှိတွေက ပြောထားတယ် ဧည့်တွေ လုံးဝ အခွင့်မပြုဘူးလို့၊ အဲတော့ အရှေ့လ (၁၂) လပိုင်း၊ (၁၅) ရက်နေ့မှာ သူတို့ သင်တန်းဆင်းမယ် အဲဒီအခါကျမှ ကျနော်ကို လာတွေ့ပါလို့ ပြောတယ်” ဟု ဖခင်ဖြစ်သူမှ ပြောသည်။

လမ်းပြကြယ်အဖွဲ့မှ ဦးနိုင်မင်းကြည်ကလည်း အသက်မပြည့်သေးတဲ့ ကလေးစစ်သားနှင့် ပတ်သက်ပြီးတော့ တပ်မတော်အက်ဥပဒေကို အခုလို ပြောပါတယ်။

“တပ်မတော်အက်ဥပဒေ ၁၉၅၉ ခုနှစ်၊ စက်တင်ဘာလ တပ်မတော်အက်ဥပဒေ ပုဒ်မ ၆၅ အရ တပ်မတော်သားထဲဝင်မယ်ဆိုရင် အသက် (၁၈) နှစ်ပြည့်ပြီးတော့မှ မိဘအုပ်ထိန်းသူ သဘောတူမှ ဝင်ရမယ်လေ၊ ကျန်းမာရေးလည်း ကောင်းရမယ်လေ။ တပ်မတော် အက်ဥပဒေနဲ့ ပတ်သက်ပြီးတော့ အခုကလေးစစ်သားတွေ မရှိသင့်တဲ့ ကိစ္စနဲ့ ပတ်သက်၍ အက်ဥပဒေကို လိုက်နာဖို့။” ဟု ပြောသည်။

ဖတ်မိမှတ်မိသမျှ ဥပဒေအပိုင်းအစများ (၉)

စောကျော်ကျော်မင်း

ကိုဖိုးဖြူအနေဖြင့် ဥပဒေပိုင်းဆိုင်ရာ ပြဿနာများကို အလေးပေး၍ ပြန်လှန်စစ်ဆေးခြင်းဖြစ်သည်။ တရားရုံး၏ အဝင်ပေါက်ဝတွင်လည်း ကိုတင်ဝင်း၊ ကိုညီညီမင်းတို့၏ မိသားစုများအပြင် အမှုစစ်ဆေးသည်ကို လာရောက်နားထောင်ကြသော ကိုတင်ဝင်း၊ ကိုညီညီမင်းတို့အား လာရောက်အားပေးကြသော အဖွဲ့ချုပ်အဖွဲ့ဝင်များအပြင် အာဏာပိုင်တို့မှ စေခိုင်းထားသည် အရပ်ဝတ် စွမ်းအားရှင်နှင့် ကြံ့ဖွံ့များ၊ ထောက်လှမ်းရေးများဖြင့် ပြည့်ကျပ်လျက်ရှိသည်။

ကိုဖိုးဖြူ၏ ပြန်လှန်စစ်မေးချက်များအရ ကိုတင်ဝင်းနှင့် ကိုညီညီမင်းတို့ကို ဥပဒေနှင့် ညီညွတ်မှုမရှိဘဲ ဖမ်းဆီးချုပ်နှောင်ခဲ့ခြင်းဖြစ်ကြောင်း ပေါ်ပေါက်လေသည်။

ကိုဖိုးဖြူမေးမြန်းသည့် ပြန်လှန်မေးခွန်းများမှာ “ရုံးရှေ့စွပ်စွဲခံရသူများဖြစ်ကြသည့် ကိုတင်ဝင်းနှင့် ကိုညီညီမင်းတို့အား စတင်ဖမ်းဆီးခဲ့စဉ်က ဝရမ်းပြသဖမ်းဆီးခဲ့ပါသလား ”ဟု မေးမြန်းခဲ့ရာတွင် တရားလိုမှ “ဝရမ်းပြသ ဖမ်းဆီးခြင်းမဟုတ်” ဟု ဖြေဆိုလေသည်။ ထို့ကြောင့် ဆက်လက်မေးမြန်းရန် မေးခွန်းများ ထင်ထင်ရှားရှား ပေါ်ပေါက်လာပေတော့သည်။

“ပြစ်မှုဥပဒေပုဒ်မ (၅၀၅) သည် ရဲအရေးမပိုင်သည့် ပုဒ်မဖြစ်သည်ကို သိပါသလား” ဆိုသည့် မေးခွန်း၊ “ထိုကဲ့သို့ ရဲအရေးမပိုင်သည့် ပုဒ်မဖြင့် တရားစွဲဆိုလိုလျှင် ရဲလက်စွဲဥပဒေ အပိုဒ် (၁၄၅၄) တွင် ဖေါ်ပြထားသည့်အတိုင်း တရားရုံးတွင် ပထမဦးစွာ ဦးတိုက်လျှောက်ထားရမည်ကို သိပါသလား” ဆိုသည့် မေးခွန်း စသည့်မေးခွန်းများကို မေးမြန်းခဲ့ရာ တရားလိုသက်သေများအနေဖြင့် ကိုတင်ဝင်းနှင့် ကိုညီညီမင်းတို့အား စတင်ဖမ်းဆီးသည့်အချိန်တွင် ရဲအရေးပိုင်သည့် ပုဒ်မများနှင့် ဖမ်းဆီးခဲ့ခြင်းဖြစ်သော်လည်း ဖမ်းဆီးစစ်ဆေးပြီး နောက်ပိုင်း တရားစွဲဆိုသော အခါတွင်မှ ရဲအရေးမပိုင်သည့် ပုဒ်မဖြင့် တရားစွဲဆိုရခြင်းဖြစ်ကြောင်း ဝန်ခံထွက်ဆိုလေသည်။

မြန်မာနိုင်ငံတွင် ယနေ့တိုင်အောင် ထင်ရှားလျက်ရှိသော ဖမ်းဆီးချုပ်နှောင်ခြင်းမှာ “စစ်ဆေးမေးမြန်းလိုပါသဖြင့် ခဏလောက်လိုက်ခဲ့ပါ” ဟု ပြောဆိုဖမ်းဆီးခေါ်ဆောင်သွားခြင်း ခံကြရကာ ဖမ်းဆီးပြီးနောက်ပိုင်း မည်သည့်အရပ်ဒေသတွင် ဖမ်းဆီးချုပ်နှောင်ထားသည်ကိုလည်း မသိရ၊ သေသလားရှင်သလား ဆိုသည်ကိုလည်း မသိကြရဘဲ ကျန်ရစ်သူမိသားစုများ ပူပင်ကြောင့်ကြရသည့်အဖြစ်သို့ ရောက်ရှိစေကာ၊ မိသားစုဝင်တစ်ဦးတစ်ယောက် ဖမ်းဆီးချုပ်နှောင်ခံရပါက ကျန်ရစ်သူ မိသားစုများကိုယ်တိုင်လည်း များစွာ စိတ်သောကရောက်ကြရပေသည်။

ထိုမျှမကသေး ထိုသို့ဖမ်းဆီးချုပ်နှောင်ခြင်းမှာ ရဲတပ်ဖွဲ့ဝင်များ၊ အထူးသတင်းတပ်ဖွဲ့များအနေဖြင့် ၎င်းတို့ ဖမ်းဆီးမည့် သူများ၏ ပြစ်မှုကျူးလွန်ကြောင်းကို သေချာပိုင်နိုင်စွာ သိရှိစုံစမ်းထားခြင်းမျိုးမဟုတ်ဘဲ၊ ခိုင်လုံတိကျသော သက်သေခံအထောက်အထားများ ရရှိထားခြင်းမျိုးမဟုတ်ဘဲ တစ်ဦးတစ်ယောက်ကို သင်္ကာမကင်းဖြစ်ရုံမျှဖြင့် ဖမ်းဆီး၍ စစ်ကြောရေးလုပ်စဉ်တွင် အတင်းအကျပ် ဝန်ခံစေခြင်း၊ ညှဉ်းပန်းနှိပ်စက်ခြင်းများ ပြုလုပ်ခြင်း စသည့်နည်းလမ်းများကို အသုံးချ၍ အမှုတည်ဆောက် တရားစွဲတင်ကြခြင်းကြောင့် ဖြစ်ပေသည်။

ထို့ကြောင့် အထက်ဖေါ်ပြပါ ကိုတင်ဝင်းနှင့် ကိုညီညီမင်းတို့၏အမှုတွင် ကိုဖိုးဖြူက တရားလိုများကို ရဲလက်စွဲလုပ်ထုံးလုပ်နည်းတို့ဖြင့် ထွက်ပေါက်မရှိအောင် မေးမြန်းသည့်အခါတွင် “ဖမ်းဆီးစဉ်က ရဲအရေးပိုင်သည့် ပုဒ်မဖြင့် ဖမ်းဆီးပြီး၊ တရားစွဲတင်သောအခါတွင်မှ ရဲအရေးမပိုင်သော ပုဒ်မဖြင့် တရားစွဲတင်ခြင်းဖြစ်သည်” ဟု ထွက်ဆိုကြခြင်းဖြစ်ပေသည်။

ဆက်လက်၍ ကိုဖိုးဖြူက “ကိုတင်ဝင်း၊ ကိုညီညီမင်းတို့ကို ဖမ်းဆီးသည့်အချိန်တွင် ဖမ်းဆီးသည့်အဖွဲ့၌ ပါဝင်ခဲ့ပါသလား” ဟု မေးမြန်းသည့်မေးခွန်းကို တရားလိုသက်သေက “ပါဝင်ခဲ့ပါသည်” ဟု ဖြေဆိုသဖြင့် ဆက်လက်မေးမြန်းရမည့် မေးခွန်းဖြစ်သည့် “ရုံးရှေ့စွပ်စွဲထားသော အမှုနှင့် စပ်လျဉ်းပြီး ရုံးတော်ရှေ့သို့ လာရောက် သက်သေထွက်ဆိုခြင်းမတိုင်ခင်က အမှုစစ်ရဲအရာရှိ၏ စစ်ဆေးမေးမြန်းမှုကို ခံခဲ့ရပါသလား” ဟု မေးမြန်းလိုက်သည့် အခါတွင်လည်း “မှန်ပါသည်” ဟု ဖြေဆိုလေသည်။ “အမှုစစ်ရဲအရာရှိမှ အမှုနှင့်စပ်လျဉ်းသော် ခင်ဗျား၏ ထွက်ဆိုချက်များကို ရေးမှတ်ထားခဲ့ပါသလား” ဟု မေးမြန်းရာတွင် “ရေးမှတ်ထားခဲ့ပါသည်” ဟု ထွက်ဆိုသည်။ ထို့ကြောင့် ကိုဖိုးဖြူသည် တရားလို၏ ရုံးတော်ရှေ့သို့ လာရောက်ထွက်ဆိုနေသော ထွက်ဆိုချက်များနှင့် ယခင်က အမှုစစ်အရာရှိထံတွင် ထွက်ဆိုခဲ့သော ထွက်ဆိုချက်များကို တိုက်ဆိုင်စစ်ဆေးလိုကြောင်း ရုံးတော်သို့ တင်ပြလျှောက်ထားလေတော့သည်။

တစ်စုံတစ်ယောက်ကို ဖမ်းဆီးပြီးနောက်ပိုင်းတွင် အမှုနှင့်စပ်လျဉ်း၍ စစ်ဆေးချက်များကို ရေးမှတ်ထားသည့် စာရွက်စာတမ်းများကို ရဲစက္ကူဟူ၍ ခေါ်ဝေါ်သုံးစွဲကြသည်။ ကိုဖိုးဖြူမှာ အဆိုပါ ရဲစက္ကူတွင် ရေးမှတ်ထားသော တရားလို၏ ထွက်ချက်များနှင့် ယခု ရုံးရှေ့တွင် ထွက်ဆိုလျက်ရှိသော ထွက်ချက်တို့ ကွဲလွဲလျက်ရှိကြောင်းကို သံသယရှိသည်ဖြစ်၍ တိုက်ဆိုင်စစ်ဆေးခွင့်ပြုပါရန် တရားရုံးသို့ တင်ပြလျှောက်ထားခြင်း ဖြစ်ပေသည်။

မြန်မာနိုင်ငံရဲတပ်ဖွဲ့ အမှုထမ်းများအနေဖြင့် ၎င်းတို့ ထိန်းသိမ်းထားရမည့် မည်သည့် စာ၊ မှတ်တမ်း၊ အမှုတွဲ သို့မဟုတ် ၎င်းတို့မှ ရေးကူးသည့် မည်သည့်မိတ္တူ၊ မည်သည့်ထုတ်နှုတ်ချက်မျိုးကိုမဆို တရားဥပဒေအရ တောင်းဆိုခွင့်မရရှိသူ အရပ်သားတစ်ဦးတစ်ယောက် သို့မဟုတ် အခြား မည်သူတစ်ဦးတစ်ယောက်ကိုမျှ မပေးအပ်ရကြောင်းကို ရဲလက်စွဲအပိုဒ် (၁၄၀၇) တွင် အတိအလင်း ဖေါ်ပြထားပါသည်။ သို့ရာတွင် တရားရုံးမှ အမိန့်ချမှတ်၍လည်းကောင်း၊ အာဏာပိုင် အစိုးရအရာရှိတဦးဦး၏ အမိန့်တစုံတရာဖြင့်သော်လည်းကောင်း၊ ထုတ်ပေးရန် သို့မဟုတ် ပေးအပ်ရန် တောင်းခံလာမှသာလျှင် ထုတ်ပေးရမည်ဖြစ်သည်။

ကိုဖိုးဖြူသည် ယင်းသို့ ထုတ်ပေးစေရန်အတွက် တရားရုံးတော်မှ အမိန့်တရပ် ချမှတ်ပေးပါရန် သက်သေခံဥပဒေပုဒ်မ (၁၄၅) အရ တင်ပြလျှောက်ထားခြင်းဖြစ်သည်။ သက်သေတစ်ဦးကို ယခင်က ရေးသားထားသော သို့မဟုတ် ရေးမှတ်ထားသော အစစ်ခံချက်ဖြင့် ပြန်လှန်မေးမြန်းနိုင်သည်။ ထိုသို့မေးမြန်းရာ၌ ရဲစက္ကူတွင် ၎င်းကိုယ်တိုင် အစစ်ခံထွက်ဆိုထားသည့် ထွက်ဆိုချက်များကို ပထမဦးစွာ ပြန်လည်သတိပေး ပြောဆိုရသည်။ သို့မဟုတ် ပြန်လည်ဖတ်ပြပေးရသည်။ ထို့နောက်တွင်မှ အမှုစစ်အရာရှိထံ ထွက်ချက်နှင့် တရားရုံးတော်တွင် ထွက်ဆိုသည့် အစစ်ခံချက်တို့သည် မည်သည့်နေရာတွင် ကွဲလွဲကြောင်းတို့ကို တရားရုံးတော်မှ အမှန်အတိုင်း သိရှိစေရန် မေးမြန်းရခြင်း၊ သက်သေခံတင်သွင်းခြင်းများ ပြုလုပ်ရခြင်းဖြစ်ပေသည်။

× × × × ×

ဆက်လက်ရေးသားပါဦးမည် -
စာဖတ်သူများကိုအစဉ်လေးစားလျက်-
စောကျော်ကျော်မင်း
၂၄.၁၁.၂၀၀၉

ခေတ်တခေတ်ကို ထုဆစ်သူများ

ရဲရင့်သက်ဇွဲ

ဟောဒီ ဘဒ္ဒကမ္ဘာမှာ
အပြောင်းလဲတွေက
မြန်ဆန်လွန်းတယ်
တဖက်သက်ရေးဆွဲခဲ့တဲ့ အခြေခံဥပဒေထဲက
အခွင့်အရေးကို ချောင်းနေတဲ့
သတ္တဝါတို့ရဲ့ စိတ်အပြောင်းအလဲက
ပိုမြန်လွန်းတယ်
ပိုပြီး ရွံ့စရာကောင်းတယ်…….။


တောမီးလောင်တာ
ကြာခဲ့ပါပြီ
တောကြောင်တွေမှာတော့
မြင်မြင်သမျှဖြတ်ဆီးဖို့
ယောက်ယက်ခတ်နေပုံများ
အသိခေါက်ခက်အဝင်နက်နေရှာတဲ့
သူတို့ကိုယ် သူတို့
ဖျက်ဆီးမဲ့ဘေးဟာ
နှစ်ထောင့်တဆယ်နဲ့အတူရောက်လာမယ်ဆိုတာ
မသိရှာကြဘူး……..။

ကမ္ဘာလုံးဆိုင်ရာ
ပြုပြင်ပြောင်းလဲမှုတွေထဲ
မျောပါမနေချင်
ငါတို့ရဲ့လိုအင်ဆန္ဒ
ငါတို့တိုင်းပြည်စစ်ကျွန်ဘဝ
လွတ်မြောက်ရေးသာ ပထမ၊ ဒုတိယ၊ တတိယ ……။

သေခြင်းတရားရဲ့
အငွေ့အသက်တွေလွှမ်းခြုံနေတဲ့
အခန်းငယ်တွေထဲက
ငါတို့ရဲ့သူရဲကောင်းများ
ခေတ်တခေတ်ကို
ထုဆစ်သူများဖြစ်တယ် ……။

တပ်ဦးက ငါတို့ သူရဲကောင်း ရဲဘော်များ
ခေတ်တခေတ်ကို
ထုဆစ်သူများဖြစ်တယ်။
တော်လှန်ရေးတရပ်ရဲ့
စုတ်ချက် ကြမ်းကြမ်းထဲမှာ
ကမ္ဘာမကြေတဲ့ တမ်းခြင်းတွေနဲ့
ကမ္ဘာမကြေတဲ့ လွမ်းခြင်းတွေနဲ့
ခေတ်တခေတ်ကို ထုဆစ်နေဦးမယ် … ။ ။

× × × × ×

ရဲရင့်သက်ဇွဲ
၁၁.၁၁.၂၀၀၉

လိုင်စင်မဲ့ မြေတူးစက်ဖမ်းမိခြင်းနှင့် ဆက်စပ်၍ ခရိုင်ရဲမှူး အရေးယူခံနေရ

ဉာဏ်မောင်

ပြီးခဲ့သည့်လ (၂၆) ရက်နေ့က ကရင်ပြည်နယ်၊ နောင်လုံတောင်ကြားတွင် ဖမ်းဆီးရမိသည့် လိုင်စင်မဲ့ မြေတူးစက် ၂ စီးအမှုနှင့်ပတ်သက်၍ ဘားအံခရိုင် ရဲတပ်ဖွဲ့မှူးကြီး မောင်မောင်အား ရုံးတင်စစ်ဆေးမှုများ ပြုလုပ်နေလျှက်ရှိသည်။

အဆိုပါ မြေတူးစက်များသယ်လာသည့် ဆေးတပ်ကြပ် မျိုးအောင်အား စစ်ဆေးနေစဉ်အတွင်း ထွက်ပြေးလွတ် မြောက်သွားသည့်အတွက် တာဝန်ရှိသူ ခရိုင်ရဲမှူးအား ယခုလ (၁၁) ရက်နေ့တွင် ရုံးတင်စစ်ဆေး နေခြင်းဖြစ်ကြောင်း အမည်မဖော်လိုသည့် ရဲအရာရှိတဦးက ပြောသည်။

“အခုအခေါက်က ၃ ခေါက်မြောက် သယ်လာတာ၊ အရင် ၂ ခေါက်ကလွတ်သွားပြီး ဒီတကြိမ်မှ မိတာ၊ ဖမ်းခိုင်းတာက ပ.ယ.က ဗိုလ်မှူးချုပ် ဇော်မင်းက ရဲမှူးကြီးကျော်မြင့်ကို ခိုင်းခဲ့တာ၊ သူကတဆင့် မြို့နယ်မှူး ဒုရဲမှူးဝင်းမြင့်နဲ့ နယ်ထိန်း ဒုရဲအုပ် ဝင်းနိုင်တို့ကို တဆင့်ဖမ်းခိုင်းလိုက်တာ” ဟု ပြောသည်။

ဖမ်းဆီးရမိသည့် Caterpillar အမျိုးအစား မြေတူးစက်နှစ်လုံးကို ပျဉ်းမနားမြို့ရှိ Soo_ Pin Company က ထိုင်းနိုင်ငံမှ ဝယ်ယူခဲ့ပြီး မြဝတီမြို့ ဒီကေဘီအေ အမှတ်(၁၀) ဂိတ်မှ တင်းသွင်းလာခြင်းဖြစ်ကာ စက်တစီးလျှင် သိန်း ၅၀ နှုန်းဖြင့် တပ်ထိန်း ဒုတပ်ကြပ် အောင်ဖြိုးဝင်းနှင့် ဆေးတပ်ကြပ် မျိုးအောင်တို့က သယ်ဆောင်လာခြင်း ဖြစ်သည်။

“သယ်လာတာက စုစုပေါင်း ၃ စီး၊ နောက်တစီးက ကျုံဒိုးက ခမရ(၅၄၅)ထဲမှာ ဖွတ်ထားတာကနေ ဗိုလ်မှူးချုပ် ဇော်မင်းက မြန်မာသစ် တောက်ငှက် (company)ကို ငှားထားတယ်။ အဲဒီတစ်စီးတော့ အမှုမဖွင့်ဘူး” ဟု အဆိုပါ ရဲအရာရှိက ဆက်လက်ပြောသည်။

ထွက်ပြေးလွတ်မြောက်သွားသည့် မျိုးအောင်ဆိုသူမှာ လိုင်စင်မဲ့ကားများကို သွင်းယူ သယ်ဆောင်နေခြင်းကို ကျယ်ကျယ်ပြန့်ပြန့်လုပ်ကိုင်နေသူဖြစ်ပြီး အာဏာပိုင်များနှင့် အဆင်ပြေသူတဦးဖြစ်ကြောင်း ၎င်းက ဆက်ပြောသည်။

“ပြည်ထဲရေးဝန်ကြီးက လက်တဆုံးနှိုက်ဖော်ထုတ်ဖို့ မှတ်ချက်ပေးတယ်၊ ဒီမျိုးအောင်ဆိုတဲ့သူက ခုစစ်ဆေးတော့မှ စစ်ပြေးမှန်း သိကြတာ၊ ဒါကလည်း သူထွတ်ပြေးသွားပြီးမှ သိကြတာလေ၊ နားမလည်တာက စစ်ပြေးက တပ်ထိန်းနဲ့တွဲပြီး အလုပ်လုပ်နေတာကို တပ်ထိန်းက မဖမ်းဘူးလား၊ ပြီးတော့ ကျနော်တို့ ရဲက မှု/ကူ၊ ဒ/န၊ နယ်ထိန်း၊ ဦးစီး(၁)တို့နဲ့လည်း အရမ်းရင်းနှီးကြတယ်၊ ဒီကောင်က လိုင်စင်မဲ့ကားဆို အကုန်လုပ်တယ်၊ သူတို့ တတွေဘဲ မျိုးအောင်ကားတွေ ငှားငှားစီးနေကြတာဘဲ” ဟု ပြောသည်။

ယင်းအမှုအား လာရောက်စစ်ဆေးသူမှာ မွန်ပြည်နယ် ရဲတပ်ဖွဲ့မှူး ဒုရဲမှူးကြီး ရွှေအေးဖြစ်ပြီး ယခုအခါ ရဲမှူးကြီးမောင်မောင်ကို နေပြည်တော်သို့ ပို့ဆောင်ထားပြီး မည်ကဲ့သို့ အရေးယူမည်ကို မသိရသေးကြောင်း ၎င်းက ဆက်ပြောသည်။

ဖခင်ဖြစ်သူ အသတ်ခံရမှုကို သက်ဆိုင်ရာက အရေးမယူသဖြင့် သမီးဖြစ်သူက ရဲချုပ်ထံတိုင်ကြား

ရိုးမ ၃

နယ်မြေခံအာဏာပိုင်များ ထိုးကြိတ်ရိုက်နှက်မှုကြောင့် သေဆုံးသွားသူအမှုကို သက်ဆိုင်ရာက အရေးယူဆောင်ရွက်ခြ်း မရှိသည့်အတွက် သမီးဖြစ်သူက မြန်မာနိုင်ငံ ရဲချုပ်ထံသို့ တင်ပြတိုင်တန်းထားသည်။

ပြီးခဲ့သည့်လ (၈) ရက်နေ့ ညပိုင်းက မြောက်ဥက္ကလာပမြို့၊ အမှတ် (၂) ရပ်ကွက်၊ သုမာလာလမ်းထိပ်တွင် (ရယက)အဖွဲ့ဝင်ဟောင်း ဦးဝင်းချိုနှင့် ရဲတပ်သား ပန်းသီး (ခ) အောင်အောင်ဦးတို့၏ ထိုးကြိတ်ရာမှ သေဆုံးသွား သည့် ဦးကျော်မောင်အမှုကို သမီးဖြစ်သူ မနှင်းအိဖြူက လက်မှတ်ရေးထိုးကာ တရားဝင် တင်ပြခဲ့ခြင်းဖြစ်သည်။

ယင်းကဲ့သို့ ထိုးနှက်ထားသည့် ဒဏ်ကြောင့် ဦးကျော်မောင်မှာ ဒဏ်ရာပြင်းထန်စွာ ရရှိပြီး သွေးများအဆက်မပြတ် ယိုစီးကာ မြောက်ဥက္ကလာပဆေးရုံသို့ (၈) ရက်နေ့၊ ည (၁၀) နာရီခန့်တွင် ပို့ဆောင်ခဲ့ရပြီး (၉) ရက်နေ့ မနက်တွင် သေဆုံးသွားခဲ့သည်။

ဦးကျော်မောင်သေဆုံးမှုကို နယ်မြေခံရဲစခန်းတွင် အမှုဖွင့်ရာ (ရယက)အဖွဲ့ဝင်ဟောင်း ဦးဝင်းချို တဦးတည်းကိုသာ ဖမ်းဆီးစစ်ဆေးထားသော်လည်း အခြားရဲတပ်သား ပန်းသီး(ခ) အောင်အောင်ဦးနှင့် (ရယက)အဖွဲ့ဝင် ကျွဲပေါက်တို့အား တစုံတရာ ဖမ်းဆီးအရေးယူခြင်းမရှိကြောင်း သမီးဖြစ်သူက တင်ပြတိုင်တန်းထားသည်။

အဆိုပါအမှုနှင့်ပတ်သက်၍ အာဏာပိုင်များဘက်မှ သက်သေများ ခေါ်ယူစစ်ဆေးမှုများ ပြုလုပ်ရာတွင် မျက်မြင်သက်သေကို တကြိမ်တည်းသာ ခေါ်ယူစစ်ဆေးပြီး တဝက်တပျက် မျက်မြင်သက်သေများ၏ အမည်များကိုသာ အကြိမ်ကြိမ် တင်သွင်းထားသည်။

သေဆုံးသူ ဦးကျော်မောင်မှာ အသက် (၅၆) နှစ်အရွယ်ရှိပြီး အမှတ် (၈၁၇)၊ သုဇိတာ (၉) လမ်း၊ (၂) ရပ်ကွက်၊ မြောက်ဥက္ကလာပမြို့နယ်တွင် နေထိုင်သူဖြစ်သည်။

အဆိုပါအမှုကို ပြီးခဲ့သည့်လ (၁၅) ရက်နေ့ ရက်စွဲဖြင့် မြန်မာနိုင်ငံရဲချုပ်ထံသို့ လိပ်မူကာ တိုင်တန်းထားသော်လည်း ယနေ့အထိ တစုံတရာ တုန့်ပြန်ဆောင်ရွက်ပေးခြင်း မရှိသေးပေ။

ဘဏ်ဝန်ထမ်းများ ငွေကြေးဖြတ်တောက်မှုကြောင့် တောင်သူများ မကျေမနပ်ဖြစ်

ဉာဏ်မောင်

ဆောင်းရာသီ သီးနှံစိုက်ပျိုးစရိတ်ထုတ်ပေးရာတွင် သက်ဆိုင်ရာ ဘဏ်ဝန်ထမ်းများက နည်းမျိုးစုံဖြင့် ငွေကြေး ဖြတ်တောက်နေသဖြင့် ဒေသခံ တောင်သူများ မကျေမနပ်ဖြစ်နေကြသည်။

ဧရာဝတီတိုင်း၊ ဟင်္သာတမြို့နယ်၊ နိဗ္ဗာန်ကျေးရွာမှ လယ်သမားများထံမှ မြို့နယ် လယ်ယာစိုက်ပျိုးရေး ဘဏ်မန်နေဂျာ ဒေါ်လှဌေးက ဆောင်သီးနှံ စိုက်ပျိုးစရိတ်ထုတ်ပေးရာတွင် ငွေကြေးဖြတ်တောက်ယူနေကြောင်း ဒေသခံ တဦးက ပြောသည်။

“ဘဏ်မှာ ငွေထုတ်ခါဖို့ စာရွက်စာတမ်းကြေးဆိုပြီး မိုးတွင်းတုန်းက ၂၀၀၀ တောင်းတယ်။ အခုက ဆောင်းသီးနှံအတွက် ထုတ်ပေးတဲ့နေရာမှာ ၁၅၀၀ တောင်းတယ်၊ နောက်ထပ် ပူးတွဲလာထုတ်တာဆိုရင် ငါးရာ ဖြတ်ယူထား တယ်” ဟု ပြောသည်။

လယ်သမားတဦးကို တဧကလျှင် (၆၀၀၀) ကျပ်နှုန်းဖြင့် ယခုလဆန်းပိုင်းမှ စတင်ကာ ထုတ်ပေးနေခြင်းဖြစ်ကာ ကျေးရွာအုပ်စုအလိုက်ခွဲ၍ ဆက်တိုက်ထုတ်ပေးနေကြောင်း ၎င်းက ဆက်ပြောသည်။

“မိုးတွင်းတုန်းကတော့ ဆပ်ပြာမှုန့်ကို အပြင်မှာ တထုပ် ၂၅၀ ရောင်းတာကို ၅၀၀ နဲ့ ဝယ်ရတယ် တထောင်ဖိုး။ အခုကတော့ ဆပ်ပြာတော့ မရောင်းဘူး ဒါပေမယ့် စာရွက်စာတမ်းဖိုးကတော့ ၁၅၀၀ တောင်းတယ်။ အိမ်ထောင်ဦးစီး လယ်ယာမှတ်ပုံတင်ပါတဲ့လူ မလာနိုင်ရင် ပူးတွဲခ ဆိုပြီးတော့ ၅၀၀ ပေးရတယ်” ဟု ပြောသည်။

ဒေသခံတောင်သူများအနေဖြင့် ယခင်နှစ်ကလည်း မတ်ပဲပေါ်ချိန်တွင် အရှုံးပေါ်ခဲ့ပြီး ယခုနှစ်ဆောင်းသီးနှံ စိုက်ပျိုးရေးအတွက် ငွေကြေးထုတ်ပေးရာတွင်လည်း မျိုးစေ့စရိတ်ပင် မရကြောင်း ဒေသခံက ဆက်ပြောသည်။

“အခု ရာသီဥတုနေအထားက နှစ်တိုင်းလောက်တော့ ကောင်းမယ် မထင်ဘူး၊ မတ်ပဲက နှင်းနဲ့ စိုက်ရတာ၊ နှင်းနဲ့ စိုက်ရတဲ့အခါကျတော့ နှင်းသိပ်မကျတော့ ဆောင်းသီးနှံက ပိုးတွေ ဘာတွေ လိုက်တယ်၊ ပိုးသတ်ဆေးက ထင်သလောက် မထိရောက်တာတွေလည်းရှိတယ်။ အစိုးရကလည်း ပိုးသတ်ဆေးနဲ့ ပတ်သက်ပြီးတော့ ဘာမှ တာဝန်မယူတဲ့အခါကြတော့ အပြင်မှာ ဝယ်သုံးရတယ်” ဟု ပြောသည်။

နိဗ္ဗာန်တိုက်နယ် ဒေသအတွင်း လယ်ဧကပေါင်း သောင်းနှင့်ချီရှိပြီး ယခုကဲ့သို့ ဌာနဆိုင်ရာ ဝန်ထမ်းများငွေကြေး ဖြတ်တောက်မှုများကြောင့် စိုက်ပျိုးစရိတ် မလုံလောက်သည့်အပြင် အခြားအခက်အခဲများကိုလည်း ကြုံတွေ့နေလျှက် ရှိသည်။

အမေရိကန်အစိုးရပိုင်းက ပြောနေတဲ့ “ဒီမိုကရေစီရေး ရှေ့ရှုတဲ့ စစ်မှန်သောတိုးတက်မှု” ဆိုတာ ဘာတွေလဲ

တူမောင်ညို

ကောင်းမွန်တဲ့ ရည်ရွယ်ချက်တွေနဲ့ နှစ်ပေါင်းများစွာ ဆောင်ရွက်ခဲ့တဲ့ အမေရိကန်ရဲ့ ပိတ်ဆို့အရေးယူမှုတွေရော၊ တချို့နိုင်ငံတွေရဲ့ အပြုသဘော ဆက်ဆံရေးတွေကြောင့်ပါ မြန်မာပြည်သူတွေရဲ့ဘ၀ တိုးတက်အောင် မလုပ်နိုင်ခဲ့ပါဘူး။

ဒါကြောင့် ကျနော်တို့ဟာ မြန်မာနိုင်ငံခေါင်းဆောင်တွေနဲ့ တိုက်ရိုက်ဆက်ဆံနေပါတယ်။ ဒီမိုကရေစီရေးရှေ့ရှုတဲ့ စစ်မှန်သော တိုးတက်မှု မရှိသေးသမျှ အရေးယူပိတ်ဆို့မှုတွေ ဆက်လက်လုပ်နေဦးမှာပဲလို့ ရှင်းရှင်းလင်းလင်း သတိပေးထားပါတယ်။

ကျနော်တို့ဟာ ညီညွတ်သော၊ ငြိမ်းချမ်းသော၊ ချမ်းသာကြွဝသော၊ ဒီမိုကရေစီထွန်းကားတဲ့ မြန်မာနိုင်ငံ ဖြစ်လာရေးကို ထောက်ပံ့အားပေးပါတယ်။ မြန်မာနိုင်ငံအနေနဲ့ ဒီလမ်းကြောင်းကို ဦးတည်လာခဲ့ရင် အမရိကန်ပြည်ထောင်စုနဲ့ ပိုမိုကောင်းမွန်တဲ့ ဆက်ဆံရေး ဖြစ်ထွန်းလာနိုင်ပါတယ်။ (အိုဘားမား၏ အာရှ ၄ နိုင်ငံခရီးစဉ် ဂျပန်နိုင်ငံတွင် ပြောကြားချက်)

အမေရိကန် အစိုးရပိုင်းက ပြောနေတဲ့ “ဒီမိုကရေစီရေး ရှေ့ရှုတဲ့ စစ်မှန်သော တိုးတက်မှု” ဆိုတာ ဘာတွေလဲ။

“ဒီမိုကရေစီရေး ရှေ့ရှုတဲ့ စစ်မှန်သောတိုးတက်မှု” များကို အောက်ပါအချက်များဖြင့် သတ်မှတ်တိုင်းတာနိုင်ပါသလော။

(က) ပြည်ထောင်စု သမ္မတမြန်မာနိုင်ငံတော် ဖွဲ့စည်းပုံအခြေခံဥပဒေ (၂၀၀၈) သည် စတင် အာဏာတည်ခြင်း မရှိသေးသောကြောင့် ပြန်လည်သုံးသပ်နိုင်ရေးအတွက် နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီက မိမိတို့ကိုယ်တိုင် ပြဌာန်းထားသည့် ပြည်သူ့လွှတ်တော် ရွေးကောက်ပွဲဥပဒေ၊ ထုတ်ပြန်ထားသည့် ကြေညာချက်များနှင့်အညီ ၁၉၉၀ ပြည့်နှစ် ရွေးကောက်ပွဲရလဒ်ကို အကောင်အထည်ဖော်သည့်အနေဖြင့် ပြည်သူ့လွှတ်တော်ကို အမြန်ဆုံး ခေါ်ယူဖွဲ့စည်းပေးရန်၊

(ခ) မိမိနိုင်ငံတွင် ဒီမိုကရေစီနှင့် လူ့အခွင့်အရေးရရှိရန် အစဉ်တစိုက် ကြိုးပမ်းအားထုတ်မှုကြောင့် နေအိမ်များတွင် ထိန်းသိမ်းခြင်းခံနေကြရသော အမျိုးသားဒီမိုကရေစီအဖွဲ့ချုပ် ဒုတိယဥက္ကဌ ဦးတင်ဦးနှင့် အထွေထွေအတွင်းရေးမှူး ဒေါ်အောင်ဆန်းစုကြည်တို့အား နိုင်ငံတော်၏ လိုအပ်ချက်အရ ခြွင်းချက်မရှိ အမြန်ဆုံး လွှတ်ပေးရန်၊

(ဂ) တိုင်းရင်းသားလူမျိုးစုများ မပါဝင်ဘဲ စစ်မှန်သော ဒီမိုကရေစီပြည်ထောင်စု မြန်မာနိုင်ငံတော်ကို တည်ဆောက်နိုင်မည်မဟုတ်သောကြောင့် ရှမ်းတိုင်းရင်းသားများ ဒီမိုကရေစီအဖွဲ့ချုပ် ဥက္ကဌ ခွန်ထွန်းဦး၊ အတွင်းရေးမှူး စိုင်းညွန့်လွင်နှင့် အခြားတိုင်းရင်းသားခေါင်းဆောင်များအား နှစ်ရှည်လများ ပြစ်ဒဏ်ကျခံနေရခြင်းမ ခြွင်းချက်မရှိ အမြန်ဆုံး လွှတ်ပေးရန်၊

(ဃ) မိမိတို့၏ နိုင်ငံရေးယုံကြည်ချက်ကြောင့် ဖမ်းဆီးထိန်းသိမ်းထားခြင်း၊ ပြစ်ဒဏ်ချမှတ်ခြင်းများ ခံနေကြရသော ဆရာတော်၊ သံဃာတော်အရှင်သူမြတ်များ၊ ပြည်သူ့လွှတ်တော် ကိုယ်စားလှယ်များ၊ ဒီမိုကရေစီအင်အားစုများ စသည့် နိုင်ငံရေးအကျဉ်းသား အားလုံးတို့ကို ကန့်သတ်ချက်များမရှိဘဲ ခြွင်းချက် မရှိ အမြန်ဆုံး လွှတ်ပေးရန်၊

(င) မိမိတို့၏ နိုင်ငံရေးယုံကြည်ချက်ကြောင့် ပြစ်ဒဏ်ကျခြင်းခံနေကြရသော မင်းကိုနိုင်၊ ကိုကိုကြီး စသည့် ၈၈ မျိုးဆက် ကျောင်းသားခေါင်းဆောင်များ အားလုံးကို ခြွင်းချက်မရှိ အမြန်ဆုံး လွှတ်ပေးရန်၊

(စ) နိုင်ငံရေးပါတီများ မှတ်ပုံတင်ခြင်းဥပဒေနှင့်အညီ တရားဝင် ရပ်တည်နေသော အမျိုးသားဒီမိုကရေစီအဖွဲ့ချုပ်၏ အဆင့်ဆင့်သော စည်းရုံးရေးအဖွဲ့ရုံးများကို ဥပဒေနှင့်ညီညွတ်ခြင်းမရှိဘဲ ခေတ္တဟုဆိုပြီး ယနေ့အထိ ငါးနှစ်ကျော်သည့်တိုင် ကာလရှည်ကြာစွာ ချိတ်ပိတ်ထားခြင်းမှ အမြန်ဆုံး ပြန်လည်ဖွင့်လှစ်ပေးရန်နှင့် လွတ်လပ်စွာ စည်းရုံးလှုပ်ရှားခွင့်ပေးရန်၊

(ဆ) ၁၉၉၀ ပြည့်နှစ် ပါတီစုံ ဒီမိုကရေစီအထွေထွေရွေးကောက်ပွဲတွင် ဝင်ရောက်ယှဉ်ပြိုင် အနိုင်ရရှိခဲ့ပြီး ဖျက်သိမ်းခြင်းခံထားကြရသော တိုင်းရင်းသားနိုင်ငံရေးပါတီများအပါအဝင် နိုင်ငံရေးပါတီများကို ပြန်လည် မှတ်ပုံတင်ခွင့်ပေး၍ လွတ်လပ်စွာ စည်းရုံးလှုပ်ရှားခွင့်များ ပေးရန်။

x x x x x
တူမောင်ညို
(၂၀၀၉ ခုနှစ်၊ နိုဝင်ဘာ ၁၅ ရက်)

ရထားလမ်း ပျက်စီးမှုကြောင့် ဒေသခံများ အခက်ခဲကြုံနေရ

ရိုးမ ၃

ရထားလမ်းပိုင်း ပျက်စီးနေမှု ကြာမြင့်နေသည့်အတွက် ခရီးသွားလာရေး၊ ကုန်စည်စီးဆင်းမှုများ နှောင့်နှေးကာ ဒေသခံများ အခက်ကြုံနေရသည်။

ဧရာဝတီတိုင်း၊ ဟင်္သာတ-ကြံခင်း ရထားလမ်းပိုင်းတခုလုံး ပျက်စီးနေသည်မှာ နှစ်ဝက်ကျော်နေပြီး ပြန်လည်ပြုပြင်ခြင်း တစုံတရာမရှိသည့်အတွက် ရထားလမ်းတလျောက် မြို့များမှ ဒေသခံများ သွားလာရေးဒုက္ခရောက်နေကြောင်း ဒေသခံတဦးက ပြောသည်။

“သွားရေးလာရေး တော်တော်ကို ဒုက္ခရောက်တာ။ သက်ဆိုင်ရာက အဲဒါတွေကို ပြင်ပေးစေချင်တယ်။ ဟင်္သာတကနေ အင်္ဂပူ၊ ထူးကြီး မဲဇလီကုန်း၊ အင်ပင်၊ မြန်အောင်၊ ကြံခင်း အဲဒီတောက်လျှောက်မြို့တွေက ဒီရထားလမ်းကိုပဲ အားကိုးနေရတာ။ စီးပွားရေး၊ လူမှုရေး၊ ကျန်းမာရေး အားလုံးကို အားကိုးနေရတာ။ အခုလိုဖြစ်တော့ ကုန်စည်စီးဆင်းမှုတွေလည်း ရပ်ဆိုင်းကုန်တယ်။ မိုင် ၅၀ ခရီးဆိုတာ ပုံမှန် လေးနာရီလောက်ပဲ ကြာတဲ့ခရီးကို အခုက ညအိပ်သွားရတာမျိုးတွေ ဖြစ်နေတယ်” ဟု ဒေသခံက ပြောသည်။

အဆိုပါရထားလမ်းပိုင်းတွင် ပုသိမ်-ကြံခင်း အစုန်အဆန်ရထားတစီး၊ စာပို့တစီး ပြေးဆွဲနေလျက်ရှိပြီး ဟင်္သာတ-ပုသိမ်၊ ဟင်္သာတ-ကြံခင်းကို လော်ကယ်ရထားနှစ်စီး ပြေးဆွဲနေလျက်ရှိကာ ယခုအခါ ယခင်ကဲ့သို့ မရှိတော့ကြောင်း သူက ဆက်လက်ပြောသည်။

“လမ်းသစ်တွေ ထပ်ဖောက်တယ် ဥသျှစ်ပင်ကနေ ပခုက္ကူကို။ သူတို့ဟာသူတို့ ဖောက်ချင်တာတွေ ဖောက်နေတာ။ ကျနော်တို့ ဒီဘက်လမ်းကတော့ သုံးစားလို့ကို မရတော့တဲ့အဆင့် ရောက်နေတာ။ ညပိုင်းထွက်တဲ့ အာစီကြီးဆိုတာက ဥသျှစ်ပင်နဲ့ ဟင်္သာတထွက်တာ သူကလည်း ရှေ့ကလမ်းတွေ ပျက်နေတော့ ထွက်လို့ကိုမရဘူး။ မနက်ထွက်ရမဲ့ ရထားက ည (၁၂) နာရီလောက်မှ ရောက်ချင်ရောက်တာဆိုတော့ တော်တော်ကို အခြေအနေဆိုးနေတာ” ဟု ပြောသည်။

ယင်းကဲ့သို့ ရထားလမ်းပိုင်းများ ပျက်စီးနေမှုကို ဒေသခံများအနေဖြင့် သက်ဆိုင်ရာကို အကြောင်းကြားလိုသော်လည်း လမ်းဆောက်လုပ်ရေးအာဏာပိုင်များအနေဖြင့် မည်သည့်နေရာတွင် နေထိုင်သည်ကိုပင် မသိရကြောင်း အဆိုပါဒေသခံက ဆက်ပြောသည်။

“လမ်းမကောင်းတော့ လမ်းဗိုလ်တွေကို အကြောင်းကြားဖို့ကျတော့ ဘယ်မှာနေတာမှန်းကို မသိဘူး။ အခုက လမ်းပျက်တာ။ ငါးတွဲသွားရင် တတွဲက ချော်၊ အဲလိုဖြစ်တော့ နောက်က ရထားက ထွက်လို့မရပြန်ဘူး။ ခါတိုင်းဆို အချိန်မမှန်ပေမဲ့ အစီးရေအပြည့် သွားသေးတယ်။ အခုကျတော့ တနေ့တစီးလောက်ပဲ သွားတော့ အဆင်မပြေဘူး။ သက်ဆိုင်ရာ ဝန်ကြီးဌာနတွေက အမြန်ဆုံး ပြင်ပေးသင့်တယ်” ဟု ဆက်လက်ပြောဆိုသည်။

တပ်မတော်အတွင်း ရွေးကောက်ပွဲသတင်း အမျိုးမျိုးထွက်ပေါ်နေ

ဗထူး

တပ်မတော်အတွင်း ၂၀၁၀ ရွေးကောက်ပွဲ ကျင်းပမည့်အချိန် သတင်းအမျိုးမျိုး ထွက်ပေါ်နေကြောင်း အမည်မဖော်လိုသည့် တပ်မတော်အရာရှိတဦးက ပြောသည်။

လာမည့် ၂၀၁၀ ရွေးကောက်ပွဲကို မတ်လ၊ မေလနှင့် နိုဝင်ဘာလတို့တွင် ကျင်းပမည်ဖြစ်ကြောင်း သတင်းများ ထွက်ပေါ်နေခြင်းဖြစ်သည်။

“အခုဟာက တပ်ထဲမှာက သတင်းတွေက အမျိုးမျိုး ကြားနေတာ။ အဲဒီသုံးလထဲက တလလမှာ လုပ်မယ်။ တိတိကျကျတော့ မပြောနိုင်သေးဘူး” ဟု အဆိုပါအရာရှိက ဆက်ပြောသည်။

ထို့အပြင် တပ်မတော်သား မိသားစုဝင်များ၏ စားဝတ်နေရေးအခြေအနေမှာလည်း ကြပ်တည်းမှုများရှိနေကြောင်း ယင်းအရာရှိက ဆက်ပြောသည်။

“တပ်ထဲက အခြေအနေကတော့ ယောင်္ကျားဖြစ်သူက ရှေ့တမ်းသွားတယ်ဆိုရင် ရိက္ခာက သူတို့နဲ့ပါသွားတော့ နောက်တမ်းမှာ ကျန်ခဲ့တဲ့ မိန်းမက မွေးဖွားခါနီး တပ်ထောက်ပံ့ရေးက ၅၀၀ ပဲ ထောက်ပံ့တယ်။ မလောက်ရင် တပ်ရေးဗိုလ်ကြီးတွေ၊ တပ်ရင်းမှူးကတော်တွေဆီက အတိုးနဲ့ချေးပြီး နေရတာ” ဟု ပြောသည်။

ယင်းကဲ့သို့ ချေးငွေများကို လစာထဲမှာ ပြန်ဖြတ်သည့်အခါ အတိုးပါ ဖြတ်တောက်သဖြင့် တပ်မတော်သား မိသားစုဝင်များအနေဖြင့် အကြပ်အတည်းမှာ တနေ့ထက်တနေ့ ဆိုးရွားနေသည်ဟု ၎င်းအရာရှိက ဆက်ပြောသည်။

၂၀၁၀ ရွေးကောက်ပွဲ နီးလာသည်နှင့်အမျှ တပ်မတော်သားများအနေဖြင့် အကြပ်အတည်းမျိုးစုံ ကြုံတွေ့နေရပြီး အချို့အရာရှိ တပ်မှူးများကိုလည်း အရပ်ဘက်သို့ ပြောင်းရွှေ့ခြင်းများလည်း ပြုလုပ်နေလျှက်ရှိသည်။

ကြံ့ဖွံ့အာဏာပိုင်ကို သံဃာထုနဲ့ မြို့ခံများ မကျေနပ်ဖြစ်

ဉာဏ်မောင်

ကြံ့ဖွံ့အတွင်းရေးမှူး၏ လုပ်ရပ်ကြောင့် သံဃာတပါး စစ်ကြောရေးစခန်းမှ ဆေးရုံတင်ထားရပြီး ယင်းဖြစ်ရပ်နှင့် ပတ်သက်၍ သံဃာထုနှင့် မြို့ခံလူထုက မကျေမနပ် ဖြစ်နေကြသည်။

မန္တလေးတိုင်း၊ မြင်းခြံခရိုင်၊ ကြံ့ဖွံ့အတွင်းရေးမှူး အောင်ကြည်ဝင်း၏ သတင်းပေးတိုင်တန်းမှုကြောင့် ကျောက်ပန်းတောင်းမြို့၊ သုခဝတီကျောင်းတိုက်မှ အရှင်ဇောတိကကို ပြီးခဲ့သည့် ၅ ရက်ခန့်က ဖမ်းဆီးပြီး မန္တလေး၊ အိုးဘိုထောင်စစ်ကြောရေးတွင် စစ်ဆေးနေစဉ် ဆေးရုံတင်ထားရခြင်းဖြစ်သည်။

“ဖြစ်တာက အဲဒီ အောင်ကြည်ဝင်းဆိုတဲ့သူက ကျောက်ပန်းတောင်းမှာ မိတ္တူကူးဆိုင် ဖွင့်ထားတာ။ အဲဒီဆိုင်ကို အရှင်ဇောတိကနဲ့ သံဃာတပါးက မိတ္တူသွားကူးတာ။ အဲဒီမှာ သူ့သမီးနဲ့တွေ့တော့ ဦးဇင်းက မိတ္တူကူးလို့ရလားဆိုတော့ ကောင်မလေးက ဖတ်ကြည့်ပြီး ရပါတယ်ဆိုပြီး သူ့အဖေကို ပြောတာ။ ပြီးတော့ မန္တလေးကို ဖုန်းဆက်လိုက်တော့ ပါဂျဲရိုး တစီးရယ် ကားအဖြူတစီးရယ် လာစောင့်ပြီး ဖမ်းသွားတာ။ တပါးကတော့ လွတ်သွားတယ်” ဟု မြို့ခံတဦးက ပြောသည်။

ယင်းနောက် မန္တလေး၊ အိုးဘိုထောင်စစ်ကြောရေးတွင် စစ်ဆေးနေစဉ် အရှင်ဇောတိက,က အိတ်ထဲတွင် ပါလာသည့် ဘရိတ်ဓါးဖြင့် ကိုယ့်ကိုယ်ကို ပြန်လှီးလိုက်သည့်အတွက် ဆေးရုံတင်ထားရကြောင်း သတင်းများထွက်ပေါ်နေသည်ဟု ၎င်းမြို့ခံက ဆက်ပြောသည်။

“ဦးဇင်းကို ဖမ်းသွားတာက SB က ကျော်ဌေး။ သူ့ကိုတောင် ခေတ္တထိန်းထားတယ်လို့ ကြားတယ်။ တကယ်လို့ ဦးဇင်းတခုခုဖြစ်သွားရင် သူပါ ပြဿနာဖြစ်မယ့်သဘောပေ့ါ။ သေချာတာက ဦးဇင်းကို ဝမ်းကိုက်တာကြောင့် မန္တလေးဆေးရုံကြီးမှာ တင်ထားတယ်လို့ ပြောတယ်” ဟု အဆိုပါမြို့ခံက ဆက်ပြောသည်။

၎င်းအတွင်းရေးမှူး အောင်ကြည်ဝင်းသည် တိုင်းကြံ့ဖွံ့ကိုယ်စားလှယ်တဦးဖြစ်ပြီး ကျောက်ပန်းတောင်းမြို့ပေါ်တွင် စီးပွားရေးလုပ်ငန်းများကို လက်ဝါးကြီးအုပ်ထားသူဖြစ်ကြောင်း ဆက်ပြောသည်။

ယင်းလုပ်ရပ်နှင့်ပတ်သက်၍ “သူ့အိမ်မှာ ထိုင်ဆွမ်းကြွတဲ့ ကိုယ်တော် ၅ ပါးရှိတယ်။ အခုဆို သူ့အိမ်ကို ဘယ်ရဟန်းသံဃာတွေမှ ဆွမ်းခံမကြွတော့ဘူး။ ကျောင်းပန်းတောင်းမြို့ပေါ်က လူတွေရော၊ သံဃာတွေရော တော်တော်ကို မကျေမနပ်ဖြစ်နေတယ်။ သူတို့မိသားစုကို တခုခုကို လုပ်ချင်နေကြတာ” ဟု မြို့ခံက ဆက်လက်ပြောသည်။

ညို (သို့မဟုတ်) မပြီးသေးသော ရေဆေးပန်းချီကားတစ်ချပ်

မျိုးမြင့်မောင်

နောက်ကြည့်မှန်
ရေးသူ - မင်းကိုနိုင်
စာမျက်နှာ (၁၇၁)
ပထမအကြိမ်- ၂၀၀၉ အောက်တိုဘာ
ထုတ်ဝေသူ- အေအေပီပီဘီ
အုပ်ရေ - ၁၀၀၀

စာမျက်နှာ (၁၇၁) မျက်နှာသာရှိသော သူ့စာအုပ်ကို တစ်ထိုင်တည်းအပြီး ဖတ်ပစ်လိုက်သည်။

သူသည် ခံစားတတ်သူဖြစ်သည်။

ခံစားမှုဟုဆိုရာ၌ နံ့သာထုံသောည မှသည် ခေတ်ပြောင်းတော်လှန်ရေးအထိ နက်ရှိုင်းကျယ်ပြန့်သည်မဟုတ်ပါလား။

သူသည်ခံစားရုံမျှမက ဖွဲ့နွဲ့တတ်သောသူလည်း ဖြစ်သည်။ (သောကလက်/အဖေါ်ရှိပါတယ် အထီးကျန်ခြင်းလေ/ တကယ်လို့ နွယ်မျှင်ကလေးတွေနဲ့တူတဲ့ မျက်လုံးတစ်စုံသာ အထီးကျန်ခြင်းမှာ ရှိမယ်ဆိုရင် ကိုယ်တယောက်ထဲ အမြဲနေရဲပါတယ်/နောက်တခါပြန်ဆုံရင်တော့ ကိုယ်ဟာကိုယ်တန်ဖိုးထားတဲ့ သံယောဇဉ်တခုကို ဖိနပ်လို စီးတော့မှာမဟုတ်ဘူး၊ ရင်ထိုးလို ချိတ်ဆွဲထားတော့မှာပါ)

အင်တာဗျူးမေးခွန်းများကိုပင် သူက ဖွဲ့နွဲ့ပြောတတ်သူ။ သူ့အပြောတွေက သဘင်ဆန်လှသည်။ “မင်းကိုနိုင်” ဟူသော အမည်ကပင် အဖွဲ့အနွဲ့တစ်ခုမဟုတ်ပါလား။

သူသည် ခံစားတတ်ဖွဲ့နွဲ့တတ်ရုံမျှမက ပြည်သူများ၏ ခံစားချက်များကို ဖေါ်ထုတ်ထင်ဟပ်ပြနိုင်စွမ်းရှိသူတစ်ဦးဖြစ်သည်။ သို့အတွက် သူ့ကို (နအဖ) စစ်အစိုးရက နှစ်ရှည်ထောင်ဒဏ်ချမှတ်ကာ ဝေးလံလှသော မောရဋ္ဌရှိ ကျိုင်းတုံအကျဉ်းထောင်သို့ပို့ထားခဲ့သည်။

ညို၊ ကိုဖေသောင်း၊ မခင်အေး၊ ဒေါ်တင်တင်တို့ပြောသော စကားများတွင် ကျနော်မျောလွှင့်သွားသည်။ ညိုသည် ရိုးသားပြီး အပြစ်ကင်းစင်သော ဆယ်တန်းကျောင်းသူကလေးတစ်ဦး။ ညိုပြောသော စကားများ၊ အပြုအမူများကလည်း ညိုလိုပင် အပြစ်ကင်းစင်ပြီး ကလေးဆန်သလို လှသည်။ ညိုတည်သော ရေချမ်းစင်ကလေးလို အေးမြနေမှာလည်း သေချာသည်။

တကယ်တော့ တောဘူတာရုံကလေးရှိတဲ့ မြို့သေးသေးလေးတစ်မြို့ကို တိမ်းရှောင်လာတဲ့ တက္ကသိုလ်ကျောင်းသား နိုင်ငံရေးလှုပ်ရှားသူနဲ့ ဆယ်တန်းကျောင်းသူကလေးတစ်ဦးတို့ရဲ့ သံယောဇဉ်ဖွဲ့ ဝတ္တုတစ်ပုဒ်မျှသာဖြစ်သည်။ သူသည် သူ၏သံယောဇဉ်ကို မတ်လ၊ ဇွန်လ၊ သြဂုတ်လ၊ စက်တင်ဘာလများကို ဖြတ်သန်းသွားခဲ့တဲ့ ၈၈ လူထုလှုပ်ရှားမှုကြီးကို မှုန်ပြပြ နောက်ခံထားပြီး ဖွဲ့နွဲ့ထားခြင်းဖြစ်သည်။

ညိုနဲ့ ကိုဖေသောင်း၏ ဇာတ်လမ်းကလည်း မပြီးဆုံးသေးသလို ဆဲဗင်းဂျူလိုင်က စခဲ့တဲ့ စစ်အာဏာရှင်စနစ်အောက်က လွတ်မြောက်ရေးလှုပ်ရှားမှုကြီးကလည်း မပြီးဆုံးသေးပါ။

ဒါပေမယ့် မခင်အေးတော့ ကလေးနှစ်ယောက်အမေ ဖြစ်ခဲ့ပြီ။

အခုချိန်လောက်ဆို ညို့အဖေ ဦးရွှေခင်လည်း ပင်စင်ယူလောက်ပြီ။ ညို့အသက်ပင် ၃၀ ကျော်ပေတော့မည်။

ထို့အတူ ကိုဖေသောင်းပေးခဲ့သော ဦးထုတ်ဖြူကလေးပင် ဝါကျင်ဟောင်းနွမ်းနေပေတော့မည်။

“ကိုယ့်အတွက်က လမ်းနှစ်သွယ်ရှိတယ်၊ ရည်ရွယ်တာတူပေမယ့် နှစ်နေရာ ခွဲလုပ်ရမယ်၊ တောထဲပဲသွားရမလား၊ မြို့မှာပဲ ဆက်လှုပ်ရှားရမလား” တောထဲက လူအများစုတော့ တတိယနိုင်ငံက မြို့ပြတွေဆီကို တစ်သုတ်ပြီးတစ်သုတ် ရည်မှန်းချက်မျိုးစုံနဲ့ ခရီးထွက်သွားခဲ့ကြပြီ ကိုဖေသောင်းရေ။

တချို့ကလည်း (၂၀၁၀) ရွေးကောက်ပွဲကို ရည်မှန်းချက်တစ်ဖက်ကမ်းကူးဖို့ ဖောင်အဖြစ် စီးသွားကြမယ်လို့ ပြောနေကြသည်။ တကယ်တော့ (၂၀၁၀) ရွေးကောက်ပွဲသည် ကူးတို့ဖောင်မဟုတ်။ ဖွဲ့စည်းပုံအခြေခံဥပဒေ (၂၀၀၈) လို့ဆိုတဲ့ စစ်အာဏာရှင်စနစ် နွံရေအိုင်ထဲမှာ ကမ်းမမြင်လမ်းမမြင် မျောနေတဲ့ ဆင်သေကောင်မျှသာ ဖြစ်သည်။ ဒီမိုကရေစီသောင်ကမ်းသို့ ရောက်ရှိလိမ့်မည်မဟုတ်ပါ။

ထိုသို့ ဆင်သေစီးမည့် ထိုလူများကို ကိုဖေသောင်းက ဘယ်လိုဝေဖန်ဖွဲ့နွဲ့မှာလဲ။ သံချပ်ထိုးပြီး ဖွင့်ချမှာလား။

ကျနော်တို့၏ ကိုဖေသောင်းခမျာမှာတော့ အမြှီးဖွားဖွား ရှဥ့်ကလေးတွေပုံကို ကျိုင်းတုံအကျဉ်းထောင်အတွင်း နံရံပေါ်မှာ ပုံကြမ်းဆွဲခြစ်နေလေမလား။ ရေကြည်မြောင်းကလေးလို တောက်ပကြည်လင်နေသော ညို့မျက်ဝန်းကလေးတွေကို သတိရနေမလား။ ဖားဖားဝေဝေရှိလှတဲ့ ညို့ဆံပင်တွေကိုပဲ မြင်ယောင်နေမလား။ သပိတ်လွယ်ငှက်ကလေးလို သာယာတဲ့ ညို့အသံလေးကိုပဲ ကြားယောင်နေမလား။ ဒါမှမဟုတ် ရေနစ်လို့ ကူးရပြီဆိုရင် ဖိနပ်ကို စွန့်ခဲ့ရတာပဲဆိုတဲ့ ဥပက္ခာဝါဒီတစ်ဦးရဲ့ ဧကစာရီအကျင့်ကိုပဲ ကျင့်နေပြီလား။

သူ့ “နောက်ကြည့်မှန်” အခုလိုထုတ်ဝေနိုင်အောင် စီစဉ်သူတွေကို ကျေးဇူးတင်ပါသည်။

စီစဉ်သူများသည် နိုင်ငံရေးကို ဘာကြောင့်မှန်းမသိ စိမ်းကားနေပုံရသည်။ မုန်းတီးနေသည့် အဆင့်အထိတော့ မရောက်သေးဟု ထင်ရသည်။

စီစဉ်သူ့စကားတွင် “စာပေသည် နိုင်ငံရေး၏ သြဇာခံမဟုတ်။ တစုံတရာကို ထောက်ခံရန် (သို့မဟုတ်) ကန့်ကွက်ရန်သည် စာပေအနုပညာ၏ ရည်ရွယ်ချက်မဟုတ်ပေ” ဟု တုံးတိတိနှင့် စဖွင့်ထားပြီး “စာပေသည် ထိုစာပေကို ဖန်တီးသူ နေထိုင်ဖြတ်သန်းရသော ခေတ်၏ အလင်းအမှောင်၊ အဆိုးအကောင်းတို့ကိုမူ ထင်ဟပ်ဖေါ်ပြလေသည်” လို့ ရှေ့နောက်မညီဘဲ ဖေါ်ပြထားပြန်ပါသည်။

နောက်ကြည့်မှန်ထဲတွင် “အုန်းသိန်းတို့ သားအဖသည်” အမှောင်နှင့်အဆိုး ဖြစ်ပါသည်။

ယင်းသို့ အဆိုးနှင့် အမှောင်တို့ကို တိုက်ပွဲဝင်ရာတွင် အလင်းနှင့် အကောင်းဖြစ်သော ညို၏ လေးခွအစွမ်းဖြင့် အုန်းသိန်း၏ ညို့သကျည်းကို မှန်အောင် ပစ်ခြင်းဖြင့် ဖေါ်ထုတ်ထားပါသည်။

“စက်မှုကျောင်းသား ကိုဖုန်းမော်က သွေးနဲ့ မီးရှူးဖောက်ပြီး အချက်ပေးခဲ့ပြီ၊ ငါတို့ခေတ်မှာ အပြီးအပြတ် တိုက်ကြမယ်” ဆိုပြီး စစ်အာဏာရှင်စနစ် ဖျက်သိမ်းရေးတာဝန်ကို ညွှန်ပြထားသည်။ ထောက်ခံထားသည်မဟုတ်ပါလား။

အကယ်၍သာ ညိုနှင့် ကိုဖေသောင်း၏ သံယောဇဉ်ဖွဲ့နွှဲ့မှုထဲကနေ နောက်ခံကားအဖြစ်ထားတဲ့ ၈၈ လူထုလှုပ်ရှားမှုကြီးကို ဖယ်ထုတ်လိုက်လျှင် ရွက်ကြမ်းရေကြို အချစ်ဇာတ်လမ်းတစ်ပုဒ်မျှသာ ဖြစ်နေပါလိမ့်မည်။

ကိုဖေသောင်းသည် သံယောဇဉ်အနှောင်အဖွဲ့တွေကို အလေးအမြတ် အသိအမှတ်ပြုပေမယ့် “တခါတော့ ဝေးလိုက်ကြရအောင် ညိုရေ” လို့ ပြောပြီး ကျောခိုင်းခဲ့သူဖြစ်သည်။ ကိုဖေသောင်းသည် နောက်ကိုကြည့်သူမဟုတ်။ ရှေ့ကိုကြည့်သူ၊ အနာဂတ်ကိုကြည့်သူသာ ဖြစ်သည်။

ဒီလိုသဘောထားတွေကြောင့်ပင် မခင်အေးကတဆင့် “ရှင့်ရုပ်ကို ပြန်ကြည့်ဖို့မဟုတ်ဘူး။ ကျောခိုင်းရာမှာ ဘာဖြစ်ကျန်ခဲ့မှန်းမသိသူတွေအတွက် နောက်ကြည့်မှန်တချပ် လှူချင်တာ” ဟု (စာမျက်နှာ ၁၁၄-၁၁၅) ပြောပြထားသည်။ ယင်းစကားသည် နောက်ကြည့်မှန်၏ အနက်အဓိပ္ပါယ် ဖြစ်နေသည်။ ကိုဖေသောင်းသည် နိုင်ငံရေး၏ သြဇာခံဟုတ်မဟုတ်တော့ ကျနော်မပြောတတ်ပါ။ ဒီကိစ္စကို စီစဉ်သူများကသာ သုံးသပ်အဖြေရှာကြရန် ဖြစ်ပါသည်။

ကျနော်ပြောနိုင်သည်မှာ ကိုဖေသောင်းသည် သံယောဇဉ်၏ လက်အောက်ခံမဟုတ်သည်ကတော့ သေချာပါသည်။

ထို့အပြင် နိုင်ငံရေးလှုပ်ရှားမှုနှင့် နိုင်ငံရေးလှုပ်ရှားသူများကို နည်းမျိုးစုံနှင့် ဖိနှိပ်ချေမှုန်းပြီး နိုင်ငံရေးအကျဉ်းသားမရှိဟု ဆိုနေသော ယနေ့ခေတ်ကိုလည်း သတိပြုစေချင်ပါသည်။

နေရာတော်တော်များတွင် ဦးရွှေခင်ကနေ ဦးခင်ရွှေဖြစ်နေတာနှင့် မှုန်ကျကျကားလမ်း (မှုန်ပြပြကားလမ်း)၊ ကားလတ် (ဟိုင်းလတ်ကားဖြစ်မည်ဟု ထင်ပါသည်) ပေါ်မှာ ဆင်းလိုက်သည် (နှာ- ၉၄)။ ရေတခွပ်ခွပ် (တဂွပ်ဂွပ်) သောက် (နှာ-၁၅၅) ဆိုသည့် အကျအပေါက်များမှလွဲ၍ ပြောစရာမရှိတော့ပါ။

ညိုကတော့ “ကြယ်တွေမှာလည်း ကြယ်လူကြီး၊ ကြယ်ကလေးတွေ ရှိတယ်။ ဓူဝံကြယ်က ကြယ်အဖိုးကြီးမို့ တနေရာထဲ ငုတ်တုတ်ထိုင် စဉ်းစားနေတာပေါ့။ ခုနှစ်စဉ်ကြယ်က ကလေးတွေမို့ ကုန်းပိုးစီးတန်းကစားနေကြတာ။ အခြေမခိုင်ဘဲ လိမ့်ကျသွားတဲ့ ကြယ်တွေ မြင်ဖူးပါတယ်။ ဒါပေမယ့် အဲဒီအထဲမှာ လူတွေအတွက် အသုံးတည့်လို့ နာမည်မှည့်ခံထားရတဲ့ ကြယ်တွေ တပွင့်မှပါမသွားဘူး။ တကယ်တော့ ကြယ်တွေရဲ့ဘဝမှာ အဖော်နီးတာ၊ အဖော်ဝေးတာ အရေးမကြီးပါဘူး။ လောကအတွက် အသုံးဝင်တဲ့ ကြယ် ဘယ်တော့မှမကြွေတာ သေချာပါတယ်” ဆိုတဲ့ စာသားတွေကို အထပ်ထပ်ရေးချနေပြီး ညိုတည်ထားတဲ့ ရေချမ်းစင်မှာ ရေလာခတ်သောက်မယ့် သူကို ငေးမောမျှော်လင့်နေလိမ့်မယ်လို့ ကျနော် အသေအချာ ယုံကြည်ပါသည်။

သို့ဖြင့် ညိုနှင့် ကိုဖေသောင်းကို လွမ်းသော အလွမ်းသည် တောဘူတာရုံလေးထဲ ဒရီးဒယိုင် ဝင်ရောက်သော လော်ကယ်ရထားတစ်စင်းလို ကျနော့်ရင်ထဲသို့ လှုပ်လှုပ်ရှားရှား တိုးဝင်လာပါတော့သည်။

အချိန်ဟူသော လော်ကယ်ရထားသည် ဘူတာမျိုးစုံကို ဖြတ်သန်းခုတ်မောင်းနေပါလိမ့်မည်။

အတိတ်မြင်ကွင်းများသည် နောက်ကြည့်မှန်ထဲတွင် တရိပ်ရိပ် ဝေး၍ဝေး၍ကျန်ခဲ့ပြီ။
× × × × ×
မျိုးမြင့်မောင်
(၂၀၀၉ နိုဝင်ဘာ ၆ ရက်)

အမျိုးသားလွတ်မြောက်ရေး လှုပ်ရှားမှုကော်မတီက လူထုလှုပ်ရှားမှု ပို့စ်ကဒ်များ ဖြန့်ဝေ

ရိုးမ ၃
သံဃာ့အဖွဲ့ချုပ်(မြန်မာနိုင်ငံ) ဦးဆောင်မှုဖြင့် ဖွဲ့စည်းထားသည့် အမျိုးသားလွတ်မြောက်ရေး လှုပ်ရှားမှုကော်မတီက ကြွေးကြော်သံ (၄) ချက်ပါသည့် ပို့စ်ကဒ်များ ဖြန့်ဝေခြင်းလှုပ်ရှားမှုကို ယမန်နေ့က ပြုလုပ်ခဲ့သည်။

ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများ လွတ်မြောက်ရေး၊ နိုင်ငံအဝှမ်း သမဂ္ဂများ ပေါ်ပေါက်ရေး၊ ပြည်သူ့အစိုးရတရပ် ပေါ်ပေါက်ရေးနှင့် အမျိုးသားလွတ်မြောက်ရေး လှုပ်ရှားမှု အောင်မြင်ရေးဟူသည့် ကြွေးကြော်သံ (၄) ချက် အကောင်ထည်ဖော်ရာတွင် ပြည်သူများ ပါဝင်လာစေရန်အတွက် ယခုကဲ့သို့ လှုပ်ရှားမှု ပြုလုပ်ခဲ့ခြင်းဖြစ်သည်။

အဆိုပါလှုပ်ရှားမှုကို ရန်ကုန်၊ ပဲခူး၊ မှော်ဘီ၊ မန္တလေး၊ ကျောက်ဆည်၊ စစ်ကိုင်း၊ စဥ့်ကိုင်နှင့် ပြင်ဦးလွင်မြို့များရှိ ဘုန်းကြီးကျောင်း၊ တက္ကသိုလ်၊ ကောလိပ်၊ ဈေးဆိုင်များ၊ ဓါတ်တိုင်များနှင့် နေအိမ်များတွင် ပို့စ်ကဒ် အခု ၅၀၀ ကျော်အား ဖြန့်ဝေကပ်ထားခြင်းများ ပြုလုပ်ခဲ့ခြင်းဖြစ်သည်။

အမျိုးသားလွတ်မြောက်ရေး လှုပ်ရှားမှုကော်မတီကို သံဃာ့အဖွဲ့ချုပ်(မြန်မာနိုင်ငံ) အပါအဝင် ပြည်တွင်းအင်အားစု ၁၄ ဖွဲ့တို့က လုပ်ငန်းစဉ် (၇) ရပ်ချမှတ်ကာ ၂၀၀၉ ခုနှစ်၊ သြဂုတ်လ (၂၂) ရက်နေ့တွင် ဖွဲ့စည်းခဲ့ခြင်းဖြစ်သည်။

အမျိုးသားလွတ်မြောက်ရေး လှုပ်ရှားမှုကော်မတီတွင် သံဃာ့အဖွဲ့ချုပ်(မြန်မာနိုင်ငံ)၊ လွတ်လပ်သော သတင်းနှင့် နည်းပညာအစည်းအရုံး၊ မြန်မာနိုင်ငံ အမျိုးသမီးအဖွဲ့ချုပ်(ပြည်တွင်း)၊ မြန်မာနိုင်ငံ အလုပ်သမားများအစည်းအရုံး၊ မြန်မာနိုင်ငံ စာပေ ပညာရှင်များအစည်းအရုံး၊ အသိပညာရှင် အတတ်ပညာရှင်များ အစည်းအရုံး၊ တောင်သူလယ်သမားများသမဂ္ဂ၊ တိုင်းရင်းသားလူငယ်များ အစည်းအရုံး၊ မြန်မာနိုင်ငံ သုခုမ ပညာသည်များအစည်းအရုံး၊ ကယားပြည်နယ် ကျောင်းသားသမဂ္ဂ၊ တောင်ငူတက္ကသိုလ် ကျောင်းသားသမဂ္ဂ၊ ပုသိမ်တက္ကသိုလ် ကျောင်းသားသမဂ္ဂ၊ ပြည်တက္ကသိုလ် ကျောင်းသားသမဂ္ဂနှင့် လွိုင်ကော်တက္ကသိုလ် ကျောင်းသားသမဂ္ဂတို့ ပါဝင်သည်။

နိုင်ငံရေးအကျဉ်းသူအတွက် ဆေးစာ အရောက်နောက်ကျ၍ ဆေးပို့ခွင့်မရ

ဖြိုးကြီး
မန္တလေးတိုင်း၊ မြင်းခြံအကျဉ်းထောင်မှ နိုင်ငံရေးအကျဉ်းသူ မလှလှမော်အတွက် ဆေးစာ အရောက်နောက်ကျသဖြင့် ထောင်ဝင်စာတွေ့စဉ် ဆေးဝါးများ ပေးခွင့်မရခဲ့ကြောင်း မိသားစုဝင်တဦးက ပြောသည်။

မလှလှမော်အတွက် ဆေးစာကို စာတိုက်မှ ပို့လိုက်သည်မှာ ၁ လကျော်ပြီဖြစ်သော်လည်း မိသားစုထံ မရောက်သေးသဖြင့် မည်သည့်ဆေးဝါးများ ဝယ်သွားရမည်ကို မသိဘဲဖြစ်နေရသည်ဟု ပြောသည်။

“ကျနော်တို့က ၂ လတကြိမ် ထောင်ဝင်စာသွားတွေ့တာဆိုတော့ အခုကျနော်တို့ မလာခင်မှာ ဆေးစာကို စာတိုက်က ပို့လိုက်တာ တလလောက်ရှိပြီ ပြောတယ်။ အခုထိ ကျနော်တို့ဆီမရောက်လာတော့ ထောင်ဝင်စာ သွားတွေ့တော့ ဆေးတွေ မဝယ်သွားဖြစ်ဘူး။ ဆေးစာရမှ ဆေးဝယ်သွားပေးလို့ရမှာ။ သူနဲ့ပတ်သက်တဲ့ ဆေး ဘာတခုမှ မပါသွားဘူး” ဟု မိသားစုဝင်တဦးက ပြောသည်။

မလှလှမော်သည် သွေးပေါင်ကျရောဂါခံစားနေရပြီး ယခင်ထောင်မကျခင်ကတည်းက ကျန်းမာရေး ကောင်းမွန်ခြင်းမရှိကြောင်း အဆိုပါ မိသားစုဝင်က ဆက်ပြောသည်။

အကျဉ်းထောင်တွင်း ဆေးရုံအခြေအနေနှင့်ပတ်သက်၍ “ထောင်ဆေးရုံက ဆေးကုသတယ်ဆိုတာကတော့ ဘယ်လိုပဲ ကုသကုသ ကျနော်ကိုယ်တိုင်လည်း ထောင်ဆေးရုံ တက်ခဲ့ဖူးတာပဲ။ ဆေးပတ်လည်အောင် ဆေးသုံးပြားတောင်းတာတောင် မရခဲ့ဘူး။ အပြင်က မိသားစုတွေကပဲ မဖြစ်ဖြစ်တဲ့နည်းနဲ့ ရှာဖွေဝယ်ပေးနေရတာ” ဟု ပြောသည်။

ထို့အပြင် မလှလှမော်၏ အမျိုးသားမှာလည်း အင်းစိန်အကျဉ်းထောင်တွင် အကျဉ်းကျနေလျက်ရှိပြီး ခုနှစ်နှစ်အရွယ် သမီးဖြစ်သူကို ဆွေးမျိုးများက စောင့်ရှောက်ထားရသည်ဟု ပြောသည်။

“အပြင်မှာ ကလေးတယောက်တည်းပဲ ကျန်နေခဲ့တာ။ လင်မယားနှစ်ယောက်စလုံး ထောင်ကျနေတာ။ ကလေးက ဒုက္ခရောက်နေတာပေ့ါ။ သူ့အမေကို ထောင်ဝင်စာသွားတွေတော့ အမေဖြစ်သူက မကြာခင် ပြန်လာမယ်ဆိုပြီး ကလေးစိတ်ချမ်းသာအောင် ပြောတော့ နောက်တနေ့ အဖေကို ထောင်ဝင်စာသွားထပ်တွေတော့ ကလေးက ပြောပြီး ငိုတာပေ့ါ” ဟု ပြောသည်။

မလှလှမော်ကို ပြီးခဲ့သည့် ၂၀၀၈ ခုနှစ်၊ သြဂုတ်လ (၂၇) ရက်နေ့တွင် စစ်အစိုးရအာဏာပိုင်များက ပုဒ်မ ၅၀၅(ခ)၊ ၁၄၇၊ ၁၄၃၊ ၃၅၃ တို့ဖြင့် ထောင်ဒဏ်စုစုပေါင်း ကိုးနှစ်ခွဲချမှတ်၍ မြင်းခြံအကျဉ်းထောင်တွင် ထားရှိသည်။

ဥပဒေမဲ့လုပ်ရပ်ကို မယက ဥက္ကဌက ငွေယူ၍ အကာအကွယ်ပေးထား

ရိုးမ ၃

ကျေးရွာ လျှပ်စစ်မီးကြိုးများကို ဖြုတ်သိမ်းကာ ကိုယ်ကျိုးရှာသည့် ဘုန်းကြီးက မယက ဥက္ကဌကို ငွေပေးကာ အမှုကို ပိတ်ထားသည့်အတွက် ရွာသားများ မကျေမနပ်ဖြစ်နေကြသည်။

မန္တလေးတိုင်း၊ ကျောက်ပန်းတောင်းမြို့နယ် နှစ်ကျပ်ခွဲကျေးရွာ ထီးတော်လွတ်ဘုရားကျောင်းဆရာတော် ဦးကောသံလ္လက မြို့နယ်မယက ဥက္ကဌကို ငွေ ၂ သိန်းကျော်ပေးပြီး ကျေးရွာအတွင်း သွယ်တန်းထားသည့် မီးကြိုးများဖြုတ်ယူသည့်အမှုကို တစုံတရာ အရေးယူခြင်းမရှိရန် ကြိုးစားနေကြောင်း ရွာသားတဦးက ပြောသည်။

“ဦးကောသလ္လက မီးကြိုးတွေကို ဖြုတ်ပြီးတော့ကျောင်းမှာ သိမ်းထားတာကို မယကကို တိုင်တာ၊ ဘုန်းကြီးက ထောင်တန် အရွက် ၂၀၀ ကျော်ကို မယက ရုံးကိုသွားပို့တော့ ဥက္ကဌက လက်ခံထားခဲ့တယ်၊ မီးကြိုးတွေက ဒီနေ့အထိ မယက ရုံးထဲမှာ ရှိတုန်းဘဲ အမှုဖွင့်တရားစွဲလို့မရဘူး၊ အရေးယူဆောင်ရွက် ပေးတာမရှိဘူး” ဟု ပြောသည်။

အဆိုပါ မီးကြိုးများကို ၂၀၀၄ ခုနှစ်အတွင်းက ဗိုလ်ချုပ် ရဲမြင့်ကိုယ်တိုင်လာရောက်၍ ကျေးရွာ သဘာဝဇီဝ လျှပ်စစ်မီးလင်းရေးအတွက် တပ်ဆင်ဖွင့်လှစ်ပေးခဲ့ခြင်းဖြစ်ကြောင်း ဒေသခံရွာသားက ဆက်ပြောသည်။

“၂၀၀၈၊ ၂၀၀၉ မှာ ရွာထဲမှာ တပ်ဆင်ထားတဲ့ မီးတွေကို ဖြုတ်ပြီး တအိမ်ထောင်ကို ဖန်ချောင်းတချောင်း ၂၀၀၀၊ တီဗွီတလုံး ၆,၀၀၀၊ ဗွီဒီယိုတလုံး၂၄,၀၀၀ နဲ့ ဘုရားလှူထားတဲ့ ထရပ်စဖာနေပြီးတော့ ဆင့်ပွားမီး ပေးခဲ့တာ၊ အဲဒီ ကိစ္စကို ရွာကတိုင်တယ်၊ ဇွန် ၂၈ ရက်နေ့မှာ မီးဆင့်ပွားပေးတာကို ရပ်ဆိုင်းဖို့ မြို့နယ်က အကြောင်းကြားတော့ ဇူလိုင် ၁၅ ရက်နေ့မှာ ဦးကောသံလ္လဦးဆောင်ပြီး သူ့ဒကာတွေ၊ ကိုရင်တွေနဲ့ ကျေးရွာအတွင်း သွယ်တန်းထားတဲ့ မီးကြိုး၊ မီးတိုင်၊ မီးချောင်းတွေကို ဖြုတ်ပြီး ကျောင်းမှာ သိမ်းထားလိုက်တယ်၊ ၁၆ ရက်နေ့ကြတော့ ကျေးရွာ လူထုနဲ့ ရုတ်ရုတ်သဲသဲတွေဖြစ်သွားတယ်” ဟု ဒေသခံရွာသားက ပြောသည်။

ယင်းကဲ့သို့ အချင်းများသည့်အတွက် မြို့နယ် ပြည်ခိုင်ဖြိုးအာဏာပိုင်များနှင့် ရဲတပ်ဖွဲ့မှူးကိုယ်တိုင် လာရောက်၍ ဖြုတ်ယူထားသည့် မီးကြိုးများပြန်ပေးရန်လျှောက်ထားရာ ဘုန်းကြီးက ငြင်းဆန်ခဲ့သည့်အတွက် မယက ဥက္ကဌကို တင်ပြရာ ဘုန်းကြီးက ငွေပေးလိုက်သဖြင့် အမှုကိုအရေးယူခြင်းမရှိသေးကြောင်း ၎င်းကဆက်ပြောသည်။

ယခုကဲ့သို့ ဒေသဆိုင်ရာ အာဏာပိုင်များနှင့်ပေါင်း၍ ကိုယ်ကျိုးရှာနေမှု၊ ဥပမဲ့လုပ်ရပ်များကို အရေးယူဆောင်ရွက်ရန် ဒေသခံများအနေဖြင့် အထက်အာဏာပိုင်များထက် ဆက်လက်တင်ပြသွားမည်ဟု ဆက်လက်ပြောသည်။

ဒီကေဘီအေအဖွဲ့ ရွှေတူးနေကြောင်း သတင်းများထွက်ပေါ်

ဖြိုးကြီး

မြဝတီမြို့၊ ကျောက်တောင်ရွာအနီးတဝိုက်တွင် ဒီကေဘီအေအဖွဲ့များက ရွှေတူးသည့်လုပ်ငန်းများ လုပ်ဆောင်နေကြောင်း သတင်းများ ထွက်ပေါ်နေလျက်ရှိသည်။

လွန်ခဲ့သည့် ၆ လခန့်မှ စတင်ကာ လုပ်ဆောင်နေခြင်းဖြစ်ပြီး ရွှေစအနည်းငယ်ပါဝင်သည့် မြေမှုန့်များကို ရောင်းချခြင်းများ ရှိနေသည်ဟု ဒေသခံ ရွှေလုပ်ငန်းလုပ်ကိုင်သူတဦးက ပြောသည်။

“အဲဒီက တူးတဲ့ဟာတွေ ကျနော့်ကို လာစပ်သေးတယ်။ မြေမှုန့်တွေနဲ့ ရောနေတာ။ ရွှေမှုန့်တွေတော့ ပါတယ်။ အရောင်ကလည်း အကုန် ရွှေရောင်တွေပဲ။ ဒါက ကံနဲ့ဆိုင်တာဆိုတော့ ကျနော်တို့လည်း လုပ်ဖို့က စဉ်းစားနေတုန်းပဲ” ဟု ပြောသည်။

ယင်းကဲ့သို့ ရွှေတူးနေခြင်းကို ဒီကေဘီအေအဖွဲ့ဝင်များက လူအများအသိမခံဘဲ ၎င်းတို့ အုပ်စုအတွင်းလောက်သာ သိရကြောင်း အဆိုပါဒေသခံက ဆက်ပြောသည်။

“သူတို့က လူအမြင်မခံဘူး။ အဲဒီမှာရှိတဲ့ သူတွေကို ရှင်းထုတ်ပြီးမှ လုပ်တာ။ ကျနော်တို့လည်း သူတို့ လှုပ်ရှားနေတယ် ဆိုတာပဲ သိတယ်။ တကယ် တိတိကျကျ ဘာတွေလုပ်နေတယ်ဆိုတာကတော့ မသိဘူး။ ကျနော့်ကို ရွှေမှုန့်တွေ လာစပ်တဲ့သူကလည်း ဘယ်ကရတယ်ဆိုတာကို ပြောတာမဟုတ်ဘူး” ဟု ပြောသည်။

ယခုလက်ရှိ မြဝတီမြို့ပေါ်တွင် ဒီကေဘီအေအဖွဲ့ဝင်များအနေဖြင့် အနည်းငယ် ထူးခြားမှုများရှိနေပြီး သွားလာရာတွင် အုပ်စုလိုက် သွားလာခြင်းများ ရှိနေကြောင်း ၎င်းက ဆက်ပြောသည်။

ဒီကေဘီအေအဖွဲ့မှာ မကြာသေးခင်က စစ်အစိုးရလက်အောက်ရှိ နယ်ခြားစောင့်တပ်ဖွဲ့စည်းရေးကို သဘောတူထားပြီး ကရင်ပြည်နယ်အတွင်း စီးပွားရေးလုပ်ငန်းများကို လုပ်ကိုင်နေလျက်ရှိသည်။

မြို့ပြဝေဒနာ

ရဲရင့်သက်ဇွဲ

ကမ္ဘာဦးရဲ့ နေ့လိုပဲ
အရိုင်းဆန် အရိုးခံ ဖွဲ့တေးသီ
ဝေးကွာမှုရဲ့ အတွင်းဆီမှာ
တယောက်ရဲ့ဒဏ်ရာ
အပြစ်အနာအဆာများကို
တယောက်က
ချစ်ခြင်းနဲ့ လွှမ်းခြုံ
ဒီကမ္ဘာမှာ လုံခြုံမယ်ထင်ခဲ့ကြ ………။

တယ်လီဖုန်းခွက်ထဲက
လျှံထွက်လာတဲ့ အသံဟာ
ဗုံးတလုံးလို ဝုန်းကနဲပေါက်ကွဲ
စိမ်းကားသော မီးတောက်မီးလျှံများကြားထဲ
စိမ်းလန်းသောစကားများ လောင်ကျွမ်းပျက်သုဉ်း
ကြေကွဲခြင်းရာသီတွေရဲ့ အခင်းအကျင်းအဆုံးမှာ
တမ်းတခြင်းက အာသာငမ်းငမ်း ……။

အတိတ် ပစ္စုပ္ပန် အနာဂတ်
ဘယ်အရပ်မှာ ငါရပ်ရမလဲ
ကာလယန္တရားကြီးရဲ့  ဝါးမျိုမှုထဲ
ဘဝက တစ … တစ
ကျိုးပဲ့ ကြေမွ
ကံဇာတ်ဆရာအလိုကျတော့ မဟုတ်ခဲ့ဘူး …..။
တရွေ့ရွေ့ ဆုတ်ခွါသွားတဲ့
နွေနှောင်းရက်များရဲ့ နေရာမှာ
ဆောင်းမျှော်ရက်များ အစားထိုးဝင်လာကြပြီ
မြို့ပြရဲ့ ဆောင်းခိုငှက်တွေမှာတော့
အသိုက်အမြုံကို စွန့်ခွာခဲ့ကြပေါ့ …..။
× × × × ×

ရဲရင့်သက်ဇွဲ
(နိုဝင်ဘာ ၃ ၊ ၂၀၀၉)

တာဝန်မထမ်းဆောင်လိုတော့ကြောင်း အရာရှိတဦး ဖွင့်ဆို

ဗထူး

တပ်မတော်အတွင်း တပ်မှူးများ၊ အရာရှိများအနေဖြင့် ဆက်လက် တာဝန်ထမ်းဆောင်းလိုခြင်းမရှိတော့ကြောင်း အမည်မဖော်လိုသည့် တပ်မတော်အရာရှိတဦးက ပြောသည်။

၂၀၁၀ ရွေးကောက်ပွဲနောက်ပိုင်း ဖြစ်ပေါ်လာမည့် အစိုးရနှင့် အနာဂါတ်ကို ယုံကြည်မှုမရှိသည့်အတွက် ယင်းကဲ့သို့ ဆက်လက် မနေလိုတော့ခြင်းဖြစ်ကြောင်း ၎င်းက ပြောသည်။

“အခုဆို တချို့တပ်မှူးတွေ၊ အရာရှိတွေ အရပ်ဖက်ကို ငွေပေးပြီး ပြောင်းနေကြတယ်။ အဲဒါကလည်း တိုင်းမှူးတွေနဲ့ အဆင်ပြေပြီးမှ ရတာ။ အနိမ့်ဆုံး လေးသိန်းလောက် ကုန်တယ်။ အခုဟာက တချို့တပ်တွေမှာဆိုရင် အမိန့်မနာခံရင် ပင်စင်လစာပါ မရဘူးဖြစ်နေတာ။ အရာရှိတော်တော်များများလည်း အထက်က ဖိအားပေးတာတွေ ခံနေရတယ်” ဟု ပြောသည်။

၂၀၁၀ ရွေးကောက်ပွဲကို တပ်မတော်အရာရှိများအပါအဝင် ကြံ့ဖွံ့အသွင်ပြောင်းများ၊ စစ်မှုထမ်းဟောင်းများ၊ အမျိုးသမီးရေးရာ အဖွဲ့ဝင်များကို ပြင်ဆင်ဖွဲ့စည်းထားကြောင်း အဆိုပါအရာရှိက ဆက်လက်ပြောသည်။

စစ်အစိုးရခေါင်းဆောင်ပိုင်းအနေဖြင့် အတိုက်အခံ ဒီမိုကရေစီအင်အားစုများအပေါ် မည်ကဲ့သို့ သဘောထားသည်ဖြစ်စေ မိမိတို့အနေဖြင့် အားလုံးအဆင်ပြေစေလိုကြောင်း ၎င်းက ပြောသည်။

“အတိုက်အခံပဲပြောပြော၊ ဒေါ်စုကြည်နဲ့ပဲဖြစ်ဖြစ် ပြေလည်အောင် လုပ်စေချင်ပါတယ်။ တဆက်တည်းပြောချင်တာက ကျနော်တို့ တပ်မတော်သားတွေအနေနဲ့ကတော့ တပ်မတော်နဲ့ ပြည်သူ ကြည်ကြည်ဖြူဖြူပဲ သွားချင်ပါတယ်” ဟု ပြောသည်။

ထို့အပြင် စစ်အစိုးရ အတည်ပြုခဲ့သည့် ၂၀၀၈ ဖွဲ့စည်းပုံ အခြေခံဥပဒေသစ်အရ ကြားဖြတ်အစိုးရဖွဲ့ရန် မဖြစ်နိုင်ကြောင်းနှင့် တပ်မတော်အတွင်း တစုံတရာ မကြားသိသေးကြောင်း ၎င်းက ဆက်လက်ပြောသည်။

မကြာသေးခင်ကလည်း တပ်မတော်အင်ဂျင်နီယာတပ်မှ အရာရှိတဦးက အင်ဂျင်နီယာတယောက်အနေဖြင့်သော်၎င်း၊ တပ်မတော်သားတယောက်အနေဖြင့်သော်၎င်း အပြောင်းအလဲသည် အရေးကြီးကြောင်း ဖွင့်ဟပြောဆိုခဲ့သည်။

စာရိတ္တမကောင်းသည့် ရယကဥက္ကဋ္ဌကို အရေးမယူသည့်အတွက် ပြည်သူများ မကျေမနပ်ဖြစ်

ရိုးမ ၃

အကျင့်စာရိတ္တကောင်းမွန်ခြင်းမရှိသည့် ရယကဥက္ကဋ္ဌကြောင့် ပြည်သူများအတွက် မလိုလားအပ်သည့် ဆူပူမှုများ ဖြစ်လာနိုင်ကြောင်း အထက်အာဏာပိုင်များထံသို့ တင်ပြတိုင်ကြားသော်လည်း တစုံတရာအရေးယူခြင်း မရှိသည့်အတွက် ဒေသခံများ မကျေမနပ်ဖြစ်နေကြသည်။

ဧရာဝတီတိုင်း၊ ပုသိမ်မြို့၊ အမှတ် (၇) ရပ်ကွက် ရယကဥက္ကဋ္ဌ ဦးဝင်းသိန်းသည် နာဂစ်မုန်တိုင်းဒဏ်သင့် ပြည်သူများအတွက် ထောက်ပံ့ရေးပစ္စည်းများကို ကိုယ်ကျိုးအတွက် သုံးစွဲခဲ့သည့်အပြင် ယခင်ကလည်း ခိုးမှုဖြင့် ထောင်ကျခဲ့ဖူးသူတဦးဖြစ်ကြောင်း ဒေသခံတဦးက ပြောသည်။

“နာဂစ်တုန်းက ပေးတဲ့ အကူညီပစ္စည်းတွေထဲက သံထည်ပစ္စည်းတွေကို သူ့တပည့် အေးကြူကို ထော်လာဂျီနဲ့ ခိုးထုတ်ပြီး ရာမည (၁၂) လမ်းက ဦးသိန်းအောင် ပန်းပဲဖို၊ အမှတ် (၆) ရပ်ကွက် ရယက ဦးမြင့်လွင်သံဆိုင်နဲ့ ဈေးကြီးထဲက စိန်နဲ့မြ သံဆိုင်တွေမှာ သွားရောင်းတာ။ အဲဒီ ရောင်းတဲ့ပိုက်ဆံတွေကို သူ့မိန်းမက ညဘက်ကျမှ လိုက်သိမ်းတာ” ဟု ပြောသည်။

ထို့အပြင် ရပ်ကွက်အတွင်းရှိ လေဘေးသင့်ပြည်သူ အယောက် ၁၄၀ အတွက် ပေးသည့် သံထည်နှင့် ဘိလပ်မြေများကို ခွဲဝေပေးခြင်းမရှိဘဲ ၎င်း၏အစ်မဖြစ်သူ နေထိုင်ရာ ရာမည (၁၀) လမ်းထိပ် သမဝါရမဆိုင် အနောက်ဘက်တွင် သိမ်းထားပြီး လိုသလောက်ထုတ်ယူကာ သုံးစွဲနေကြောင်း အဆိုပါဒေသခံက ဆက်လက်ပြောသည်။

“သူနဲ့ သူ့တပည့်တွေက ညတိုင်း ရယကရုံးထဲမှာ အရက်ဝိုင်းလုပ်နေတာ။ ရပ်ကွက်ထဲက လူတွေကလည်း ဘာမှမပြောဘူးဆိုတာက သူက ထောင်ထွက်ဖြစ်ပြီး တပည့်တွေအကုန်လုံးကလည်း ထောင်ထွက်လူမိုက်တွေကို ခန့်ထားတာ။ ရုံးစောင့် အေးကြူဆိုရင် ခိုးမှုနဲ့ အကြိမ်ကြိမ် ထောင်ကျထားတာ။ အဲလိုလူတွေ ခန့်ထားတာ” ဟု ဆက်ပြောသည်။

ထို့အပြင် ရုံးတယ်လီဖုန်းပြင်ရန် အကြောင်းပြပြီး ရပ်ကွက်အတွင်း လုပ်ငန်းရှင်များထံမှ အလှူငွေ ၃,၀၀၀ နှင့် အခြေခံလူတန်းစားများထံမှ ၃၀၀ နှုန်း ကောက်ခံပြီး တယ်လီဖုန်းအသစ်တလုံးကို ၎င်းအိမ်တွင် တပ်ဆင်ထားကြောင်း ၎င်းက ဆက်ပြောသည်။

ရပ်ကွက်အတွင်း ရဲအရေးပိုင်အမှုများကိုလည်း ၎င်းသဘောဆန္ဒအလျောက် ဒဏ်ရိုက်အပြစ်ပေးခြင်းကို ပြုလုပ်နေသည့်အတွက် ဥပဒေဝန်ထမ်းများအနေဖြင့်လည်း လုပ်ငန်းအနှောင့်အယှက်များ ကြုံတွေ့နေရကြောင်း အမည်မဖော်လိုသည့် ဥပဒေဝန်ထမ်းတဦးက ပြောသည်။

“ဖဲဝိုင်းတွေဘာတွေကို သူ့ဟာသူ ဖမ်းဝရမ်းမပါဘဲ သူများအိမ်ပေါ်တွေ တက်ဖမ်းတယ်။ ပြီးတော့ ဒဏ်ငွေ ငါးသောင်းစီ တောင်းတယ်။ ဒဏ်ငွေမပေးနိုင်တော့မှ ရဲစခန်းကို အကြောင်းကြားတာဆိုတော့ ရဲတပ်ဖွဲ့အနေနဲ့လည်း အလုပ်လုပ်ရတာ ခက်တယ်။ အဲလိုမျိုး လုပ်တာကလည်း အကြိမ်ပေါင်းမနည်းတော့ဘူး” ဟု သူက ပြောသည်။

အဆိုပါ ရယကဥက္ကဋ္ဌ၏ အလွဲသုံးစားလုပ် ကိုယ်ကျိုးရှာနေမှုများကို သက်ဆိုင်ရာ အထက်အာဏာပိုင်များထံ စာရေးတိုင်ကြားသော်လည်း တစုံတရာ အရေးယူခြင်းမရှိသည့်အတွက် ရပ်ကွက်နေ ပြည်သူများ၊ ဥပဒေဝန်ထမ်းများအနေဖြင့် မကျေမနပ်ဖြစ်နေကြောင်း အဆိုပါဝန်ထမ်းက ဆက်လက်ပြောသည်။